Read Batak Karo JESAYA 40 Bible Online

JESAYA 40 - Batak Karo bible

JESAYA 40

¹“Apulilah bangsangKu,” nina Dibatanta, apulilah ia kerina.

²Apulilah maka malem ate anak kuta Jerusalem. Momoken man bana maka enggo bias kiniseranna. Dosa-dosana enggo Kualemi, janah ukumen si Kubereken erkiteken dosa-dosana enggo bias.”

³Lit sora erlebuh nina, “Pekena dalan TUHAN i bas taneh si mesawang, i bas gurun pasir, pesikap dalan man Dibatanta. [71†] [72†]

⁴Kerina baluren itambusi me, deleng-deleng ipekendit. Uruk-uruk jadi kendit si mbelang, janah taneh si bongkak-bangkik jadi rata.

⁵Kenca bage ipetangkas me kemulian TUHAN janah kerina manusia radu ngidahsa. TUHAN jine kap si erpadan kerna si enda.”

⁶Lit sora erlebuh nina, “Momokenlah!” Ningku nungkunsa, “Kai si man momonken?” “Momokenlah maka kerina manusia desken dukut-dukut ngenca; bagi rudang-rudang i mbalmbal kiniulinna kentisik ngenca. [73†]

⁷Dukut-dukut kerah, rudang-rudang pe melus, adi isuruh TUHAN ku je angin rembus. Tuhu, jelma manusia desken dukut saja kap ngenca.

⁸Dukut-dukut ras rudang-rudang pe melus kap, tapi kata Dibatanta tahan rasa lalap.

⁹O Jerusalem, nangkihlah deleng si meganjang, momoken berita si mehuli. O Sion erlebuhlah alu sora megang, momoken berita si mehuli Momokenlah ola mbiar. Momoken man kuta-kuta Juda. “Dibatandu enggo reh.”

¹⁰ TUHAN si Erdolat reh alu kinimbisanNa, lako jadi raja si dem alu kuasa. Nehenlah, radu ras kerehenNa, ibabaNa upah man bangsaNa. [74†]

¹¹Desken sekalak permakan, ipekena-kenaNa rarasenNa, alu tanna jine, ipepulungNa kerina. Anak biri-biri iangkipNa, alu manjar-anjar, indung biri-biri igeraNa. [75†]

¹²Ise ngasup nukati lau lawit alu tapak-tapak tanna? Ise ngasup nibari langit alu jengkalna? Ise ngasup pepulung taneh doni enda ku bas tumba? Ise ngasup nimbang deleng ras uruk-uruk i bas sada neraca?

¹³Ise ngasup ngaturken pendahin Kesah TUHAN? Ise ngasup mereken pedah ras pengajaren man baNa? [76†]

¹⁴Man ise kin Ia nungkun lako ndatken pengertin? Ise kin nuduhkenca baNa dalan kebujuren? Ise kin mereken pemeteh man baNa? Ise kin ngasup ngajarisa uga arusna Ia ndahiken dahinNa?

¹⁵Man TUHAN labo kai kal pe ertina bangsa-bangsa doni enda, bali iakapNa ras sentaktak lau i bas timba. Bagi sada rintep abu i bas neraca, pulau-pulau pe bage me akapNa nahangna.

¹⁶Melala pe rubia-rubia kerangen Libanon, la bias man persembahen tutungen. Melala pe kayu i bas kerangen Libanon la bias man rantingna.

¹⁷Kerina bangsa-bangsa la lit ertina man baNa, bagi si la lit kap e iakapNa.

¹⁸Ras ise dage ipeserindu Dibata? Ras kai atendu ipebalindu rupaNa? [77†]

¹⁹Ia labo bali ras gana-gana bekas tan manusia, aminna pe ilapisi alu emas, janah pirak jadi alasna.

²⁰Kalak si la ngasup nukur emas, tah pirak ipilihna kayu si la mesunah macik. Idaramina tukang si cerdik, gelah ibahanna gana-gana si la banci mbulak.

²¹La kin ietehndu, la kin ituriken nai-nai nari man bandu, gelgel nari la kin iertindu, uga doni enda ijadiken?

²²Dibata kap si nepasa, Ia kundul i bas kursi kinirajanNa; i lepar langit si meganjang i babo doni enda, manusia si i doni desken labang ngenca akapNa. Ia si ngkimbangken langit desken kire-kire si mbelang, desken kemah man ingan tading.

²³Kuasa raja-raja doni enda idabuhkenNa, janah ipekitikNa kalak e seh maka lanai lit ertina.

²⁴Kalak e bali ras sinuan-sinuan si mbaru isuanken; menam turah janah uratna narus nantan. Tupung isempulken TUHAN ku je angin si megegeh, minter ia melus, jenari kabang bagi nggala kerah-kerah.

²⁵“Ras ise kin banci terpeseri ras Aku? Lit kin si deban bali ras Aku?” Bage nina Dibata si Badia.

²⁶Tarelah ku datas langit! Kerina bintang-bintang, ise nepasa maka lit? Ia me kap si ngaturkenca desken tentera si melala; ietehNa piga beliganNa kerina, janah sada-sadai idiloNa rikutken gelarna. Perban bage belinna kuasa TUHAN e, la lit sada pe ibahanNa bene.

²⁷Dage, o Israel, ngkai maka kam jungut-jungut, tempa-tempa la idah TUHAN kesusahenndu? Engkai maka tupung kalak mahan la bujur bandu, iakapndu si e la diate Dibatandu?

²⁸La kin ietehndu? La kin pernah ibegindu, maka TUHAN e, Ia me kap Dibata si rasa lalap? Ia me si njadiken doni enda kerina. La pernah Ia latih tah kote, la ise pe metehsa kai si lit i bas ukurNa.

²⁹Man kalak si latih iberekenNa gegeh, itambahina gegeh man kalak si ngelabuh.

³⁰Kalak si nguda denga latih me dungna, janah anak perana pe ngelabuh ka ia.

³¹Tapi kalak si ernalem kempak Dibata, tetap ipelimbaruiNa gegehna. Desken rajawali kabang, lalap ia reh ganjangna. Kiam ia, tapi la ia ngelabuh, erdalan ia tapi la akapna latih.