Read Batak Karo JESAYA 29 Bible Online

JESAYA 29 - Batak Karo bible

JESAYA 29

¹Cilaka me kuta Jerusalem, kuta ingan batar-batar persembahen man Dibata! Cilaka me kuta ingan Daud erkemah! Pelepaslah tahun-tahun mentas alu pesta-pesta ras perayan-perayanna.

²Jenari kuta si igelari “Batar-batar persembahen man Dibata” e la banci lang icilakaken Dibata. Tangis ras ngandung me kalak si i je, janah kerina kuta e itamburi dareh bagi sada batar-batar.

³Iserang TUHAN me kuta e, jenari ikepungna.

⁴Tupung e, Jerusalem desken begu si ndehereng i teruh taneh, desken sora kusik-kusik si sedak i teruh abu taneh nari.

⁵Tapi bangsa si merawa si nerang kam e mistak me kerina desken abu tah segal iembusken angin. Rempet, alu la iarap,

⁶reh TUHAN si Mada Kuasa mulahi kam alu lenggur ras linur si mehantu. IsuruhNa angin kalinsungsung ras api si gurlah;

⁷jenari kerina tentera bangsa-bangsa si nerang kuta Jerusalem e me “Batar-batar Dibata” e, kerina senjata ras perkakasna la lit sada pe si tading-tading kerina lesap desken nipi, desken pengenehenen i tengah berngi.

⁸Kerina bangsa-bangsa si pulung nerang Jerusalem desken sekalak jelma si kelihen ernipi man, tapi tupung ia medak melihe beltekna; tah pe desken sekalak jelma si menam mate perban muasna ernipi ia minem, tapi tupung ia medak kerah kalah-kalahna.

⁹Pemotu-motulah bandu maka kam motu lalap. Pepentang-pentanglah bandu maka kam pentang terus. Mabuklah kam, tapi la erkiteken minem anggur! Mbewat-mbewatlah kam erdalan, tapi labo erkiteken minem samsu.

¹⁰TUHAN kap erbahanca maka madat matandu, jenari badeh pertunduhndu. Nabi-nabi kap arusna jadi mata man jelma si nterem, tapi enggo itutupi Dibata matana. [58†]

¹¹Erti pengenehenen kerina enggo terbuni man bandu, desken pustaka si enggo itutup janah isegel. Adi iberekenndu pustaka e man kalak si beluh ngoge gelah iogekenna man bandu, erjabap ia nina, “La banci ku oge, sabap pustaka e itutup dingen isegel.”

¹²Adi iberekenndu man kalak si la beluh ngoge gelah iogena man bandu, erjabap ia nina, “La aku beluh ngogesa.”

¹³Nina TUHAN, “Bangsa enda ngatakenca maka isembahna Aku. Tapi perkatanna e la lit ertina, sabap pusuhna ndauh i bas Aku nari. Agamana la lit si deban seakatan peraturen-peraturen ras adat manusia si iapalna. [59†]

¹⁴Erkiteken si e, sengget me Kubahan bangsa enda alu perbahanen si mejin si la iarap, seh maka kalak pentar salih jadi bodoh, janah kerina kecerdikenna lanai erguna.” [60†]

¹⁵Cilaka me kalak adi icubakenna muniken rencana i bas TUHAN nari. Alu erbuni-buni idalankenna bagi sura-surana janah iakapna ise pe la ngidahsa tah metehsa perbahanenna e,

¹⁶kerina ibalikkenna. Apai kin ergan, pande kudin tah taneh dah? Banci kin bahan-bahanen kalak ngerana man bana nina, “Labo kam si mahan aku?” Tah pe banci kin ikataken bahan-bahanen e man bana, “Labo kam beluh mahan kai pe?” [61†]

¹⁷Lit kuan-kuan ngatakenca nina, “Lanai ndekahsa salih me kerangen tua jadi taneh perjuman, taneh perjuman salih jadi kerangen tua.”

¹⁸Adi enggo seh pagi si e, kalak pasek banci megi kata pustaka, janah kalak pentang si nggeluh i bas kegelapen, medak matana janah erpengidah.

¹⁹Kalak musil ras si medungu ndatken keriahen ras kemalemen ate i bas TUHAN, Dibata si Badia nu Israel.

²⁰I jem pagi pengkeri-kerin kalak si nindes kalak si deban dingen si megombang man Dibata. Ikernepken Dibata pagi kerina kalak si jahat ukurna,

²¹kerina kalak si melasken kata la tuhu, kalak si ngambati ukumen man kalak jahat, janah kalak si erbahan kesaksin si la tuhu gelah kalak bujur ola ndatken keadilen.

²²E maka genduari nina TUHAN, Dibata nu Israel, si mulahi Abraham i bas kepiceten nari, “O bangsangKu, lanai pagi kam igombangi kalak janah ayondu pe lanai sambar perban mela akapndu.

²³Adi idahndu pagi danak-danak si Kubereken man bandu, i je pagi iakuindu maka Aku kap Dibata si Badia nu Israel. E maka ipehagandu Aku, janah mbiar kam bangKu.

²⁴Kalak bodoh erlajar pagi gelah ngerti, janah kalak si rusur jungut-jungut meriah akapna iajarken.”