Read Batak Karo JESAYA 22 Bible Online

JESAYA 22 - Batak Karo bible

JESAYA 22

¹Enda me berita kerna Baluren Pengenehenen. Engkai maka kerina kam si ringan i bas kuta enda nangkih ku tarum rumahndu erpesta-pesta?

²Labo patut kam tawa-tawa dingen ersurak-surak alu meriah. Sabap tenterandu si mate i bas perang labo mate erkiteken ngelawan musuh.

³Kerina puanglimandu enggo kiamen jenari itangkap ope denga ipanahkenna anak panahna. Kerina si mbisandu itaban aminna pe ia enggo lompat ku ingan si ndauh.

⁴E maka genduari pelepaslah aku sisada rate ceda nangisi kerina bangsangku si enggo mate. Ola cubakenndu ngapuli aku.

⁵Sabap si tuhuna, TUHAN si Mada Kuasa si Erdolat enggo netapken paksa enda sada paksa ketalun, keguntaren ras keguluten i Baluren Pengenehenen. Benteng kutanta enggo iruntuhken, janah sora nderkuh enggo terbegi erloling i uruk-uruk.

⁶Tentera i negeri Elam nari reh ngersak kuda ras make panah. Tentera i negeri Kir nari enggo nikapken ampang-ampangna.

⁷Baluren Juda si mehumur enggo dem alu gereta perang; tentera si ngersak kuda tedis i lebe-lebe gerbang Jerusalem.

⁸Kerina pertahanen Juda enggo runtuh. Tupung kejadin e, ipedaratndu me senjata i bas gudang senjata nari.

⁹[9-10] Iidahndu maka i bas piga-piga ingan, tembok kuta Jerusalem perlu ipekena. Ipepayondu kerina rumah-rumah i Jerusalem, jenari iruntuhkenndu deba-deba lako muat batuna guna pekena tembok kuta e. Guna nimpan lau,

¹¹ibahanndu sada tambak i bas kuta e gelah banci itambakna lau si maler i bas kolam si ndekah nari. Tapi la iperdiatekenndu TUHAN, si enggo nuraken si enda nai-nai nari, janah Ia mahanca si e jadi kerina.

¹²Tupung si e TUHAN si Mada Kuasa si Erdolat nuruh kam gelah tangis dingen erceda ate, ncukur buk takalndu ras make uis guni.

¹³Tapi kepeken tawa-tawa ras erpesta-pesta nge kam. Igelehndu biri-biri ras lembu man panganndu, janah minemi lau anggur kam. Nindu ngerana, “Marilah kita man ras minem, sabap pagi mate nge kita.” [46†]

¹⁴ TUHAN si Mada Kuasa si Erdolat ngatakenca man bangku niNa, “Kidekah geluhna, kejahaten enda la teralemi i bas ia nari.” Bagenda me nina TUHAN si Mada Kuasa si Erdolat.

¹⁵ TUHAN si Mada Kuasa si Erdolat nuruh aku njumpai Sepna, pengulu si ngaturken isi jabu raja, lako ngataken man bana bagenda,

¹⁶“Ise kin akapndu kam? Kai kin hakndu nukak kuburen man dirindu jine i bas lingling batu?

¹⁷Banci jadi kam kalak si mehaga, tapi itangkap TUHAN kam jenari ibenterkenNa ku ingan si ndauh.

¹⁸ItangkapNa kam desken bola jenari ibenterkenNa ku negeri si ndauh terbelinen. I je me kam mate i duru gereta perang si iagahkenndu e. Sabap kam kap erbahanca maka mela iakap isi jabu tuanndu.

¹⁹Iagui TUHAN kam i bas jabatenndu nari jenari idabuhkenNa pangkatndu si meganjang e.”

²⁰Nina TUHAN man Sepna, “Adi si enda jadi, kudilo pagi suruh-suruhenKu Eliakim anak Hilkia.

²¹Kupakeken jubah ras gendit tanda jabatenndu man bana jenari Kubereken bana kerina kuasa si lit i bas kam. Ia desken sekalak bapa nandangi kalak Jerusalem ras Juda.

²²Ia me si mbelinna kuasana i teruh raja kesusuren Daud. Ia me si njemak kunci kerajan; kai si italangina, la banci ise pe nutupsa, janah kai si itutupna, la banci ise pe nalangisa. [47†]

²³Kupetetap ia alu paguh i bas inganna desken paku si ipakuken ku bas dingding. Kerina keluargana ihamati kalak erkite-kiteken ia.

²⁴Tapi kerina kade-kadena ras kalak si man tanggungenna jadi baban si mberat man bana. Kerina kalak si ngarapken geluh man bana desken kudin ras belanga si sangkut i bas sada paku.

²⁵Kenca si enda jadi, paku si nteguh ndai jadi longgar, jenari ndabuh. Janah e me kedungenna nandangi kerina kalak si erpengarapen ku je.” Bagenda me nina TUHAN.