Read Batak Karo JESAYA 21 Bible Online

JESAYA 21 - Batak Karo bible

JESAYA 21

¹Enda me berita kerna negeri Babilon. Desken angin kalinsungsung si erpiu-piu arah tengah gurun pasir, bage me rehna kecedan arah negeri si mehantu nari.

²Enggo kuidah sada pengenehenen si mejin i ja penghianat ihianati janah kalak si ngkernepken ikernepken kalak si deban. O serdadu Elam, seranglah! O tentera Media kepunglah kuta-kuta e! Ipengadi TUHAN me kerina kiniseran si ibahan Babil.

³Kai si kuidah ras si kubegi arah pengenehenen e, mahanca aku mbiar janah mesui kuakap, bali suina ras si inanami diberu si nandangi mupus.

⁴Melimber kuakap janah dagingku nggirgir perban biarna. Kurang pedas kuakap wari gelap, tapi kenca gelap tambah kebiarenku.

⁵Ibas pengenehenen e kuidah sada kerja man-man enggo sikap, amak enggo kimbang man ingan kundul temue. Man ras minem ia kerina. Tapi rempet terbegi sora perentah nina, “O perwira-perwira! Sikapken ampang-ampangndu!”

⁶Kenca bage nina TUHAN man bangku, “Suruhlah kalak erjaga-jaga i bas ingan penjagan, janah kataken man bana gelah ilaporkenna kai si idahna.

⁷Adi idahna kalak reh ngersak kuda erbaris dua, bage pe kalak si ngersak kelede ras unta, arus maka iperdiatekenna kal kalak e alu megermet.”

⁸Kenca bage erlebuh kalak si erjaga e nina, “O TUHAN, aku enggo tedis erjaga i bas inganku suari ras berngi.”

⁹Nehenlah, enda me ia reh; kalak si ngersak kuda erbaris dua. Kalak si erjaga ndai nehken berita nina, “Babil enggo ndabuh! Kerina gana-gana si isembahna enggo ampar janah perper i babo taneh.” [45†]

¹⁰O bangsangKu Israel, kam enggo ierik desken gandum, tapi genduari kumomoken man bandu berita si mehuli si kubegi i bas TUHAN si Mada Kuasa nari, Dibata nu Israel.

¹¹Enda me berita kerna Edom. Lit kalak erlebuh man bangku i Edom nari nina, “O kalak si erjaga, uga nari dekahna berngi enda? Kasa kai nari dekahna maka siang wari?”

¹²Erjabap aku ningku, “Nandangi siang me wari, tapi reh denga ka nge berngi. Adi nungkun denga atendu, rehlah kam sekali nari nungkunsa.”

¹³Enda me berita kerna Arab. O kam kalak Dedan, si erkemah i negeri Arab si la erdukut.

¹⁴Berekenlah lau man kalak si muas si reh ndahi kam. O kam kalak si ringan i negeri Tema, berekenlah nakan man kalak si mengongsi ku negerindu.

¹⁵Sabap nterem kalak kiam gelah pulah i bas pedang si nampul ia atena, i bas panah si enggo irentangken man bana, ras i bas kerina kebiaren perang nari.

¹⁶Kenca bage nina TUHAN man bangku, “Pas sada tahun nari kehagan suku-suku Kedar masap me.

¹⁷Kalak si beluh manah e me suku Kedar si mbisa, tapi piga-piga nari ngenca pagi tading.” Enda me kata i bas TUHAN, Dibata nu Israel.