Read Batak Karo JESAYA 13 Bible Online

JESAYA 13 - Batak Karo bible

JESAYA 13

¹Enda me berita kerna Babil, si ialoken Jesaya anak Amos i bas Dibata nari: [31†]

²Penangkihlah bendera perang i datas uruk-uruk si salang! Lebuhlah tentera janah ewatken tanndu jadi tanda man bana maka iserangna pintun-pintun gerbang kuta si megombang e.

³TUHAN enggo ndilo tentera pilihenNa, tentera si banci iagahken, si la lit kebiarenna, guna nehken ukumen man kalak si nembeh ateNa.

⁴Dengkehkenlah sora gejek i datas deleng-deleng, sora gejek jelma si nterem, sora bangsa-bangsa ras kerajan si sangana pulung. TUHAN-nu-bala-Serdadu, sangana nikapken tenteraNa lawes erperang.

⁵Tentera e reh i negeri-negeri si ndauh i tampuk doni nari. Erkiteken rawaNa, reh TUHAN ngeradasken negeri e kerina.

⁶Nderkuhken, sabap wari TUHAN enggo ndeher; sanga si e, reh me si Mada Kuasa ngkernepkenca. [32†]

⁷E maka kerina kalak lanai ergegeh tanna, jenari bene ukurna.

⁸Mbiar ia janah mesui akapna, bagi suina iakap diberu si sangana mupus. Sinehenen ia sapih-sapih ia ban biarna, janah megara pe ayona nahanken suina.

⁹Reh me wari TUHAN, wari si dem alu pernembeh ras gara ate TUHAN lanai teralang. Doni enda ibahanNa jadi taneh mesawang, janah kerina kalak perdosa ikernepkenNa.

¹⁰Kerina bintang ras rarasen bintang-bintang ngadi ersinalsal, matawari mbiring tupung pultak erpagi-pagi, janah bulan pe la ersinalsal. [33†]

¹¹Nina TUHAN, “Kuradasken me isi doni janah Kuukum kerina kalak jahat erkiteken dosana. Kasa kalak si meganjang rukur Kuperjak janah kalak megombang ras kejam Kuukum.

¹²Sunahen pagi muat emas asangken muat kalak si nggeluh denga.

¹³Kubahan pagi maka i bas wari e, tupung Aku, TUHAN si Mada Kuasa encidahken rawangKu maka langit mugur-ugur janah doni mistak i bas inganna nari.

¹⁴Bangsa-bangsa si deban si ringan i Babil kiam pagi mulihken ku negerina jine, merap marpar desken belkih si tersengget ibahan perburu, tah pe bagi biri-biri si la lit permakanna.

¹⁵Kasa kalak si tertangkap, minter itebak seh mate.

¹⁶I lebe-lebe matana anakna si kitik idampesken, rumahna irampasi janah ndeharana ipaksa kalak.”

¹⁷Nina TUHAN, “Kusuruh pagi kalak Medi nerang Babil. La diatena sitik pe ngenehen pirak, janah emas pe la morah atena.

¹⁸Munuhi anak perana saja ngenca atena alu panahna. Subuk kempak anak gara-gara, bage pe danak-danak, la sitik pe atena mekuah.

¹⁹Babilon e me kerajan si mejilena i babo kerina kerajan-kerajan, janah e me jadi kemegahen rayatna. Tapi Aku, TUHAN, Kuruntuhken me Babil, bali ras pengeruntuhkenKu Sodom ras Gomora. [34†]

²⁰Ndigan pe lanai lit kalak nggeluh i je. Kalak Arab pe lanai majekken kemahna i je, bage pe kalak permakan lanai mpermakani asuh-asuhenna i bas ingan e.

²¹Kuta e pagin jadi ingan rubia-rubia gurun pasir, janah ingan alingkupa erbahan asarna. Perik unta tading i je janah kambing kerangen lompat-lompat arah runtuhenna. [35†]

²²Janah serigala terbegi sorana erloling i bas menara-menara ras istana-istanana nari. Paksana nandangi seh. Wari-wari Babil enggo menam keri.”