Read Batak Karo JESAYA 43 Bible Online

JESAYA 43 - Batak Karo bible

JESAYA 43

¹O Israel, bagenda nina TUHAN si nepa kam, “Ola kam mbiar, sabap la banci lang Kukelini kam. Kudilo kam alu gelarNdu; Aku kap si njadiken kam, janah kam sikerajangenKu.

²Adi ikeparindu lau si mbages, Aku ras kam; la kam gedap i bas kesusahen si mesangat. Adi ibentasindu api si gurlah, la meseng kam; la kam talu i bas percuban si mberat.

³Sabap Aku kap TUHAN Dibatandu, Dibata si Badia nu Israel, si Engkelinindu. Mesir Kubereken jadi tebusndu, Sudan ras Seba jadi gancihndu.

⁴Perban meherga kal Kuakap kam; medolat, janah keleng ateKu kam, e maka Kubereken kalak si deban jadi gancihndu, janah bangsa-bangsa si deban jadi gancih kesahndu.

⁵Dage ola kam mbiar, sabap Aku kap ras kam. I Timur i Barat nari, kam ras kesusurenndu Kupepulungi.

⁶Kuperentahken man Utara ras Selatan, maka ipulahina kerina, olanai itaban, gelah bangsangKu ipemulih i bas negeri si ndauh nari, i bas kerina tampuk doni nari.

⁷Sabap Israel e me kap bangsa si igelari alu gelarKu, si Kutepa ras Kujadiken guna kemulianKu.”

⁸Nina TUHAN, “Suruh bangsangKu ngadap i bas pengadilen. Lit matana, tapi pentang ia; lit cupingna, tapi pasek ia.

⁹Suruh ngadap kerina bangsa-bangsa. Apai kin dibata-dibatana si ngasup nuriken si nandangi jadi? Kerna kejadin si genduari, lit kin nai pernah iturikenna? Pelepas dibata-dibatana e maba saksina, gelah iturikenna kebenarenna, gelah ibuktikenna kebenaren kata dibata-dibatana.

¹⁰O bangsa Israel, kam kap saksingKu; Kupilih kam gelah jadi suruh-suruhenKu, maka itandaindu janah tek kam man bangKu, gelah iertindu maka Aku ngenca Dibata si tuhu-tuhu. La lit Dibata seakatan Aku; nai nari seh rasa lalap la lit si deban Dibata.

¹¹Aku ngenca TUHAN! La lit si deban si ngasup ngkelini kam.

¹²Nai enggo Kuturiken kai si nandangi jadi, janah kenca bage reh Aku ku kam engkelini. La lit pernah dibata-dibata si deban ngelakoken si bage, janah kam kap saksingKu kerna si e.

¹³Aku kap Dibata, janah rasa lalap nge Aku Dibata. La lit ise pe banci pulah i bas kuasangKu, la lit ise pe ngasup ngobah perbahanenKu.”

¹⁴Bagenda nina Dibata si Badia nu Israel, TUHAN si ngkelini kam: “Guna ngkelini kam Kusuruh pagi tentera nerang kuta Babil, Kurontasken pagi kerabangen kuta e, janah surak-surak si lit i je, kusalihken jadi tangis.

¹⁵Aku kap TUHAN, Dibatandu si Badia. Kutepa kam, o Israel, e maka Aku kap Rajandu.”

¹⁶Nai ibahan TUHAN pasar arah tengah lawit, sada dalan arah lau si ergalumbang.

¹⁷IteguNa tentera si mbisa kempak kebenen gereta perang ras kudana si melala. Ampar ia kerina, lanai keke mulihi, bali ras sumbu lampu, si inimpeti.

¹⁸Amin bage gia nina TUHAN, “Olanai inget-inget kai si enggo ndekah jadi, la padah ipegedang kerna kejadin si nai-nai.

¹⁹Nehenlah kejadin-kejadin si mbaru si nandangi Kubahan. Situhuna genduari pe enggo mulai jadi; la kin idahndu e? Kubahan pasar arah gurun pasir, janah lau belin maler i je.

²⁰E maka rubia-rubia si meliar pe ipehagana Aku; bage pe biang kerangen ras perik unta. Sabap Kupepaler lau i bas gurun pasir, gelah lit inemen man bangsa pilihenKu.

²¹Bangsa e jine enggo Kutepa man gunangKu, lako ngendeken puji-pujin man bangKu.”

²²Nina TUHAN, “Tapi leja kam nai man bangKu, o Israel; e maka lanai isembahndu Aku.

²³Biri-biri persembahen tutungen la ibabandu bangKu; la ihamatindu Aku alu persembahenndu. Labo Kuberati kam alu mindo melala persembahen, labo Kulatihi kam alu mindo persembahen kumenen.

²⁴La itukurndu kumenen man bangKu, la ibesurindu Aku alu taben-tabeh rubia-rubiandu. Tapi iberatindu Aku alu dosa-dosandu, ilatihindu Aku alu salah si ibahanndu.

²⁵Amin bage gia, Aku kap Dibata si nasapken dosa-dosandu; janah si e Kulakoken erkiteken bage kin biakKu. Lanai Kupeinget-inget kerina dosa-dosandu.

²⁶Ota kita ku Pengadilen, bahan pengadunndu! Adi payo kin kam benar, turiken rananndu!

²⁷Ninindu si pemena nai erdosa; peminpin-peminpinndu pe erdosa man bangKu,

²⁸peminpin-peminpin, ngeliami inganKu si Badia. Erkiteken si e Kubahan me kecedan man Israel; Kupelepas bangsangKu jine igombangi kalak.”