Read Batak Karo JESAYA 44 Bible Online

JESAYA 44 - Batak Karo bible

JESAYA 44

¹Nina TUHAN, “Begikenlah, o Israel, suruh-suruhenKu kesusuren Jakup, bangsa pilihenKu.

²Aku kap TUHAN si nepa kam; si njadiken kam i bas bertin nari ras si nampati kam. Ola kam mbiar sabap kam kap suruh-suruhenKu, bangsa si Kupilih, kekelengenKu.

³Kempak taneh si muas, Kuamburken me lau, kempak taneh si kerah, Kubahan lau maler. Kukuseken me KesahKu man anak-anakndu, ras pasu-pasungKu man kesusurenndu.

⁴E maka mehuli perturahna, desken dukut i tepi lau, desken batang dalu-dalu i tepi lau maler.

⁵Tupung si e, bangsa si deban ngatakenca nina, ‘Aku sikerajangen TUHAN.’ Lit ka pe si ngatakenca ia kesusuren Jakup. Sekalak-sekalak ia nuratken gelar TUHAN i bas tanna, ikatakenna maka ia pe bangsa Dibata.”

⁶Bagenda me kata TUHAN si Mada Kuasa, TUHAN si ngerajai Israel ras si ngkawalisa, “Aku kap si pemena ras di perpudina, seakatan Aku la lit Dibata. [83†]

⁷Ise kin ngasup ngelebihi Aku? Suruh ia ngerana, ngakukenca i lebe-lebengKu. Ise kin lit nuriken kerna si nandangi jadi, bena-benana nari seh ku pendungi paksa-paksa?

⁸Ola kam mbiar, o bangsangKu; ietehndu maka nai-nai nari seh genduari enggo leben Kuturiken kai si nandangi jadi. Janah kerna si e kam kap saksi-saksingKu. Lit kin dibata-dibata si deban lain Aku? La lit; janah la pernah lit Kubegi.”

⁹Kerina tukang gana-gana tuhu la lit ergana, janah barang-barang si meherga akapna e, la lit sitik pe gunana. Kerina kalak si nembah man berhala-berhala, tuhu-tuhu pentang dingen motu, janah erkiteken si e ugapa pe ia juru janah mela akapna.

¹⁰Labo lit ertina erbahan gana-gana besi janah nembahsa desken dibata.

¹¹Kasa kai kalak si nembah man gana-gana ugapa pe mela me akapna. Kalak si erbahan gana-gana e manusia kap. Suruhlah ngadap maka iadili; ugapa pe mbiar ia janah mela akapna.

¹²Tukang besi muat besi; lako nepasa e maka tutungna ku bas api. Tanna si megegeh ngawatken perpalu lako nepasa. Sanga erdahin, melihe dingen muas ia, latih pe akapna.

¹³Tukang kayu nibari kayu. Ibahanna i je gambar gana-gana alu kapur, jenari iukirna alu perkakasna; iganana gambar manusia si mejile tempasna guna itamaken i bas rumahna.

¹⁴Banci jadi kayu si ipakena kayu asis si itabahna i bas kerangen nari; tah banci ka pe isuanna kayu eru, jenari itimaina udan peturahsa.

¹⁵Sada bagin i bas batang kayu e ibahanna jadi ranting. Alu si sada bagin ndai ipegarana api man inganna cudu ras nasakken roti. Bagin si debanna ibahanna jadi gana-gana man sembah-sembahen.

¹⁶Deba ka ranting ndai ipegarana guna manggang daging, ipanna seh besur. Cudu ia i je maka ola akapna mbergeh, janah nina, “Entabeh kal, dingen lanai mbergeh! Seh kal ulina api e!”

¹⁷Iba-iba kayu ndai ibahanna jadi gana-gana, janah kenca bage erjimpuh mungkuk ia, isembahna gana-gana e. Ertoto ia kempak gana-gana e nina, “Kam kap dibatangku, kelinilah aku!”

¹⁸Kalak si bage seh kal motuna. Itutupna matana ras perukurenna seh maka kai pe la iangkana.

¹⁹Tukang gana-gana e la lit pengertinna, janah la seh ukurna nungkun i bas pusuhna, “Deba kayu e kuciluk kap. I babo rarana kutasakken roti janah kupanggang daging, jenari ku pan. Iba-iba kayu e kubahan jadi gana-gana. Ma la kin patut aku erjimpuh nembah i lebe-lebe sengkeret kayu?”

²⁰Perbahanen si bage desken man abu kap! Perukuren si bodoh e enggo mabai ia papak seh maka lanai ia tersampati. La ia nggit ngakuisa man dirina maka gana-gana si ijemakna e situhuna penipu.

²¹Nina TUHAN, “O Israel, ingetlah katangKu man bandu; ingetlah maka kam kap suruh-suruhenKu. Kam Kutepa jadi suruh-suruhenKu e maka ola ilupakenndu Aku.

²²Desken remang erpagi-pagi, dosandu enggo Kulesapken, janah salahndu pe enggo Kusasap desken embun. E maka mulihlah kempak Aku, sabap Aku kap Penebusndu.”

²³Rendelah meriah, o langit, Sabap TUHAN enggo ngelakoken si e kerina. Ersuraklah, o ingan si mbages i teruh taneh! Ersuraklah meriah o deleng-deleng ras kayu kerangen. TUHAN enggo encidahken kemulianNa alu engkelini bangsaNa Israel.

²⁴“Aku kap TUHAN, Penebusndu. Si nepa kam i bas bertin nandendu. Aku kap TUHAN, si njadiken si nasa lit Aku ngenca si ngkimbangken langit. Janah tupung Aku nepa doni enda, la lit ise pe si nampatisa.

²⁵Guru si beluh ertendung Kupebodoh-bodohken nubuat guru perkatika Kusia-siaken. Perkatan kalak pentar Kupersilahangken, janah Kucidahken maka kepentarenna tuhu-tuhu kebodohen. [84†]

²⁶Tapi adi suruh-suruhenKu nuriken kai si nandangi jadi, adi Kusuruh perberita petangkas rencanangKu, Kubahan maka nubuat ras rencana e tuhu-tuhu jadi. Kukataken maka Jerusalem iiani mulihi, janah kuta-kuta Juda ipajekken ka pagi. Kerina kuta-kuta e Kupekeke denggo mulihi i bas runtuhenna nari.

²⁷Kuperentahken man lawit si mbages, ‘Kerahlah! Kubahan maka lau belinndu jadi kerah.’

²⁸Kempak Raja Kores Kukataken, ‘Kam merentah guna Aku, lako ndalanken sura-surangKu. Kam merentahkenca maka Jerusalem ipanteki mulihi, janah palas Rumah Pertoton ipajekken ka pagi.’ ” [85†]