Read Batak Karo JESAYA 30 Bible Online

JESAYA 30 - Batak Karo bible

JESAYA 30

¹ TUHAN enggo ngerana nina, “Cilaka me peminpin-peminpin Juda sabap ilawanna Aku. Ertambah-tambah ibahanna dosana erkiteken ikutkenna rencana si la Aku erbahanca, janah itanda-tanganina perpadanen si la sue ras ukurKu.

²Lawes ia ku Mesir mindo penampat alu la nungkun lebe man bangKu. Mesir atena jadi sekawalna, e maka ernalem ia man raja Mesir.

³Tapi labo ngasup raja e nampati ia e maka pengkawali si iarapken i Mesir nari dungna maba kecedan si mesangat.

⁴Aminna gia wakil-wakil raja Juda enggo seh i kuta-kuta Mesir, Soan ras Hanes,

⁵erkadiola me dungna kalak Juda erkiteken ernalem ia man sada bangsa si la terpenalem. E maka mela me iakap Juda, sabap labo lit penampat si ialokenna.”

⁶Enda me kata Dibata kerna rubia-rubia si lit i gurun pasir Selatan, “Wakil-wakil raja erdalan arah daerah si dem kebiaren, e me ingan singa erguro-guro bage pe nipe si erbisa ras naga si banci kabang. Wakil-wakil raja e ndemi kelede ras untana alu luah si meherga man sada bangsa si la sitik pe ngasup mereken penampat.

⁷Penampat si ibereken Mesir la erguna. Erkiteken si e Kugelari me Mesir ‘Naga si la man kebiaren’.”

⁸Isuruh Dibata aku nuratkenca i bas sada kitap uga biakna bangsa e, gelah tetap lit suratna uga jahatna bangsa e.

⁹Rusur ia ngelawan Dibata, rusur ia erguak, janah la ia nggit megiken pengajaren TUHAN.

¹⁰Isuruhna nabi-nabi gelah ola ngerana. Nina man nabi-nabi e, “Ola cakapken man kami kerna kai si benar. Turikenlah man kami kai si ngena ate kami. Pelepaslah kami lalap megi kerna pengenehenen si mejile.

¹¹Nilahlah kam, ola kam belbel i tengah dalan kami. La kami merincuh megi kerna Dibata si Badia nu Israel si iberitakenndu.”

¹²Tapi enda kap si ikataken Dibata si Badia nu Israel, “La diatendu kai si Kukataken man bandu janah ernalem kam man gegeh kinirawan ras tipu.

¹³Erdosa kam. Kam desken tembok si meganjang si enggo regat; e maka rempet me kam mbulak.

¹⁴Perper me kam desken kudin taneh; bage getemna seh maka la lit sada pe pecah-pecahna si banci ipake muat rara, tah pe njaruk lau i bas telagah nari.”

¹⁵ TUHAN si Erdolat, Dibata si Badia nu Israel, erkata man bangsa e nina, “Marilah mulih, janah ernalemlah man bangKu alu teneng. Alu bage megegeh dingen terkawal me kam.” Tapi la kam nggit!

¹⁶Kepeken irencanakenndu lompat i bas imbang-imbangndu nari alu ngersak kuda si megegeh kiam. Janah payo me tuhu; kam la banci lang lompat me. Iakapndu kudandu seh kal meterna kiam; tapi teren denga nge kalak si ngelis-ngelis kam!

¹⁷Seribu kalak tenterandu minter me kiam adi idahna sekalak tentera musuh. Janah lima kalak saja pe tentera musuh enggo cukup erbahanca kam kiam kerina. Lanai lit sada pe si tading i bas tenterandu e, seakatan sada tiang bendera i datas sada uruk!

¹⁸Amin bage gia, TUHAN ertima-tima lako nehken perkuah ateNa man bandu. Katawari pe Ia sikap nehken perkuah ateNa man bandu sabap katawari pe Ia ngelakoken si bujur. Malem me ate kalak si ernalem man TUHAN.

¹⁹O kam bangsa si ringan i Jerusalem, lanai kam pagi tangis. TUHAN perkuah kap, e maka adi tangis kam man baNa mindo penampat, ialoiNa nge kam.

²⁰Tuhu TUHAN me si erbahanca kam mentasi paksa-paksa kiniseran si mberat, tapi Ia jine kap ras kam i je lako ngajari kam. E maka lanai kam perlu terdaram-daram kerna Ia.

²¹Adi nilah kam ku kawes tah ku kemuhen i bas dalan si e nari ibegindu me soraNa arah pudindu niNa, “Arah enda kap dalan. Ikutkenlah.”

²²Ibuatndu me gana-ganandu si ilapisi alu pirak tah emas, jenari iambekkenndu bagi kubang, janah nindu, “Olanai ko kuidah!”

²³Adi merdang kam, ipesusur TUHAN udan peturahsa, janah melala ulihna si man peraninndu, janah mbelang mbalmbal man ingan lembundu nggagat.

²⁴Jenggi lembundu ras kelede si nenggalai jumandu ndat gagaten si mbur ras si mejilena.

²⁵Tupung benteng musuhndu italuken, janah rayatna ibunuh i bas wari e ka lau maler i bas tep-tep deleng ras uruk nari.

²⁶Bulan bali harharna ras matawari, janah matawari pitu kali terangna asa biasana, bali ras terang pitu kali ipepulung jadi sada. Si enda jadi tupung TUHAN maluti ras pepalem luka-luka si ibahan TUHAN man bangsaNa.

²⁷Kuasa ras kemulian TUHAN teridah i bas ingan si ndauh. Api ras cimber nuduhken rawaNa. Ersumekah Ia, e maka kataNa bagi api.

²⁸IsuruhNa angin rembus arah lebeNa desken lau banjir mbelin si ngombakken si nasa lit. IsasapNa bangsa-bangsa seh kernep, janah ipengadiNa sura-surana si jahat.

²⁹Tapi kam, o bangsa Dibata, meriah akapndu janahndu rende-rende, bali ras si ilakoken tupung berngina kam ngerayaken wari raya agama. Bali riahna iakapndu ras kalak si ngikuti angguk sora suling tupung erdalan ku Rumah Pertoton TUHAN sekawal Israel.

³⁰Ibahan TUHAN maka kerina kalak megi soraNa si Erdolat janah nggejapken uga sangatna ukumen pernembeh ateNa. IsuruhNa api si gurlah, udan meder, udan batu, ras angin meter.

³¹Kalak Assur gentar tupung ibegina sora TUHAN janah nggejapken uga sangatna ukumen pernembeh ateNa.

³²Janah asum TUHAN nggudami kalak e, bangsa TUHAN ersenang-senang alu ergendang ras ngkuit kulcapi. Dibata jine kap erperang ngelawan kalak Assur.

³³Nai nari enggo isikapken sada ingan i ja api gurlah nengsengi raja Assur. Ginuhurna mbages janah mbelang, janah rantingna ergun-gun i bas. Isemburken TUHAN api ku je lako nggaraisa.