Read Batak Karo JESAYA 52 Bible Online

JESAYA 52 - Batak Karo bible

JESAYA 52

¹Kekeken, o Jerusalem, kekeken! Pakekenlah gegehndu. O Jerusalem kuta si Badia, pakekenlah uis kehaganndu, kalak si la bersih lanai banci mengketi kam. [101†]

²Kuisken abu si leket i bas dagingndu; kekeken, tangtangi rante si ngiket kerahungndu o anak kuta Sion si tertaban.

³Nina TUHAN kempak bangsaNa, “Tupung kam idayaken jadi budak labo lit ise pe si nggalarisa. Erkiteken si e guna mulahi kam, la ka bo perlu itebusi.

⁴Tupung kam jadi kalak pertandang i Mesir si e ilakokenndu arah ukurndu ersuruh. Tapi Assur mabaken kam alu paksa janah la lit sitik pe igalarina kerna kam.

⁵Janah genduari bage ka nge jadi i Babilon. Kam itabanna, janah la lit sitik pe igalarina. Kalak si merentah kam, meganjang cakapna, janah la erngadi-ngadi megombang ia man bangKu. [102†]

⁶Seh me pagi paksana maka iakuindu Aku Dibata, janah maka Aku enggo ngerana man bandu.”

⁷Seh kal riahna ukur ngidahsa; persuruhen reh ngepari deleng-deleng, maba berita si mehuli, berita perdamen. Imomokenna kemenangen, janah nina man Sion, “Dibatandu raja kap.” [103†]

⁸Megi si e pengawal kuta ersurak, ersurak ras-ras alu meriah! Alu matana jine idahna TUHAN mulih ku Sion.

⁹O runtuh-runtuhen Jerusalem, ersuraklah alu meriah, sabap ipulahi TUHAN me Jerusalem iapuliNa me bangsaNa.

¹⁰Icidahken TUHAN me kuasaNa, i lebe-lebe mata kerina bangsa. Kerina doni pagi ngidahsa, TUHAN ngkelini bangsaNa.

¹¹Tadingkenlah kuta Babil o kam kerina si maba perkakas rumah pertoton. Ola jemak barang si pantang pebadiaken bandu, jenari berkatlah. [104†]

¹²Sekali enda la perlu merudu-rudu kam lawes, sabap labo kam lompat. TUHAN Dibatandu kap si naruhken kam, i pudi dingen i lebe nari ikawaliNa kam.

¹³Bagenda nina TUHAN, “La kap sia-sia suruh-suruhenKu ndahiken dahinna; ipehaga dingen ipeganjang kal ia.

¹⁴Mbarenda nterem kal kalak sengget ngidah ia; sabap enggo ceda kal tempasna seh maka lanai tempa ia manusia.

¹⁵Tapi genduari melala bangsa jengang ngidahsa, janah raja-raja la ngasup ngerana perban mamangna atena. Kai si la pernah itehna mbarenda idahna me pagi janah iantusina.” [105†]