Read Batak Karo JESAYA 42 Bible Online

JESAYA 42 - Batak Karo bible

JESAYA 42

¹Nina TUHAN, “Enda me suruh-suruhenKu si Kupegegehi; Ia me pilihenKu, si ngena ateKu. KesahKu enggo Kubereken man bana, gelah ibabana kebujuren man kerina bangsa-bangsa. [79†] [80†]

²La ia nergangi, la megang sorana ibahanna; janah i bas pasar pe la terbegi sorana ngerana.

³Buluh si punggur, la itabahna, lampu si milep-ilep la inimpetina. Alu tutus ate, keadilen ibabana.

⁴La ia erleja-leja, la ia ngelabuh, seh enggo paguh ipajekkenna keadilen i doni enda. Erkiteken si e, negeri-negeri si ndauh tertima-tima nandangi pengajarenna.”

⁵Dibata kap si njadiken langit ras si ngkimbangkenca; doni enda ras kasa kai si ringan i je, Ia si nepasa; iberekenNa kesah ras kegeluhen man manusia. Janah genduari nina TUHAN Dibata man suruh-suruhenNa, [81†]

⁶“Aku, TUHAN, enggo ndilo kam lako ndalanken sura-surangKu. Kutegu-tegu janah Kukawali kam. Arah kam Kubahan perpadanen ras kerina bangsa, arah kam Kubereken terang man bangsa-bangsa. [82†]

⁷Kam me Kusuruh pemedakken mata kalak pentang, ras mulahi kalak si tertutup i bas penjara si gelap.

⁸Aku kap ngenca TUHAN Dibatandu. La Kupelepas ise pe ndatken kemulianKu; la Kubere maka gana-gana dat puji-pujin si jadi kerajangenKu.

⁹Kai si Kukataken nai, genduari enggo jadi. Janah genduari Kuturiken man bandu perkara-perkara si mbaru, aminna pe si e langa bo ibenai.”

¹⁰Endekenlah ende-enden si mbaru man TUHAN, i belang-belang doni, penangkihlah man baNa puji-pujin. Ergeruhguhlah muji Ia, o lawit ras kerina isina, rendelah o negeri-negeri si ndauh ras si ngianisa.

¹¹Pujilah TUHAN o gurun pasir ras kuta-kutana, o kalak Kedar, pujilah Ia. Pujilah ia, o kerina kalak si ringan i kuta Sela, i bas tampuk deleng-deleng nari ersurak meriahlah man baNa.

¹²Kasa kai kalak si ringan i bas negeri si ndauh, ipujinalah TUHAN dingen pemuliakenlah.

¹³ TUHAN berkat desken puanglima si mbisa, merincuh erperang dingen enggo sikap pe Ia. IserkokenNa surak-surak perang, icidahkenNa kinimbisanNa man kerina imbang.

¹⁴Nina Dibata, “Enggo ndekah Aku sinik saja; kem Aku, la Kualoi bangsangKu. Tapi genduari seh me paksana Aku ngerana, desken diberu si nandangi mupus serko Aku.

¹⁵Deleng-deleng ras uruk-uruk Kukernepken, dukut ras batang kayu, kerah Kubahan. Baluren lau Kusalihken jadi gurun pasir, janah paya-paya Kukerahi jadi taneh piher.

¹⁶BangsangKu si pentang Kutegu-tegu, Kubabai ia arah dalan si la pernah ibentasina. Kegelapen si arah lebena Kusalihken jadi terang, taneh si bongkak-bangkik Kubahan jadi kendit. E me si Kubahan man bana, la banci lang Kusehken e kerina.

¹⁷Kerina kalak si ernalem man berhala-berhala, kalak si ngataken maka gana-gana me dibatana, la banci lang ihina janah mela akapna.”

¹⁸Nina TUHAN, “O kalak pasek, begikenlah! O kam kalak pentang, perdiatekenlah!

¹⁹Ise kin lit bagi suruh-suruhenKu e pentangna? Ise kin lit bagi pertenahenKu e pasekna?

²⁰O Israel, tuhu enggo mbue si niidahndu, tapi si e kerina la iperdiatekenndu. Erpemegi nge tuhu pinggelndu, tapi la kai pe idengkehkenNdu.”

²¹ TUHAN Dibata tuhu-tuhu ersura-sura ngkelini manusia, e maka ipeganjangkenNa undang-undang ras pengajarenNa janah mesikel Ia, gelah undang-undangNa i pehaga bangsaNa.

²²Tapi genduari bangsaNa e irampasi, ikurung i bas liang janah itutup i bas penjara; keri ia irampuk dingen irampasi, janah ise pe la lit si reh nampatisa.

²³Ise kam nggit megiken kata mulai genduari nari iperdiatekenndulah si enda.

²⁴Ise kin akapndu ngendesken Israel man si ngerampasisa? TUHAN jine kap, sabap erdosa kita baNa. La kita nggit nggeluh rikutken sura-suraNa, la kita patuh man undang-undang si iberekenNa.

²⁵Erkiteken si e idabuhkenNa ukumen si mberat man banta, kesusahen perang ngkenai kita. I belang-belang Israel gara pernembeh ateNa, tapi kerina si e la siperdiateken, la siangka.