Read Batak Karo JESAYA 17 Bible Online

JESAYA 17 - Batak Karo bible

JESAYA 17

¹Nina TUHAN, “Damaskus lanai bo pagi sada kuta, tapi batu si ergun-gun nari nge ngenca. [42†]

²Kuta-kuta i Siria jadi melungun seh rasa lalap. Kuta-kuta e salih pagi jadi mbalmbal man penggagaten biri-biri ras lembu, janah la lit ise pe si nggerasa.

³Israel lanai lit pertahanenna janah Damaskus ijajah kalak. Kalak Siria si nggeluh denga mela akapna bali ras kalak Israel. Aku, TUHAN, ngatakenca si enda.”

⁴Nina TUHAN, “Reh me warina maka masap kemulian Israel janah kebayakenna isambari alu kemusilen.

⁵Israel enggo melemba desken juma i bas Baluren Repaim si enggo isabi janah iperani gandumna.

⁶Bagi batang saitun si enggo dung iperani tading sada dua i bas pucukna. Janah piga-piga nari ka i bas dahan-dahanna si arah teruh, bage me piga-piga kalak nari ngenca pagi tading i Israel. Aku, TUHAN Dibata Israel, enggo ngataken si enda.”

⁷Tupung wari si e, mulih me kalak mindo penampat kempak si nepasa e me Dibata si Badia nu Israel.

⁸Lanai pagi kalak ernalem kempak batar-batar persembahen si ibahanna alu tanna jine, tah pe erpenundalen kempak bekas ukiren tanna, e me gana-gana Dewi Asera, ras batar-batar ingan nutung kumenen.

⁹Tupung wari e, melungen kuta-kuta si erbenteng enteguh janah enggo runtuh bagi kuta-kuta si itadingken kalak Hewi ras Amori asum ia lompat iperangi kalak Israel.

¹⁰O Israel enggo ilupakenndu Dibata si mulahi kam, si engkawali kam desken deleng batu si paguh. Enggo kam nembah man dibata-dibata bangsa si deban, sabap isuanindu peken-peken si badia jadi persembahenndu man dibata-dibata e.

¹¹Tapi aminna gia sinuan-sinuanndu e turah janah erbunga, tapi labo kam peranisa. Kesusahen ras kinisuin si la terpepalem ngenca sikerajangenndu.

¹²Bangsa-bangsa si megegeh sangana guntar. Sorana desken sora lawit si ergeruhguh, desken sora erdeso galumbang si mbelin.

¹³Bangsa-bangsa reh desken galumbang si ergalun. Tapi isuriangi Dibata ia, e maka minter ndauh ia surut; bagi abu iembusken i reben-reben, ntah pe bagi nggala iembusken angin kalinsungsung.

¹⁴Karaben mbiar kerina kalak ibahanna, tapi erpagi-pagi enggo masap ia. Bage me jadina kalak si ngerampasi negerinta.