Read Batak Karo JESAYA 14 Bible Online

JESAYA 14 - Batak Karo bible

JESAYA 14

¹Mekuah ka pagi ate TUHAN man Israel bangsaNa, janah ipilihNa bangsa e jadi sikerajangenNa. ItamakenNa ka mulihken bangsa e ringan i bas negerina jine, jenari reh me bangsa-bangsa si deban janah ras ia tading i je.

²Melala pagi bangsa-bangsa nampati Israel lako mulih ku negeri si ibereken TUHAN man bana, janah i bas negeri e ia jadi budak kalak Israel. Itaban kalak Israel pe kalak si naban ia nai, janah kalak si nindih ia gelgel iperentahna me.

³Ipengadi TUHAN pagi kerina si mesui ras kiniseran bangsa Israel, bage pe dahin si mberat si ipaksaken man bana.

⁴Tupung si e iuru-uru kalak Israel me raja Babil nina, “Raja si kejam enggo ndabuh! Ndigan pe lanai ia ngasup nindih kalak.

⁵Enggo ipeltepken TUHAN kuasa pemerentah-pemerentah si jahat,

⁶si nindih bangsa-bangsa alu rawana janah la erngadi-ngadi pesega-sega bangsa-bangsa si italukenna.

⁷Genduari kerina doni enggo banci teneng ras dame, janah kerina kalak rende alu meriah.

⁸Batang tusam ras cemara Libanon kerina ermeriah ukur erkiteken raja e enggo ndabuh, sabap arah kelawesenna lanai lit kalak reh nabahisa.

⁹Doni kematen enggo sikap ngalo-ngalo raja Babil. Begu kalak si nai erkuasa i doni enggo nggirgir, begu raja-raja keke i bas kursi kinirajanna nari.

¹⁰Nina begu e kerina man raja Babil, ‘Genduari kam pe enggo ka bali kotena ras kami. Kam pe enggo seri ras kami.

¹¹Mbarenda kam ihamati alu ergendang, tapi genduari kam enggo ampar i bas doni kematen enda. Inganndu medem bernga janah cabinndu gaya.’

¹²O Raja Babil, nai kam bali ras bintang erpagi-pagi si terang tapi genduari kam enggo ndabuh i langit nari! Mbarenda italukenndu bangsa-bangsa, tapi genduari kam enggo idampesken ku taneh. [36†]

¹³Mbarenda meganjang sura-surandu; inangkihindu atendu langit janah namaken kursi kinirajanndu i babo bintang-bintang si meganjang. Iakapndu banci kam kundul i das deleng si lit i Utara desken sekalak raja, i ja dibata-dibata pulung. [37†]

¹⁴Nindu, atendu inangkihindu embun-embun, gelah bali ras si Mada Kuasa.

¹⁵Kepeken genduari kam ipesusur ku doni kematen si mbagesna.”

¹⁶Kalak si ringan i bas doni kematen natap kam, janah alu ate mamang ipernehenna kam. Nungkun ia nina, “Enda kin kalakna si ngugur doni janah si mahanca kerajan-kerajan guntar?

¹⁷Enda kin kalakna si ngkernepken kuta-kuta janah si nalihken doni jadi gurun pasir? Enda kin kalakna si la pernah mulahi tabanenna, si la meresa mulih ku rumah?

¹⁸Kerina bekas raja-raja doni medem i bas kuburen si mejile,

¹⁹tapi kam la lit kuburenndu; maitndu iambekken janah ipelepas macik, itamburi salu mait tentera si mate i bas perang, ibenterken ku bas lubang si erbatu-batu, jenari iperjaki.

²⁰Erkiteken icedakenndu negerindu, janah rayatndu ibunuhindu, e maka kam la ikuburken bagi raja-raja si deban. Keluargana si jahat pe la lit si tading.

²¹Benakenlah penggelehen! Anak-anakndu mate kerina erkiteken dosa nini-ninina. La lit sekalak pe anak-anakndu e jadi raja i doni tah majekken kuta.”

²²Nina TUHAN si Mada Kuasa, “Kuperangi pagi Babil, jenari kukernepken. Kai pe la lit Kutadingken; la lit si terkelin, danak-danak pe lang. Aku, TUHAN, enggo ngataken si enda.

²³Kusalihken Babil jadi paya-paya, alingkupa ngenca tading i je. Kuradasken Babil seh kai pe la lit si tading. Aku, TUHAN si Mada Kuasa enggo ngataken si enda.”

²⁴ TUHAN si Mada Kuasa enggo ersumpah nina, “Kai si Kurencanaken la banci lang jadi. KeputusenKu la banci lang idalanken. [38†]

²⁵Kukernepken kalak Assur i bas negeringKu Israel janah Kudedehi ia kerina i das deleng-delengKu. Kutangtangi bangsangKu i bas pasangen ras baban si mberat si ipaksaken bangsa Assur man bana.

²⁶Enda me keputusenKu kerna doni enda, janah tanKu enggo Kuawatken ngukum bangsa-bangsa.”

²⁷TUHAN si Mada Kuasa enggo netapken ukurNa ngelakoken si enda; enggo iawatkenNa tanNa guna ngukum, janah ise pe la ngasup ngambatisa.

²⁸Enda me berita si imomoken i bas tahunna Raja Ahas mate. [39†]

²⁹Kalak Pilisti, ola akapndu meriah aminna gia perpalu si mekpek kam enggo penggel. Adi mate sada nipe, reh ka nge nipe si deban si rawan asa si lebe nggancihkenca. Naper me tinaruh nipe, janah anakna, e me naga si banci kabang. [40†]

³⁰Ikernepken me kam alu kelihen si mesangat seh maka lanai lit sekalak pe tading nggeluh. Tapi TUHAN pagi si mpermakani bangsaNa si musil-musil janah iberena ia nggeluh alu teneng.

³¹Nderkuhkenlah janah serkolah kam mindo penampat, o kam kerina kuta-kuta Pilisti. Gentarlah kam kerina! Abu si nggebuk bagi embun reh i Utara nari tanda kerehen tentera, tentera si la lit kalak percikcik i bassa.

³²Uga ninta ngaloisa persuruhen si reh i negeri Pilisti nari? Sikataken me man bana maka TUHAN enggo manteki Sion janah bangsaNa si lit i bas kiniseran ndat ketenengen i je.