Read Batak Karo JESAYA 24 Bible Online

JESAYA 24 - Batak Karo bible

JESAYA 24

¹Nehen me, iradasken TUHAN me doni enda, janah ibahanNa jadi melungen. Tempas taneh jadi mejin ibahanNa janah kalak si ngiani doni ikerapkenNa kerina.

²Kerina kalak ngenanami nasip si seri: imam-imam ras jelma si nterem, budak-budak ras tuan-tuan si nukur ras si ndayaken, si pepinjamken ras si minjam, kalak bayak ras kalak musil.

³Doni ipelume janah melinang kerina. TUHAN kap si ngatakenca, e maka la banci lang jadi bage.

⁴Doni kerah janah melus; kerina doni kote; subuk doni bage pe langit penakiten kerina.

⁵Manusia enggo ngeliami doni erkiteken ilawanna undang-undang Dibata janah ilanggarna perpadanen si arusna tahan rasa lalap.

⁶Erkiteken si e isumpahi Dibata doni enda, janah manusia si ngianisa iukum sue ras perbahanenna. IcilukNa manusia, janah piga-piga nari ngenca tading.

⁷Batang anggur jadi melus, janah anggur pe enggo mesera muatsa. Kasa kai kalak si gelgel e meriah akapna, genduari erndele ate.

⁸Sora kulcapi ras gendang si gelgel e meriah, genduari enggo ngadi.

⁹Lanai lit kalak si rende-rende janahna minem-minem lau anggur; kalak si nginem lau anggur pagit akapna.

¹⁰Kuta guntar; kalak si i bas rumah ngeruki bana sabap mbiar kerina.

¹¹I bas pasar-pasar jelma si nterem serko-serko erkiteken lau anggur enggo keri. Kesenangen enggo masap seh rasa lalap; keriahen enggo iambekken i bas doni nari.

¹²Kuta enggo radas, janah pintu gerbangna enggo runtuh.

¹³Bagenda me si nandangi jadi i bas kerina bangsa i belang-belang doni enda. Kejadin e desken pendungi paksa rani; buah saitun enggo keri naktak erkiteken iugur, janah buah anggur si pengkeri-kerinna enggo iputikken i bas batangna nari.

¹⁴Kalak si terkelin rende meriah, kalak si ringan i Barat nuriken uga belinna TUHAN,

¹⁵janah kalak si ringan i Timur muji Ia. Kalak si ringan i gedang-gedang tepi lawit ipujina TUHAN, Dibata nu Israel.

¹⁶I bas kerina tampuk doni nari terbegi pagi ende-enden pujin man Israel, bangsa si bujur e. Tapi lanai lit pengarapen man bangku! Bene me aku! Kalak penipu tetap nipu, janah tetap reh kelekna ia nipu.

¹⁷Begikenlah o kalak si ngiani doni kebiaren, lubang si mbages, ras siding sangana nimai kam.

¹⁸Ise si lompat nilahken kebiaren, ndabuh ku bas lubang si mbages, janah ise ndarat i bas lubang si mbages e nari kena siding me. Udan meder ndabuh i langit nari, e maka palas doni mugur-ugur.

¹⁹Doni jadi regat, beka janah getem.

²⁰Doni mbewat-mbewat desken kalak mabuk janah mundu-undu desken sapo-sapo iembus angin kaba-kaba. Doni jongkang itindih dosana si mberat; ampar janah ndigan pe lanai keke.

²¹Reh me paksana maka iukum TUHAN kerina kuasa-kuasa si lit i das langit bage pe pemerentah-pemerentah si i doni.

²²Ipepulung Dibata me raja-raja i bas sada lubang desken kalak tabanen. ItutupNa i bas penjara seh paksana ia iukum.

²³Bulan jadi gelap, janah matawari pe lanai ersinalsal, sabap TUHAN si Mada kuasa me jadi raja. Ia raja i Jerusalem i das Deleng Sion, janah peminpin-peminpin bangsa e ngidah kemulian TUHAN.