Read Batak Karo JESAYA 16 Bible Online

JESAYA 16 - Batak Karo bible

JESAYA 16

¹I kuta Sela nari i gurun pasir, kalak Moap nenahken sada anak biri-biri jadi persembahen man si erkuasa i Jerusalem.

²Tertima-tima kalak Moap i tepi Lau Arnon; erdalan-dalan ia ku jah ku je desken perik-perik si igera i bas asarna nari.

³Nina man kalak Juda, “Katakenlah kai arus ibahan kami. Desken batang kayu si merabun, banci min kam ingan kami cilinggem sanga las pantek ciger. Kami enda kalak pengongsi, bunikenlah kami maka ola ise pe ndat kami.

⁴Berelah kami ringan i bas negerindu. Kawali kami i bas kalak si atena ngkernepken kami nari.” (Kalak si nindih jelma si deban lanai pagi lit, dahin ngkernepken pe ngadi, janah kalak si ngeradasken negeri e masap me.

⁵Kenca bage, jadi raja me sekalak i bas kesusuren Daud nari, janah iperentahna me bangsa e alu ate tutus ras keleng ate. Kai si benar pedas idalankenna janah tetap iperdiatekenna maka kebujuren idalanken.)

⁶Nina kalak Juda, “Enggo ibegi kami uga ganjangna ukur kalak Moap. Ieteh kami maka ia mejenggi dingen megombang, tapi cakapna si meganjang e labo lit ertina.”

⁷Tangis kalak Moap erkiteken kiniseran si ngkenai ia. Adi ingetna pangan si entabeh si semal ipanna i kuta Kir Hareset, tangis ia kerina, bene pe ukurna.

⁸Juma si ndeher Hesbon ras peken anggur Sibma enggo ceda. Nai lau anggurna rusur kal erbahanca mabuk penguasa-penguasa negeri. Nai pernah batang anggur e njoler seh ku kuta Jaser, ku Timur seh ku gurun pasir, janah ku Barat seh ku lepar Lawit Mati.

⁹Genduari kutangisi batang anggur Sibma bali ras penangisiku kuta Jaser. Iluhku mambur erkiteken Hesbon ras Eleale, sabap la lit peranin si erbahanca meriah ukur kalak.

¹⁰Lanai lit kalak si ersurak tah rende i bas peken anggur e. Lanai lit kalak si ngerik buah anggur, sora ersurak si meriah enggo ngadi.

¹¹Ndehereng aku, janah ceda ateku ngidah Moap ras Kir Heres.

¹²Enggo labuh kalak perban rusurna lawes ertoto ku deleng-deleng ingan sembah-sembahen bage pe ku rumah-rumah persembahenna, tapi si e kerina labo lit gunana man bana.

¹³E me berita si enggo leben iberitaken TUHAN kerna Moap.

¹⁴Janah genduari nina TUHAN, “Pas telu tahun nari kebayaken Moap masap me. Pendudukna piga-piga kalak nari ngenca pagi tading, janah lanai ergegeh.”