Read Batak Karo JESAYA 47 Bible Online

JESAYA 47 - Batak Karo bible

JESAYA 47

¹Nina TUHAN, “O Babil, i bas kursi kinirajanndu nari, nusurlah, kundullah kam i bas abu taneh. Mbarenda kam desken singuda-nguda mejile dingen mberu, tapi genduari enggo bene kap kinijilenndu. [88†]

²Gilinglah tepung alu batu penggilingen, tudungndu pe cibalken. Tangtangi uis alusndu, singsing abitndu lako ngepari lau.

³Manjang-anjang me kam i lebe-lebe kalak, ipemela-mela dingen ipeteruk. Erbalas ateKu man bandu, janah ise pe la ngasup ngambati Aku.”

⁴Dibata si Badia nu Israel mulahi kita, gelarna e me TUHAN si Mada Kuasa.

⁵Nina TUHAN kempak Babil, “I bas ingan si gelap, sinik kam i je kundul. Kam lanai nari igelari kalak ‘Kemberahen nu bangsa-bangsa’.

⁶Mbarenda nembeh ateKu kempak bangsangKu, e maka Kupelepas keliamen erta pusakangKu. Kuendesken ia ku bas tanndu, tapi la atendu mekuah man bana; subuk tua-tua pe iberatindu.

⁷Akapndu mbarenda, kam lalap jadi kemberahen. La iukurindu kepeken, kuga kedungenna.

⁸O kam si nggeluh pesenang-senangken bana, dengkehkenlah katangKu; iakapndu maka la lit kai pe man kebiarenndu. Iakapndu maka kam me si erkuasana, nindu, ‘Aku kap Dibata, la lit ganjangen asa aku.’ Iakapndu maka kam la banci mbalu, kepaten anak pe akapndu la banci inanamindu. [89†]

⁹Tapi rempet i bas sada wari, kam kedabuhen si dua ndai. Aminna lit pe tangkal ras tabasndu, bene perbulangenndu ras anak-anakndu.

¹⁰Teneng kal kam i bas kejahatenndu; sabap akapndu la lit ise pe ngidah perbahanenndu. Kam enggo papak erkiteken kepentaren ras pemetehndu, nindu, ‘Aku kap Dibata, la lit ganjangen asa aku.’

¹¹Reh me ku kam cilaka; tabas ras tangkalndu la ngasup ngambatisa. Rempet kam kena mara, mara si la iarapndu bage rehna.

¹²Teruslah pake tabas ras kinigurunndu, si kitik-kitikndu nari enggo ipergunakenndu. Mbera-mbera erguna e man bandu, mbera-mbera mbiar ibahanna musuh-musuhndu.

¹³Ngelabuh nge kam, aminna pe melala si ngajari; suruhlah guru-guru pertendungndu e nampati. Ipelajarina bintang-bintang, ibahanna sibar-sibar langit si meganjang. Tep-tep pultak bulan si mbaru, iturikenna kai si nandangi jadi bandu.

¹⁴Desken nggala keri ipan api si gara, dirina jine pe la ngasup ikelinina. Api si gurlah, lasna la teralang, la banci man ingan cudu, bagi api arang.

¹⁵Bage me perasatna guru pertendung e man bandu, aminna pe kitik-kitikndu nari enggo ia jadi penungkunenndu; itadingkenna kam, idalanina dalanna, la lit si engkelini kam, lawes ia kerina.”