Read Batak Karo JESAYA 31 Bible Online

JESAYA 31 - Batak Karo bible

JESAYA 31

¹Cilaka me kalak si lawes ku Mesir mindo penampat. Ernalem kempak gegeh tentera Mesir si melala kudana, melala gereta perang, ras tenterana. Tapi la ia ernalem man TUHAN, Dibata nu Israel. La ia mindo penampat man TUHAN.

²TUHAN pentar kap, janah ietehNa kai arus ilakokenNa. IdabuhkenNa kecedan, janah sue ras kataNa isehkenNa ukumen man kalak jahat ras pengawalna.

³Kalak Mesir pe manusia biasa nge, labo ia Dibata. Kudana labo lebihen asa kuda si lit i doni enda. Adi TUHAN ngawatken tanNa, bangsa si megegeh jadi getem, janah bangsa si la megegeh si isampatiNa guling me. Duana ia ikernepken.

⁴Nina TUHAN man bangku, “Aminna uga gia gangna permakan-permakan serko ras ersurak, labo tergerasa singa i bas rubia-rubia si enggo ijerngemna, bage ka nge Aku pe, TUHAN si Mada Kuasa, labo lit kai pe banci si ngolangi Aku ngkawali Deleng Sion.

⁵Bali ras perik kelaling-kelaling i babo asarna lako ngkawali anak-anakna, bage ka me Aku TUHAN si Mada Kuasa. Kukawali Jerusalem janah Kupertahanken kuta e.”

⁶Nina TUHAN, “O bangsa Israel, kam enggo erdosa man bangKu janah ilawanndu Aku. Tapi genduari, mulihlah kam kempak Aku!

⁷Reh me warina i je kam kerina si dem alu dosa e menterken gana-gana si ibahanndu i bas pirak ras emas nari.

⁸Ikernepken me Assur i bas perang, tapi la alu gegeh manusia. Kiam me kalak Assur i bas perang nari, janah anak-anak peranana ibahan jadi budak.

⁹Rajana kiam perban biarna, janah perwira-perwira tenterana seh kal gentarna, seh maka itadingkenna bendera perangna.” TUHAN enggo ngataken si enda. TUHAN si isembah i Jerusalem, si apiNa gara i je guna persembahen-persembahen gelehen.