Read Batak Karo JESAYA 50 Bible Online

JESAYA 50 - Batak Karo bible

JESAYA 50

¹Nina TUHAN, “Akapndu kin bangsangKu Kupedauh bagi sekalak dilaki ngulihken ndeharana? Adi bage, apai dage surat mulihna? Akapndu kin kudayaken bangsangKu ku pembuangen desken sekalak jelma ndayaken anak man perutangenna? Labo bage! BangsangKu ibaba ku pembuangen erkiteken dosa ras kejahatenna.

²Tupung Aku reh lako ngkelinisa, ngkai maka bangsangKu la lit ngalo-ngalosa? La kin cukup gegeh ras kuasangKu mulahi ia, maka la ia ngaloi tupung Aku erlebuh man bana? Lawit pe kerah arah perentahKu, lau belin pe banci Kusalihken jadi gurun pasir seh maka nurungna mate perban kurang lau.

³Langit banci Kusalihken jadi mbiring, bali biringna ras uis kalak si nangisi kalak mate.”

⁴ TUHAN si Erdolat enggo ngajari aku ngerana, gelah banci kupegegehi kalak si latih, alu kata-kata. Tep-tep erpagi-pagi ipekekeNa ukurku, lako ndengkehken pengajarenNa man bangku.

⁵Ibereken TUHAN man bangku pengertin e maka la aku surut i bas Ia nari, la aku ngelawan.

⁶Kutareken gurungku man kalak si mekpek aku, bage pe isangku man kalak si ngeruah janggutku. Megombang kalak bangku, icidurina ayongku, tapi la kulawan, la kutamburi ayongku. [98†]

⁷Perban TUHAN si Erdolat penampatku, icekuraki kalak pe labo gulut ukurku. Kupepiher ukurku nahankenca, sabap kueteh labo banci kuakap mela.

⁸Ndeher kap Dibata ras aku, icidahkenNa me maka la ersalah aku. Ise pang nalahken aku? Ota ras ku pengadilen, bahan pengadunndu. [99†]

⁹ TUHAN jine kap si ngkapiti aku, dage ise banci nalahken aku? Masap me kerina si ngaduken aku, bali ras uis ipan nget-nget.

¹⁰O kam kerina si mehamat man TUHAN, janah patuh man perkatan suruh-suruhenNa; dalan si man dalanenndu banci jadi seh gelapna tapi ernalemlah man TUHAN janah teklah man baNa.

¹¹O kam si erbahan pertakin lako meneken kalak kam jine nge bene arah pertakinndu e. TUHAN jine kap si mahanca si enda jadi; e maka seh kal akapndu suina ibahanNa.