Read Batak Karo JESAYA 37 Bible Online

JESAYA 37 - Batak Karo bible

JESAYA 37

¹Kenca ibegi Raja Hiskia cakap kalak ndai, icaingkenna uisna erkiteken cedana atena. Jenari ipakena uis guni, tanda ate ceda, e maka lawes ia ku Rumah TUHAN.

²Isuruhna Eliakim, e me pegawai si ngaturken istana raja, Sepna, sekretaris kerajan, ras imam-imam si enggo metua, gelah ndahi Nabi Jesaya anak Amos. Kalak enda pe kerina make uis guni.

³Enda me berita si itengeskenna man Jesaya, “Sendah me wari kiniseran; kita enggo iukum ras ijuruken. Kita desken sekalak diberu si nandangi mupus, tapi la cukup gegehta petubuhsa.

⁴Raja Assur nuruh puanglimana nggombangi Dibata si nggeluh. Mbera-mbera ibegi TUHAN Dibatandu kerina ranan si megombang e maka iukumNa kalak si melaskenca. E maka ertotolah man Dibata guna bangsanta si tading denga.”

⁵Kenca ialoken Jesaya berita si itenahken Raja Hiskia,

⁶itenahkenna mulihken jabapna nina, “Ikataken TUHAN man bandu maka ola kam mbiar megi cakap kalak Assur e, aminna gia ikatakenna maka TUHAN la ngasup ngkelini kam.

⁷Ibahan TUHAN pagi maka raja e megi berita-berita si erbahanca ia mulih ku negerina, janah i jah isuruh TUHAN kalak munuhsa.”

⁸Ibegi pegawai Assur ndai maka rajana enggo lawes i Lakis nari janah sangana iserangna kuta si ndeher rassa, e me kuta Lipna. E maka lawes pegawai e ku je nungkunisa.

⁹Lit seh berita man kalak Assur maka tentera Mesir si ipinpin Raja Tirhaka i Sudan nari sangana reh nerang ia. Kenca ibegi raja Assur si enda, ikirimkenna sada surat man Hiskia raja Juda

¹⁰nina, “Dibata inganndu ernalem enggo ngataken man bandu maka labo kam tertaluken aku; tapi ola kam tertipu megi si e.

¹¹Tentu enggo ibegindu kai si ibahan raja Assur man tiap negeri si enggo iputuskenna gelah ikernepken. Akapndu kin banci kam pulah?

¹²Nini-niningku ngeradasken kuta Gosan, Haran, ras Resep janah ibunuhina bangsa Bet-Eden si ringan i Telassar, janah la lit sada pe dibata-dibatana si ngasup ngkelinisa.

¹³I ja dage genduari raja kuta Hamat, Arpad, Separwaim, Hena, ras Iwa?”

¹⁴Ialoken Raja Hiskia surat e i bas persuruhen ndai nari, jenari iogena. Kenca bage lawes ia ku Rumah Pertoton, itamakenna surat e i adep-adepen TUHAN,

¹⁵e maka ertoto ia nina,

¹⁶“O TUHAN si Mada Kuasa, Dibata nu Israel, si kundul i bas kursi kinirajanNdu i babo Kerubim Kam kap ngenca Dibata, si merentah kerina kerajan-kerajan doni. Kam kap si nepa langit ras doni. [68†]

¹⁷TUHAN, dengkehkenlah kami, janah tataplah kai si jadi genduari i bas kami. Begikenlah kai si ikataken Sanherip nggombang-nggombangi Kam Dibata si nggeluh.

¹⁸Kerina kami metehsa TUHAN, maka raja-raja Assur enggo ngeradasken melala bangsa, ibahanna negerina terulang.

¹⁹Jenari icilukna dibata-dibatana, sabap si e kerina labo Dibata si tuhu-tuhu, tapi gana-gana kayu ras batu, bekas tan manusia erbahanca.

²⁰Dage, o TUHAN Dibata, pulahi min kami i bas kalak Assur e nari, gelah kerina bangsa doni enda meteh maka Kam ngenca Dibata.”

