Read Batak Karo JESAYA 3 Bible Online

JESAYA 3 - Batak Karo bible

JESAYA 3

¹Genduari seh paksana TUHAN, e me TUHAN si Mada Kuasa, ngangkut kerina keperlun geluh i Jerusalem ras Juda nari. Iangkutna me i jenari lau ras pangan; janah kerina penalemenna:

²pahlawan-pahlawan ras tentera-tenterana, hakim-hakim ras nabi-nabi, kalak si beluh ngoge retak tan ras pejabat-pejabat negeri,

³puanglima-puanglima ras peminpin-peminpin masyarakat, perpolitik, guru mbelin ras kerina kalak si make kinigurun guna engkuasai kejadin-kejadin.

⁴Bangsa e ipelepas TUHAN iperentah danak-danak.

⁵Sekalak-sekalak nipu temanna. Kalak si nguda lanai mehamat man orang tuana, janah kalak si la meherga megombang man kalak si ermulia.

⁶Seh me paksana kalak si sada terpuk milih sekalak i bas seninana jadi peminpin janah nina man bana, “Kam lit denga uisndu; e maka kamlah jadi peminpin kami i bas paksa gulut enda.”

⁷Tapi erjabap ia nina, “Ola aku! La aku ngasup nampati kam. Aku pe labo lit nakanku ras uisku. E maka ola aku angkatndu jadi peminpinndu!”

⁸Jerusalem enggo ndabuh! Juda enggo runtuh! Sabap kerina kata ras perbahanenna ngelawan TUHAN; alu la biar-biaren ilawanna Dibata.

⁹Arah ayona pe teridah maka ia enggo ersalah. Alu terang-terangen erdosa ia bagi kalak Sodom. E maka bene me ia, bene erkiteken perbahanenna jine.

¹⁰Kalak bujur la banci lang malem atena, janah si mehuli reh man bana. Bekas pendahinna si mehuli banci inanamina.

¹¹Tapi kalak jahat la banci lang bene, kejahaten si ibahanna man kalak, genduari ibahan ka man bana.

¹²Kalak si pebungaken duit nindih bangsangKu, bangsangKu ikuasai perutangenna. O bangsangKu peminpin-peminpinndu mabai kam papak, e maka lanai ietehndu dalan apai si man dalanenndu.

¹³Iaduken TUHAN me bangsaNa; irungguiNa me bangsa e.

¹⁴Kerina peminpin bangsa e iadukenNa, janah enda me pengadunNa, “Enggo irampasindu kebuh-kebun anggur, janah rumahndu dem alu barang-barang rampasen i bas kalak musil nari.

¹⁵Lit kin hakndu nindih bangsangKu bage pe muat alu paksa i bas kalak musil nari?” Bage nina TUHAN si Erdolat si Mada Kuasa.

¹⁶Nina TUHAN, “Nehen me uga gombangna diberu-diberu Jerusalem! Jurgak ia erdalan, matana meliar, pengodakna ilebih-lebihkenna, janah gelang nahena erdering-dering.

¹⁷Tapi Kuukum me ia; takalna dem ugah, seh maka takalna melinang bagi takal tabu.”

¹⁸Seh me paksana isentapken TUHAN i bas diberu-diberu Jerusalem nari kai si igombangkenna: perhiasen takalna, gelang nahena, burana,

¹⁹gelang tanna, uis penutup ayona,

²⁰tudungna, ajimat si ipakena i bas tan ras awakna,

²¹cincin jari-jari ras cincin si lit i bas igungna,

²²kerina paken kerja-kerjana si mejile, baju panasna, baju panjangna, ras dompetna;

²³baju nipesna, selendangna bage pe uis nipes si ipakena i bas takalna.

²⁴Genduari erminak wangi ia, tapi pagi mbau me ia; genduari mejile genditna, tapi pagi nali pasa jadi sambarna; bukna si mejile merurus kerina, seh maka ia jadi takal tabu; genduari uisna mejile kerina, tapi pagi igantiken alu uis guni; genduari mejile ia tapi salih me ia jadi mejin seh maka mela kal akapna.

²⁵Kerina dilaki i bas kuta e, subuk si megegehna pe, mate me i bas perang.

²⁶Kerabangen-kerabangen kuta e dem pagi alu kalak si tangis ras ngandung, janah kuta e jine bali ras sekalak diberu manjang-anjang kundul i bas abu taneh.