Read Batak Karo JESAYA 46 Bible Online

JESAYA 46 - Batak Karo bible

JESAYA 46

¹Dewa Bel enggo mbengkung, Nebo enggo njerunuk; nai dibata-dibata Babil e isembah, tapi genduari iampeken ku gurung asuh-asuhen baban si mberat man asuh-asuhen si enggo latih.

²Gana-gana e la ngasup engkelini dirina, tapi itaban jenari ibaba kerina, bage me jadina man gana-gana Babilon.

³O kesusuren Jakup, dengkehkenlah Aku, kam kerina si tading denga i bas bangsangKu. Enggo kutatang-tatang kam mulai i bas bertin nari, tangtang tubuhndu nari enggo kam Kuembahi.

⁴Aku kap Dibatandu, e maka Kuembah-embah kam, seh kam metua janah ubanen. Aku si njadiken kam, e maka Kutatang-tatang, Kuangkip-angkip, janah Kukelini kam.

⁵Ras ise kin Aku banci ipeserindu? Lit kin si deban bali ras aku?

⁶Italangi kalak dompetna, jenari itungtungkenna emasna; janah itimbangna pirak i bas neraca. Iupahina tukang emas lako erbahan gana-gana, kenca bage nembah erjimpuh ia i lebe-lebena.

⁷Iampekenna gana-gana e ku babo barana, ipersanna lawes; jenari itamakenna ka ku inganna. I je me lalap gana-gana e tedis, la ngasup miserken bana. Adi lit kalak ertoto ku ia, la ia ngasup ngaloi la ngasup pe ia ngkelinisa i bas cilaka nari.

⁸Ingetlah enda, o perdosa, ukurilah si nggo-nggona.

⁹Peinget-ingetlah kai si jadi nai. Akuilah maka Aku ngenca Dibata, janah la lit si bali ras Aku enda.

¹⁰Bena-benana nari enggo Kunubuatken kerna kedungenna, nai-nai nari enggo Kuturiken kai si nandangi jadi. Enggo Kukataken maka rencanangKu la terolangi, janah sura-surangKu la banci lang Kudalanken.

¹¹Kudilo sekalak jelma i Timur nari, ia reh desken perik rajawali. Kerina sura-surangKu idalankenna, sue ras kata si Kubelasken, bage me jadina.

¹²Begikenlah Aku o bangsa si mekeng pusuhna; iakapndu maka kemenangen ndauh denga.

¹³Aku erbahanca maka ndeher kemenangen, janah kemenangenKu la Kupelawen-lawen. Kuta Jerusalem Kuselamatken, janah man Israel Kubereken kemulianKu.”