²¹Kenca bage itenahken Jesaya tenah man Raja Hiskia. I bas tenah e ikataken Nabi Jesaya maka guna ngaloi pertoton raja,

²²TUHAN enggo ngataken, “O Sanherip, itawai dingen igombangi kuta Jerusalem kam.

²³Ise kin akapndu si ihina ras itokoh-tokohindu e? Dibata si Badia nu Israel kap si ilawanndu e.

²⁴Isuruhndu suruh-suruhenndu gelah meganjang pengeranana i lebe-lebengKu, nindu, ‘Gereta perangku enggo naluken deleng-deleng Libanon si meganjang. I das deleng e enggo kutabah batang kayu ingul si meganjangna ras batang tusam si mejilena, janah enggo aku seh ku tengah kerangen si mbagesna.

²⁵Enggo kukali sumur-sumur i negeri kalak si deban janah enggo kuinem launa. Enggo iperjaki tenterangku Lau Nil seh kerah.’

²⁶La kin enggo ibegindu maka kerina si enda ndekah me enggo Kurencanaken? Janah genduari enggo Kulakoken sue ras rencanangKu e. Enggo Kubereken man bandu gegeh lako nalihken kuta-kuta si erbenteng jadi gun-gunen batu.

²⁷Kalak si ringan i bas kuta-kuta e la ergegeh, mbiar dingen jengang kerina. Ia desken rih i bas sada juma tah pe dukut si turah i datas tarum rumah, melus iembusken angin Timur si melas.

²⁸Tapi Kueteh nge kerinana kerna kam, kai si ilakokenndu ras ku ja perlawesndu. Kueteh nge kuga nembehna atendu ngenehen Aku.

²⁹Enggo Kualoken berita kerna pernembeh ate ras kiniganjangen ukurndu. E maka genduari Kukiling igungndu,janah Kusangam babahndu, jenari Kutegu kam mulih arah dalanndu reh mbarenda.”

³⁰Kenca bage nina Jesaya man Raja Hiskia, “Enda me tandana kerna kai si nandangi jadi. I bas tahun enda ras tahun si reh, buah dukut si turah-turah bana ngenca lit man panganndu, tapi i bas tahun si peteluken enggo banci kam man gandum, jenari iperanindu, bage pe nuan anggur jenari man buahna.

³¹Kalak si tading si nggeluh denga i Juda turah ka mulihken desken sinuan-sinuan si rurat mbages ku teruh taneh jenari erbuah.

³²Lit nge si tading nggeluh i Jerusalem ras i Deleng Sion, sabap bage ate TUHAN si Mada Kuasa ibahanNa.

³³Enda me si ikataken TUHAN kerna raja Assur e, ‘Labo ibengketina kuta enda, janah labo ipanahkenna sada anak panah pe ku je, labo lit sekalak pe tentera si rampang-ampang reh ndeheri kuta e, janah labo lit taneh ipegun-gun jadi benteng guna ngkepung kuta e.

³⁴Mulih me ia arah dalanna reh mbarenda, dingen labo ia sempat bengket ku bas kuta e. Aku, TUHAN, enggo ngatakenca.

³⁵Aku mpertahanken kuta Jerusalem ras ngkawalisa, guna kehamaten man bangKu bage pe erkiteken perpadanen si Kubahan ras suruh-suruhenKu Daud.’ ”

³⁶Sekalak malekat TUHAN lawes ku perkemahen kalak Assur. I je ibunuhna 185.000 tenterana. Pepagina, nandangi mbincar matawari teridah amparen i je kerina maitna!

³⁷E maka mundur me Sanherip, raja Assur, mulih ku Niniwe.

³⁸I bas sada wari, asum ia ersembah i bas rumah pertoton dibata-dibatana Nisroh, reh anakna dua kalak. Adramelek ras Sareser, munuh ia alu pedang jenari lompat anakna e ku taneh Ararat. Anakna si deban, e me Esarhaddon, nggantiken ia jadi raja.