Read Batak Karo JESAYA 51 Bible Online

JESAYA 51 - Batak Karo bible

JESAYA 51

¹Nina TUHAN, “Begikenlah Aku, o kam si mesikel ikelini, o kam si ndarami penampat i bas Aku. Ingetlah lingling batu asalndu nai lubang pemuaten batu ingan asal mulandu.

²Ingetlah nini-ninindu Abraham, ras Sarah; tupung Kudilo Abraham, langa lit anakna. Jenari Kupasu-pasu janah Kubereken anak man bana; Kubahan nterem kal sinursurna.

³Kucidahken me perkuah ateKu kempak Jerusalem, kempak kerina kalak si ringan i bas runtuh-runtuhenna. Taneh si kerah janah i je la kai pe turah. Kubahan jadi peken bali ras Pardis. Lit i je keriahen ras kemalemen ate, radu ras ende-enden pujin ras pengataken bujur pe.

⁴Begikenlah Aku, o bangsangKu, begikenlah kai si Kukataken bandu. Kubereken pengajarenKu man bangsa-bangsa; undang-undangKu mereken terang man bana.

⁵Pedas Aku reh, lako ngkelini ia; paksa kemenangenKu enggo reh deherna. Aku jine pagi ngerajai bangsa-bangsa kerina; tertima-tima ia, sabap Aku me pengarapenna.

⁶Tarelah ku langit, tatap kempak doni, masap me langit desken cimber api. Doni enda getem bagi uis male, desken rengit, jelma si ngianisa keri mate. Tapi kemenangenKu la erpeltep-peltep.

⁷O bangsangKu si meteh bujur, begikenlah Aku, i bas pusuhndu kap rurat pengajarenKu. Ola mbiar adi isaling-saling ras igombangi kalak kam,

⁸sabap lesap me pagi ia desken uis ipan nget-nget! Tapi keselamaten si Kubereken tahan rasa lalap, kemenangenKu la erpeltep-peltep.”

⁹Kekeken min TUHAN, kekekenlah, sampati kami! Pakelah kuasaNdu, kelini kami. Pakelah e bagi si ibahanNdu i bas paksa si nai tupung iperperkenNdu Rahap, naga lawit si adi.

¹⁰Kam ka nge si ngkerahi lawit si mbages si erbahan dalan arah tengah lau. E maka kalak si ikeliniNdu, banci ngepar alu selamat.

¹¹Kalak si enggo ipulahiNdu e seh me i Jerusalem alu meriah ersurak ras rende. Keriahen si rasa lalap ndemi pusuhna, suhsah ras ndele ate, rasa lalap lanai inanamina.

¹²Bagenda nina TUHAN, “Aku, Aku nge si ngapuli kam. Engkai maka kam mbiar man manusia si ermasap-masap, si bali saja nge ras dukut-dukut?

¹³Enggo kin kam lupa man TUHAN si Nepa kam, si ngkimbangken langit, ras si namaken palas doni enda? Engkai maka kam mbiar la erngadi-ngadi, nandangi kalak merawa si nindas kam ras kalak si atena ngkernepken kam? Situhuna keganasen e lanai banci ngkenai kam.

¹⁴Kalak si tertaban pedas me ipulahi; la ia mate, janah la ia kurang nakan.

¹⁵Aku kap TUHAN Dibatandu; Kugawer lau lawit, e maka ergeruhguh sora galumbang. GelarKu e me TUHAN si Mada Kuasa!

¹⁶Kukimbangken langit, janah Kupajekken palas doni. Kukataken man Jerusalem, ‘Kam kap bangsangKu! Enggo Kubereken bandu pengajarenKu, janah Kukawali kam alu tanKu.’ ”

¹⁷O Jerusalem, kekeken, tediskenlah. Ukumen pernembeh ate TUHAN enggo inemndu tare calung si iberekenNa man bandu. Enggo inemndu seh keri, e maka enggo mbewat-mbewat kam ibahanna. [100†]

¹⁸Anak si ipupusndu la lit sada pe si mabai kam, i bas anak si ipebelin-belinndu la lit sada pe si negu-negu kam.

¹⁹Kam enggo kedabuhen dua erbage mara: La lit ise pe si ngapuli kam; negerindu enggo radas ibahan perang, janah bangsandu kelihen mesangat.

²⁰I bas serpang dalan, anak-anakndu guling perban kotena bali ras belkih kena banto perburu. Enggo igejapna uga sangatna pernembeh ate Dibata.

²¹O kam anak kuta Jerusalem si i bas kiniseran si mberat, seh maka kam mbewat-mbewat bagi kalak mabuk!

²²Bagenda nina TUHAN Dibata sikapitndu, “Calung pernembeh ateKu si Kubereken bandu Kubuat me genduari. Anggur si erbahanca kam mbewat-mbewat, lanai pada inemndu.

²³Kubereken me calung e man kalak si nindas kam mbarenda, kalak si mahan kam ampar i bas dalan, si ndedehi kam bali ras kubang.”