Read Batak Karo JESAYA 19 Bible Online

JESAYA 19 - Batak Karo bible

JESAYA 19

¹Enda me berita kerna Mesir. Pedas me TUHAN reh ku Mesir alu ngersak embun. Berhala-berhala Mesir nggirgir i lebe-lebeNa, janah kalak Mesir bene ukurna. [44†]

²Nina TUHAN, “Kubahan me perang sapih-sapih kalak Mesir; seninana ngelawan seninana, anak kuta ngelawan kalak si sekutan ras ia. Kuta-kuta erperang ras kuta si deban, janah raja-raja ngelawan raja-raja guna ndatken kuasa.

³Sura-sura kalak Mesir la surung Kubahan, janah Kubeneken ukurna. E maka ipindona penampat man berhala-berhalana, jenari lawes ia nungkuni guru-guru si baso, ipindona pedah man begu-begu kalak si enggo mate.

⁴Kuendesken Mesir ku teruh kuasa sekalak raja si merentah ia alu kejam.” Enda kata i bas TUHAN si Mada Kuasa nari.

⁵Lau Nil merembo, janah kedungenna kerah me.

⁶Baluren lau belin e mbau tupung launa mulai lawes kukerahna. Batang rengo ras rih si lit i je melus,

⁷janah kerina benih sinuan-sinuan si iamburken i gedang-gedang tepi Lau Nil kerah jenari kabang iembusken angin.

⁸Kasa kalak si pendahinna nangkap nurung i Lau Nil la banci lang kelsehen janah ngandung, kawilna ras jalana lanai lit gunana.

⁹Kalak si erbahan kain lenen erndele ate;

¹⁰tukang tenun ras tukang-tukang si pentar, erceda ate janah tumpat ukurna.

¹¹Kerina peminpin Kuta Soan bodoh kal tuhu-tuhu! Kalak si pentar kal i Mesir mereken pedah si sea-sea! Uga maka pang kal ia ngatakenca man raja, “Kami me kesusuren kalak pentar, kesusuren raja-raja si adi?”

¹²Raja Mesir, i ja penasihatndu si cerdik e? Banci jadi ngasup ia nuriken kai sura-sura TUHAN si Mada Kuasa nandangi Mesir.

¹³Kerina peminpin-peminpin kuta Soan ras Mempis bodoh tuhu-tuhu! Arusna ia me si negu-negu bangsa e, tapi kepeken bekas pemabaina maka kalak papak.

¹⁴TUHAN mahanca maka peminpin-peminpin e mereken nasihat si la erturi-turin. Erkiteken si e salah kerina kai si ilakoken Mesir, desken kalak mabuk, mbewat-mbewat perdalanna janah celus i bas utahna jine.

¹⁵Lanai lit kalak ngasup nampati Mesir subuk kalak bayak tah kalak musil, kalak si mehaga tah si la itandai.

¹⁶Seh me paksana kalak Mesir percikcik ras permela bali ras diberu. Nggirgir ia ban biarna tupung idahna TUHAN si Mada Kuasa enggo ngawatken tanNa lako ngukum.

¹⁷Kalak Mesir mbiar ngenehen Juda tep-tep kali adi isingetken kerna putusen si enggo itentuken TUHAN si Mada Kuasa man bana.

¹⁸Adi paksa si e enggo seh pake me pagi cakap Heber i bas lima kuta Mesir. Kalak si ringan i je melasken sumpahna i bas gelar TUHAN si Mada Kuasa. Sada i bas kuta e pagi igelari “Kuta Matawari”.

¹⁹Adi paksa si e enggo seh, lit pagi sada batar-batar ingan persembahen man TUHAN i negeri Mesir, janah sada tugu i perbalengen Mesir si ipersembahken man TUHAN.

²⁰E me pagi jadi tanda kesaksin maka TUHAN si Mada Kuasa ringan i negeri Mesir. Adi kalak si i je itindihna, jenari erlebuh ia kempak TUHAN mindo penampat, isuruh TUHAN sekalak jelma mulahi bangsa e.

²¹Ipetangkas TUHAN me diriNa man bangsa Mesir, e maka itandai ras isembah bangsa e me Ia, jenari ibahanna me persembahen gelehen ras persembahen si deban. Erpadan me ia man TUHAN alu sumpah, janah kai si ipadankenna e idalankenna.

²²Iukum TUHAN me kalak Mesir, tapi kenca bage ipepalemNa ka. Mulihken pagi bangsa e kempak TUHAN e maka ibegiken TUHAN pertotonna jenari ipepalemNa ka.

²³Adi paksa si e enggo seh, lit pagi pasar mbelang i Mesir nari seh ku Assur. Kalak si ringan i negeri si dua e mentas-mentas ku jah ku je arah pasar e, janah negeri si dua e ersembah ras-ras.

²⁴Tupung si e, Israel seri pagi ergana ras Mesir ras Assur, janah negeri si telu e mereken kesangapen man kerina doni enda.

²⁵Ipasu-pasu TUHAN si Mada Kuasa negeri si telu e, niNa, “Kupasu-pasu me kam o Mesir, bangsangKu; Assur tinepangKu, ras Israel bangsa pilihenKu.”