Read Batak Karo JESAYA 53 Bible Online

JESAYA 53 - Batak Karo bible

JESAYA 53

¹Ngaloi bangsa e nina, “Ise nge tek nandangi si iberitaken kami enda? Ise banci ngidahsa kuasa TUHAN i jenda? [106†]

²Peraten TUHAN kap e, maka suruh-suruhenNa e bali ras sinuan-sinuan, si turah i bas taneh tenggiring si kerah. La ia mehaga, rupana pe la mejile, e maka labo kita merhat ngenenca pe. La lit kai pe si ngena ateta kerna ia, e maka labo ateta metedeh man bana.

³Ia itulak dingen igombangi igengkenna kiniseran ras si mesui. Ciga ate kalak ngenen ia, la iergaken, la lit si mperdiatekenca.

⁴Tapi si tuhuna ia nge si maba kiniseranta, ia nge si mersan si mesuita. Kiniseranna iakap kami mbarenda ukumen si ibereken Dibata man bana. [107†]

⁵Tapi erkiteken dosa-dosanta nge maka ia ilukai erkiteken kejahatenta maka ia igudami. Gelah kita terkelin, ia iukum, erkiteken bekas lintangna maka kita malem. [108†]

⁶Kerina kita desken biri-biri si enggo papak; si dalani dalanta sekalak-sekalak. Tapi idabuhken TUHAN ukumen man bana, ukumen si patut kita ndatkenca. [109†]

⁷Seh kal kejamna perbahanen man bana, tapi igengkenna, janah sinik saja ia. Bali ras anak biri-biri si nandangi igeleh, bali ras biri-biri si nandangi iguntingi mbuluna, la sitik pe ia sumekah. [110†] [111†]

⁸Ia itangkap, idabuhken ukumenna, jenari ibaba gelah iukum mate ia. Tapi la ise pe mperdiateken nasipna, aminna pe ia mate erkiteken dosa-dosa bangsanta.

⁹Ia ikuburken sada lubang ras kalak jahat, itanemken ras kalak bayak, aminna pe la ia pernah ngelakoken si jahat, tah melasken kata guak.” [112†]

¹⁰Nina TUHAN, “PeratenKu kap maka ia ndatken kiniseran; ia mate guna persembahen pengalemi dosa. Erkiteken si e nggedang umurna, janah idahna kesusurenna. Arah ia jadi me bagi si Kusura.

¹¹Kenca kiniseranna, idatca me keriahen; itehna me maka kiniseranna e labo sia-sia. Suruh-suruhenKu si tutus e, nterem kalak ibahanna benar, janah ia me simersan ukumen nterem jelma.

¹²Erkiteken si e Kubereken man bana ingan si mulia, i tengah-tengah kalak si mbelin ras si erkuasa. Sabap nggit ia ngendesken kesahna seh mate, ngenanami kiniseran bagi kalak jahat. Tapi si tuhuna ipersanna dosa nterem jelma, janah itotokenna gelah kalak jahat ialemi kerina.” [113†]