Read Batak Karo JESAYA 28 Bible Online

JESAYA 28 - Batak Karo bible

JESAYA 28

¹Cilaka me kerajan Israel; kinijilenna enggo melus desken mahkota rudang-rudang i bas takal peminpin-peminpin si sangana mabuk. Takalna merim erkiteken minak wangi, tapi ampar bagi kalak mate erkiteken mabuk.

²Nehenlah, isuruh TUHAN sekalak si mbisa merangi kalak e. Ia reh desken udan baho rikut ras angin si ersiu-siu, desken udan meder erdeso, desken banjir mbelin si ergalun ngombakken si nasa lit, janah namburi kerina negeri.

³Mahkota si imegahken peminpin-peminpin si pemabuk e iperjaki me.

⁴Rudang-rudang kemulianna si enggo melus e, nandangi lesap desken buah ara si pemena i bas musimna, minter iputikken jenari ipan kenca enggo tasak.

⁵Reh me warina maka TUHAN si Mada Kuasa desken mahkota rudang-rudang si mejile nandangi bangsaNa si tading denga.

⁶IberekenNa perukuren si bujur man kalak si dahinna ngerunggui, janah kinimbisanNa man kalak si ertugas engkawali pintu-pintu gerbang kuta i bas serangen kalak nari.

⁷Subuk nabi-nabi bage pe imam-imam enggo mabuk kerina seh maka perdalanna pe mbewat-mbewat. Mbuesa minem anggur ras samsu e maka jurembat janah melimber iakapna. Erkiteken si e nabi-nabi lanai ngangka pengenehenen si ibereken Dibata man bana, janah imam-imam pe lanai ngasup erbahan keputusen kerna perkara-perkara si ipeseh man bana.

⁸Mejana enggo serser kena utahna, janah lanai lit sitik pe si la meluat.

⁹Jungut-jungut kalak e kerna aku nina, “Man ise kin akapna ia ngajar e? Ise kin merluken pengajarenna? Danak-danak si kitik si mbaru ngadi minem i bas nandena nge ngenca perlu pengajaren ah.

¹⁰Iajarina ka atena kita surat, kata ku kata, kalimat ku kalimat, bagi danak-danak si kitik.”

¹¹Adi la kam nggit megiken katangku, ugapa pe isuruh Dibata nge bangsa si deban ngajar kam alu cakap si asing man bandu. [54†]

¹²TUHAN erdilo, janah iberekenna ateNa pengadi-ngadin ras pengapul man bandu kerina, tapi la kam nggit megikenca.

¹³Em sabapna maka iajarken TUHAN ateNa man bandu surat, kata ku kata, kalimat ku kalimat. Jenari tertuktuk me kam, tep-tep kali kam njingkang. Terdareh me kam kena siding, jenari ibaba jadi tabanen.

¹⁴Genduari begikenlah o penguasa-penguasa si megombang, si merentah bangsa enda i Jerusalem.

¹⁵Megah akapndu sabap enggo ibahanndu perdamen ras kematen janah enggo ibahanndu perpadanen ras doni kematen. Tek kal kam maka adi reh cilaka labo kam kena, sabap iakapndu tipu banci jadi penalemenndu janah pertakin si ibahanndu sekawalndu.

¹⁶Tapi enda me genduari kata i bas TUHAN si Erdolat nari nina, “Kutamaken i Sion sada batu palas si paguh dingen nteguh, sada batu suki si meherga i ja lit tersurat nina, ‘Kiniteken si enteguh e me kap saber ate.’ [55†]

¹⁷Si jadi tali timbangen i bas palas e, e me kap keadilen, janah tali sipatna e me kebujuren.” Kata guak si jadi penalemenndu e keri me iombakken udan baho, janah ketenengenndu ikernepken lau belin.

¹⁸Perpadanen si ibahanndu ras kematen, isasapken janah persetujun si ibahanndu ras doni kematen ipeltepken. Erkiteken si e, adi reh cilaka ikenaina me kam.

¹⁹Rulih-ulih kam itendengna tep-tep erpagi-pagi, suari ras berngi. Tep-tep kali reh berita i bas Dibata nari, tep-tep kali ka reh kebiaren man bandu!

²⁰E maka kam pagi desken kalak medem si tersinget i bas kuan-kuan nina: Ipegesteng ate nahe, gendeksa ingan medem; icabini ate daging kitiksa uis man cabin.

²¹Sabap keke me TUHAN erperang bagi perbahanenna i das Deleng Perasim ras i Baluren Gibeon, guna nehken sura-suraNa -- aminna gandil gia akap manusia perbahanenNa e. IdungiNa me dahinNa, e me dahinNa si mbelin dingen mejin. [56†] [57†]

²²Ola kam tawa nguru-nguru pertenget si kubahan enda. Adi mekarus kam, reh tahatna me akapndu pulah, sabap enggo kubegi keputusen TUHAN si Mada Kuasa guna ngkernepken negeri enda kerina.

²³Begikenlah katangku, perdiatekenlah kai si kuturiken man bandu.

²⁴Labo lit perjuma si lalap nenggala ras ngeroka jumana.

²⁵Tapi adi enggo mesai jumana, tentu iamburkenna benih sinuan-sinuan, umpamana jera ras lenga. Ierdangkenna gandum ras dawa erteran-teran janah arah duru isuanna jaung.

²⁶Ietehna uga ndahiken dahinna, sabap enggo iajari Dibata ia.

²⁷Labo pernah ipakena palu-palu si mberat lako muat buah jera ntah buah lenga si enggo iperani; tapi ipakena ciken si menahang bagi payona.

²⁸Sanga ngerik gandum pe labo lalap igegehina ngeriksa seh getem buahna. Ietehna uga cara pedalan gereta arah babo gandum e gelah ola sempat ceda buahna.

²⁹Kerina kepentaren enda rehna i bas TUHAN si Mada Kuasa nari. Kerina rencana Dibata dem alu kepentaren, e maka tetap nge seh rencanaNa e.