Read Batak Karo JESAYA 48 Bible Online

JESAYA 48 - Batak Karo bible

JESAYA 48

¹O bangsa Israel, kesusuren Juda, begikenlah! Kam ersumpah i bas gelar TUHAN. Ikatakenndu maka Dibata nu Israel kap si isembahndu; tapi la kap i bas pusuhndu nari kai si ibelaskenndu;

²Amin bage gia, megah ka akapndu ngatakenca, maka kam me penduduk kuta si badia, janah kam ernalem kempak Dibata nu Israel saja, TUHAN si Mada Kuasa, e kap gelarNa.

³Nina TUHAN kempak Israel, “Nai enggo Kukataken kai si nandangi jadi; jenari rempet Kujadiken si ndai.

⁴Kueteh maka pusuhndu mekeng bagi waja, urat kudukndu piher bagi tembaga.

⁵E maka kejadin-kejadin enda nai nari enggo Kunubuatken, ope denga jadi enggo leben Kuberitaken, maka ola ikatakenndu berhala ras gana-ganandu si mahanca jadi bandu.

⁶Genduari enggo me jadi kerina si kuturiken nai bandu; e maka arus iakuindu, nubuatKu payo tuhu. Genduari Kunubuatken ka perkara-perkara si mbaru, e me kejadin-kejadin si langa Kupetangkas bandu.

⁷Enda denga nge Kubahan si e jadi, perkara-perkara si bage la pernah jadi nai-nai nari. Adi lit kin bage, tentu nindu ngerana, ‘Si e enggo me kueteh kerina.’

⁸Kueteh nge maka kam la terteki, kam terberita kalak si pet nogani, em sabapna maka si enda la pernah ibegindu, sengkebabah kata pe la pernah seh ku cupingndu.

⁹Gelah ipuji kalak gelarKu, Kusabari kal ukurKu. RawangKu Kutahan, maka ola keri kam Kukernepken.

¹⁰I bas api kiniseran, kam Kuuji, bali ras pirak, iane i bas api. Tapi kepeken si la erguna kepe kam.

¹¹Si e Kulakoken guna Aku; sabap gelarKu la ateKu jadi mbau. Man ise pe la Kubere kemulianKu.”

¹²Nina TUHAN, “Begikenlah, o Israel, bangsa si enggo Kudilo. Aku kap Dibata, si pemena ras si perpudina. [90†]

¹³TanKu kap simahan palas doni enda, tanKu, si kemuhen ngkimbangken langit enda. Tupung Kudilo langit ras doni enda, minter ia sikap ngadap kerina.

¹⁴Pulunglah kam kerina, jenari begiken; la lit sada pe dibata-dibata si ernubuatken maka Babil iserang kalak si enggo Kupilih; ilakokenna me kasa kai si Kusuruh.

¹⁵Aku me si ngerana ras si ndilo ia, Kubabai ia, janah Kupeseh sura-surana.

¹⁶Mari deheri Aku, jenari begiken. Bena-benana nari pe Aku enggo ngerana terang-terangen. Asum jadi si Kukataken e, Aku pe lit i je.” (Tuhan si Erdolat enggo mereken gegehNa man bangku janah nuruh aku.)

¹⁷Dibata si Badia nu Israel, TUHAN si ngkelini kam ngataken bandu, “Aku kap TUHAN Dibatandu; Aku ngajari kam guna kiniulinndu, janah naruhken kam ku bas dalan si man dalanenndu.

¹⁸Bicara patuh kam man perentahKu, tentu maler man bandu kemalemen ate desken lau; janah kemenangen ku kam nepet, desken galumbang si ergalun ku tepi lawit.

¹⁹Kesusurenndu pe bagi kersik teremna, janah Kujaga maka la masap ia.”

²⁰Ndaratlah i Babil nari, lompatkenlah; beritakenlah alu surak meriah. Momoken ku belang-belang doni kerina, “TUHAN enggo ngkelini Israel, suruh-suruhenNa!” [91†]

²¹Asum itaruhken TUHAN nai bangsaNa arah gurun pasir si melas, la sempat ia terketes perbahan muas. Sabap ipedarat TUHAN lau man bana i bas lingling nari, ibekakenNa batu, jenari erburak lau i bas nari.

²²“La lit dame man kalak jahat,” nina TUHAN. [92†]