Read Batak Karo JESAYA 15 Bible Online

JESAYA 15 - Batak Karo bible

JESAYA 15

¹Enda me berita kerna Moap. Kuta Ar ras Kir ikernepken i bas sada berngi saja, janah i bas berngi e ka me Moap iradasken. [41†]

²Kalak Dibon nangkih ku das uruk lako tangis i bas ingan sembah-sembahen. Kuta Nebo ras Medeba ingandungi kalak Moap; buk takalna ras janggutna enggo icukurna tanda atena ceda.

³Kalak si erdalan-dalan i pasar make uis guni, i tiga ras i datas tarum rumah, tangis ngandung kerina.

⁴Kalak Hesbon ras Eleale nderkuh, janah sorana nderkuh terbegi seh ku Jahas. Serdadu-serdaduna pe nggirgir, janah enggo bene ukurna.

⁵Megogo kal ateku ngenehen Moap. Rayatna enggo kiam ku kuta Soar, bage pe ku Eglat-Selisia. Janahna tangis deba nangkeng arah dalan si ku Luhit. Deba ka kiam ku Horonaim, iherna tangis belin.

⁶Lau Nimrim enggo kerah, dukut-dukut i duruna melus, lanai lit tading bulung-bulung si meratah.

⁷Jelma sienterem lawes ngepari Baluren Tusam, atena gelah banci pulah rikut ras erta-ertana.

⁸I bas kerina perbalengen Moap terbegi sora nderkuh. Sora nderkuh e terbegi ka pe i kuta Eglaim ras Beerelim.

⁹I kuta Dibon lau belin enggo megara erkiteken dareh. Janah si terkeleken asa si e tole ibahan Dibata man kalak si ringan denga i je. IsuruhNa ku je singa ngerigep kerina kalak Moap si tading denga.