Read Batak Karo JESAYA 26 Bible Online

JESAYA 26 - Batak Karo bible

JESAYA 26

¹Reh me paksana maka bangsa e ngendeken ende-enden enda i negeri Juda: Nteguh kal kutanta enda; Dibata jine ngkawali tembok-tembokna!

²Talangilah pintu gerbang kuta suruh bengket bangsa si setia, bangsa si tutus ngelakoken sura-sura Dibata.

³O TUHAN, iberekenNdu kap dame si tuhu-tuhu man kalak si tetap ukurna, dingen si ernalem man baNdu.

⁴Ernalemlah man TUHAN seh rasa lalap, tentu ikawaliNa kita tetap.

⁵Enggo ipeterukNa kalak si rukur meganjang; icedakenNa kuta si nteguh inganna tading janah iperperkenNa tembokNa si meganjang.

⁶Kalak si nai itindas genduari erdalan i babona, iperjakina alu nahena.

⁷O TUHAN, dalan kalak benar mesai ibahanNdu; dalan si man bentasenna kendit tuhu-tuhu.

⁸PeratenNdu ikutken kami, Kam ngenca pengarapen kami. Kam ngenca sura-sura pusuh kami.

⁹I bas berngi si mbages tedeh ateku Kam, alu ate tutus tendingku tetap terdaram-daram. Adi irungguiNdu pagi doni ras manusia si ngianisa, kebujuren si tuhu-tuhu, i je me pagi maka iantusina.

¹⁰Aminna mehuli pe perbahanenNdu man kalak jahat, la pernah ia erlajar ngelakoken si patut. I bas negeri bangsa si bujur enda pe jahat perbahanenna; kemulianNdu si mbelin la sitik pe iperdiatekenna.

¹¹O TUHAN, Kam enggo sikap ngukum imbangNdu, tapi si e la ietehna. Dage cidahkenlah keleng ateNdu man bangsaNdu, maka mela iakap imbangNdu ngidahsa. Bahanlah maka mesui ate imbangNdu, ngenanami ukumen si isikapkenNdu man bana. [52†]

¹²O TUHAN, iberekenNdu me kesenangen man kami; si nasa ulih pendahin kami, bekas pendahinndu kap kerina.

¹³O TUHAN Dibata kami, kami enggo iperentah tuan-tuan si deban, tapi kam kap ngenca TUHAN kami.

¹⁴Genduari enggo mate ia kerina, lanai ndigan pe nggeluh ka. Beguna pe lanai keke lalap, sabap enggo iukumNdu ia seh kernep. Lanai ise pe ngingetsa seh rasa lalap.

¹⁵O TUHAN, bangsaNdu ertambah-tambah ibahanNdu teremna, ku kerina dampar ipebelangNdu negerina, erkiteken si e Kam tuhu-tuhu ipehaga.

¹⁶ TUHAN, tupung iukumNdu bangsaNdu, alu kelsehen ertoto ia baNdu.

¹⁷ TUHAN, ibahanNdu maka kami serko kerina, bali ras diberu si sangana mupus, nderkuh ban suina.

¹⁸Mberat daging kami, janah mesui kal iakap kami, tapi kepeken kai pe la lit ipupus kami. Kemenangen man negeri kami la dat kami, janah jelmana pe labo tambah beliganna.

¹⁹Bangsa kami si enggo mate nggeluh ka mulihi, maitna keke ka mulihi. Kerina kalak si medem i bas kuburenna, keke pagi, jenari rende ban riahna. Desken embun si erndilap ngelitapi taneh kerah-kerah, bage me TUHAN pegeluh kalak si enggo mate.

²⁰O bangsangKu, bengketlah ku rumahndu, janah erukilah man bandu. Cebuni kam lebe kentisik seh pernembeh ate TUHAN enggo ngadi.

²¹Reh me TUHAN i bas inganNa nari i Surga lako ngukum manusia i doni erkiteken dosa-dosana. Pembunuhen si ilakoken manusia alu erbuni-buni ipetangkas janah taneh pe lanai muniken kalak si enggo terbunuh.