Read Batak Karo JESAYA 2 Bible Online

JESAYA 2 - Batak Karo bible

JESAYA 2

¹Enda me kata si ibereken Dibata man Jesaya anak Amos kerna Juda ras Jerusalem.

²I bas wari-wari si arah pudi pagin deleng-deleng ingan Rumah Pertoton e pajek, e me pagi deleng si meganjangna kal, ganjangen asa kerina uruk-uruk. Bangsa-bangsa reh erdemuyung ku je.

³Janah nina bangsa-bangsa e, “Nangkenglah kita ku Deleng TUHAN ku Rumah Pertoton Dibata Israel. Kai ateNa si bahan iajarkenNa man banta; arah dalan si enggo ipilihNa erdalan me kita. Sabap pengajaren TUHAN i Jerusalem nari kap rehna, i Sion nari ngerana Ia.”

⁴Perjengilen i bas bangsa-bangsa idungiNa, e maka itepa kalak me pedangna jadi gigi tenggala janah lembing jadi sabi-sabi ibahanna. Lanai ndigan pe bangsa-bangsa lawes erperang, lanai ndigan pe ia ersikap-sikap ertempur. [4†]

⁵E maka kesusuren kerina Jakup, marilah erdalan kita, i bas terang si ibereken TUHAN man banta.

⁶O Dibata, enggo itadingkenNdu bangsaNdu, kesusuren Jakup. Negeri enda enggo dem alu kalak si make kinigurun si asalna i Timur ras i Pilisti nari. Bangsa enda enggo ngikutken adat bangsa si deban.

⁷Negerina dem alu pirak ras emas, janah erta-ertana la ersibar buena. Negerina dem alu kuda, janah gereta perangna lanai terbeligai.

⁸Negerina dem alu berhala-berhala, janah isembahna gana-gana bekas tanna erbahan.

⁹Erkiteken si e tiap kalak la banci la ipeteruk gelah juru akapna. Ola alemi salahna o TUHAN!

¹⁰Cebuni me ia pagi i bas guha-guha si lit i bas uruk-uruk batu, tah lubang man inganna cebuni i bas taneh, lako nilahken pernembeh ate TUHAN ras sinalsal kemulianNa. [5†]

¹¹Reh me warina maka ukur manusia si meganjang ipeteruk, janah kinigombangenna imasapken. Kenca bage TUHAN saja ngenca ipemuliaken.

¹²I bas wari e, TUHAN si Mada Kuasa la banci lang ndabuhken kerina kalak si erkuasa, bage pe kalak si rukur meganjang ras megombang.

¹³Batang kayu cemara si meganjang i Libanon bage pe kerina batang kayu si mbelin i Basan ikernepkenNa me.

¹⁴IpekenditNa kerina deleng-deleng ras uruk meganjang,

¹⁵bage pe kerina menara si meganjang ras kerina tembok benteng.

¹⁶Kapal-kapal si galang ras mejile pe igedapkenNa.

¹⁷[17-18] Ukur manusia si meganjang ipeteruk, janah kinigombangen manusia imasapken. Gana-gana masap kerina, janah i bas wari e TUHAN saja ngenca ipemuliaken.

¹⁹Manusia cebuni i bas guha-guha si lit i bas uruk-uruk batu, tah pe lubang man inganna cebuni i bas taneh lako nilahken pernembeh ate TUHAN ras sinalsal kemulianNa, asum Ia reh ngugur doni enda.

²⁰Adi wari e enggo seh, iambekken kalak me gana-gana emas ras pirak si enggo ibahanna, itadingkenna man sikerajangen menci ras arip.

²¹Asum TUHAN reh ngugur doni enda, cebuni me manusia i bas lingling ras guha-guha si lit i bas uruk-uruk batu lako nilahken pernembeh ate TUHAN ras sinalsal kemulianNa.

²²E maka olanai ernalem man manusia si ermasap-masap, sabap kai kin ergana ia?