Read Batak Karo JESAYA 34 Bible Online

JESAYA 34 - Batak Karo bible

JESAYA 34

¹Marilah o kerina bangsa-bangsa! Mari pulung, jenari dengkehken. Mari ku jenda, o kerina doni ras si nggeluh i je, jenari begikenlah.

²Nembeh ate TUHAN man kerina bangsa-bangsa ras tenterana. Enggo idabuhken TUHAN ukumen man bana kerina guna i kernepken.

³Mait-maitna la ikuburken, tapi ampar i je seh macik dingen mbau; deleng-deleng pe megara erkiteken dareh.

⁴Matawari, bulan, ras bintang-bintang, getem kerina jadi abu. Langit masap, desken amak igulung, janah bintang-bintang nartar desken bulung anggur tah bulung ara si nartar i bas batangna nari. [62†]

⁵ TUHAN enggo nggarut pedangNa i Surga, e maka itampulNa me Edom bangsa si enggo iputuskenNa ukumenna gelah ikernepken. [63†]

⁶Pedang TUHAN dem dareh ras tabeh-tabeh kalak e, bali ras dareh ras tabeh-tabeh anak biri-biri ras kambing si ipersembahken. TUHAN erbahan penggelehen e i kuta Bosra; ibahanNa penggelehen si mbelin i negeri Edom.

⁷Bangsa e guling desken lembu kerangen ras jenggi lembu nguda, janah tanehna megara erkiteken dareh janah ketamburen tabeh-tabeh.

⁸E me paksana TUHAN mulahi Sion janah erbalas man musuh-musuhna.

⁹Kerina lau belin si lit i Edom salih pagi jadi ter, janah tanehna salih jadi kertah. Negeri e meseng kerina desken ter.

¹⁰Apina gurlah suari ras berngi, janah cimberna erdipul ku das rasa lalap. Taneh e terulang abad ku abad, janah ise pe lanai lit mentas arah e seh rasa lalap. [64†]

¹¹Alingkupa ras kak me pagi gancih manusia si ngiani taneh e. Ibahan TUHAN maka la lit kai pe turah i je maka terulang mulihi, bali ras paksa ope tembe doni nai.

¹²Lanai lit raja si merentah negeri e, janah peminpin-peminpinna kerina enggo lawes.

¹³Duri ras rambah si erduri turah i bas kerina istana-istana ras kuta-kuta si ertembok, janah biang kerangen ras alingkupa ringan i je.

¹⁴Rubia-rubia si meliar gawah-gawah i je; begu si lebuh-lebuhen, janah begu ganjang reh ku je ndarami ingan pengadi-ngadin.

¹⁵Alingkupa rasar, naruhen, janah pebelin-belin anakna i je. Perik pengatah daging pe pulung i je; tambah-tambah sada tep-tep wari.

¹⁶Pepayolah i bas pustaka TUHAN kerna tinepa si nggeluh, janah oge kai nina. La lit sada pe i bas rubia-rubia si ndai bene, janah la lit sada pe si la ras pasangenna. Sabap enggo iperentahken TUHAN maka bage me jadina; janah TUHAN jine kap si pepulungsa.

¹⁷TUHAN kap si magi-magiken taneh e man kerina rubia-rubia, janah sada-sadai ndatken sada bagin. I bas abad ku abad ringan ia i bas negeri e, janah jadi sikerajangenna e seh rasa lalap.