Read Batak Karo JESAYA 5 Bible Online

JESAYA 5 - Batak Karo bible

JESAYA 5

¹Begikenlah ende-enden si kuendeken enda, sada ende-enden kerna temanku ras peken anggurna: Temanku lit peken anggurna i das uruk-uruk si seh kal mehumurna. [7†]

²Icangkulna tanehna, iambekina batu-batuna; jenari isuanna batang anggur si mejilena. Ipajekkenna pantar man ingan njagasa, janah ibahanna lubang ingan ngerik buahna. Itimaina buah anggur ndai seh tasak kerina, tapi kepeken macem kerina nanamna.

³Dage genduari nina temanku e, “O kam kalak si ringan i Jerusalem ras Juda, cuba kam ertimbang kerna aku ras peken anggurku.

⁴Kai nari kin si kurang kubahan nandangi kebunku e? Di la lit si kurang, kuga maka macem buahna, janah ulihna la buah si mehuli bagi si kuarapken?

⁵Erkiteken si e, bagenda me ateku kubahan nandangi peken anggurku e: Kurontasken bidena, kuruntuhken tembokna. Jenari kupulahi rubia-rubia simeliar nggagati ras merjakisa.

⁶Kupelepas ia rambahen, dahan-dahanna lanai kubersihken, janah tanehna lanai kugaburi. Tapi kupelepas i je turah rambah duri ras rih. Embun pe la kubere ndabuhken udan ku je.”

⁷Israel kap peken anggur TUHAN si Mada Kuasa, kalak Juda me batang anggur si ngena ateNa. IarapkenNa bangsa e ngelakoken si mehuli tapi munuhi kepeken perasatna. Itimai-timai kebujuren idalankenna kepeken nderkuh kalak itindasna.

⁸Cilaka me kam, o kam si nukur rumah ras taneh nambahi si enggo lit i bas kam. Kentisik nari lanai lit i japa pe ingan kalak si deban, e maka kam nari ngenca pagi nggeluh i bas negeri e.

⁹Enggo kubegi kai si ikataken TUHAN si Mada Kuasa nina, “Kerina rumah belin si mejile enda jadi lume janah runtuh me.

¹⁰Peken anggur si belangna sepuluh hektar, empat tumba lau anggur ngenca pagi ulihna; siwah ayan benih, lima tumba ngenca pagi buahna.”

¹¹Cilaka me kam, o kam si lampas medak erpagi-pagi ngayakken samsu, janah seh mbages berngi mabuk-mabuk ngenca dahinndu.

¹²Ibahanndu minem-minem lau anggur. Tapi la diatendu perbahanen TUHAN ras kai si ilakokenNa.

¹³Erkiteken si e ibahan kalak me kam jadi tabanen sabap kai pe la iertindu. Peminpin-peminpinndu mate lumben, janah jelma si nterem mate muas.

¹⁴Doni kematen enggo merincuh nelen kam, enggo ingangakenna pe babahna. Ibendutna kerina peminpin Jerusalem radu ras jelma si nterem si pinger sorana e.

¹⁵Kerina kalak mela akapna, janah kerina si rukur meganjang idabuhken.

¹⁶Tapi TUHAN si Mada Kuasa encidahken kemulianNa alu ngelakoken si benar, janah ipetangkasNa kebadianNa alu ngadili bangsaNa.

¹⁷I bas kuta si enggo runtuh e nggagat anak biri-biri ras anak kambing.

¹⁸Cilaka me kam, o kam si la ngasup erleka ras dosa-dosandu.

¹⁹Nindu, “Pedas-pedaslah TUHAN ngelakoken kai ateNa ibahanNa, gelah banci si idah. Pelepaslah Dibata si Badia nu Israel nehken sura-suraNa, maka sieteh kai si lit i bas ukurNa.”

²⁰Cilaka me kam, o kam si ngataken maka kejahaten mehuli janah si mehuli ikatakenndu jahat. Isalihkenndu kegelapen jadi terang janah terang jadi kegelapen. Ibahanndu si pagit jadi ntebu, janah si ntebu jadi pagit!

²¹Cilaka me kam, o kam si pentar janah pantas akapndu bandu!

²²Cilaka me kam, o kam si ketagihen minem anggur. Tuhu merawa kam minem janah la kam mbiar minem si uga gia campurenna!

²³Tapi adi ibere sisip man bandu, minter ipulahindu kalak jahat si ersalah, janah kalak si la ersalah iambatindu ndatken sikerajangenna.

²⁴E maka genduari, kam bagi nggala ras dukut si enggo kerah keri ipan api. Uratndu keri macik, bungandu kerah jenari nartar iembus angin, erkiteken enggo itulakndu pengajaren TUHAN si Mada Kuasa, dingen megombang man pedah si Badia, Dibata nu Israel.

²⁵Merawa ate TUHAN man bangsaNa, e maka iawatkenNa tanNa lako ngukumsa. Deleng-deleng mundu-undu; janah mait kalak si mate ipelepas amparen i dalan bagi karap-karap. Tapi kenca bage pe pernembeh ate Dibata langa ngadi, iawatkenNa denga tanNa guna ngukum kam.

²⁶Ibahan TUHAN pagi tanda ndilo bangsa si ndauh. Ersiwel Ia ndilosa gelah reh bangsa-bangsa i tampuk doni nari. Nehenlah enam ia reh, pedas dingen meter!

²⁷La lit si meteh latih, la lit si jurembat. La pernah madat matana, la pernah ia tunduh. Genditna la sada pe longgar, tinali sepatuna la lit retap.

²⁸Anak panahna ntelap kerina, janah panahna enggo ipegestengna. Cekili kudana bali piherna ras batu api, roda gereta perangna pendeh ersiu-siu bagi angin kalinsungsung.

²⁹Tenterana erdengum bagi singa si mbaru njerngem panganna, dingen ikiamkenna kempak ingan si la ise pe ngasup muatca.

³⁰Adi enggo seh paksa si e, desken singa si merawa erdengum ia i belang-belang Israel, bali gangna ras sora lawit si ergeruhguh. Nehenlah, negeri enda, dem alu kegelapen ras aru ate; terang itelen kegelapen.