Read Batak Karo JESAYA 4 Bible Online

JESAYA 4 - Batak Karo bible

JESAYA 4

¹Adi paksa si ndai enggo pagi seh, pitu kalak diberu pagi nagangi sekalak dilaki janah nina, “Berelah maka ikataken kami kam perbulangen kami, gelah ola kami la tersereh sabap mela kami adi la tersereh; nakan ras uis kami, kami gia muatca.”

²Seh me paksana maka sinuan-sinuan ras batang kayu si lit i bas negeri e ibere TUHAN turah, mbelin ras mejile. Sanga si e kerina kalak Israel si tading denga meriah ukurna dingen megah akapna erkiteken ulih peranin si ipedarat taneh e.

³Kerina kalak si tading i Jerusalem si enggo ipilih TUHAN gelah tetap nggeluh, igelari badia.

⁴Alu kuasaNa Tuhan ngerunggui ras murihi bangsa e gelah mejelis kesalahen Jerusalem, i bas dareh si pernah mambur i je.

⁵Kenca bage, sanga suari itamaken TUHAN me embun i babo Deleng Sion ras i babo kerina kalak si pulung i je. Tupung berngi itamaNa cimber ras sinalsal terang. Kemulian Dibata nutupi ras ngkawali kuta e kerina. [6†]

⁶KemulianNa ngelinggemisa i bas las matawari nari janah ibahanNa jadi ingan cilinggem, ingan cio sanga udan meder ras angin meter.