Read Batak Karo JESAYA 54 Bible Online

JESAYA 54 - Batak Karo bible

JESAYA 54

¹O Jerusalem, kidekah enda bali kam ras diberu si la mupus tapi genduari kam enggo banci rende dingen ersurak alu meriah. Nterem me anakndu, teremen asa anak pernanden si la pernah itadingken perbulangenna. [114†]

²Pebelinilah kemahndu, ola tanggungi, pegedangi tinali-tinali dingen peteguhi pantuk-pantukna.

³Sabap ipebelangi me tanehndu ku kerina dampar, janah kuta-kuta si lume, dem pagi mulihi. Negerindu si genduari ikuasai bangsa si deban, mulai ka pagi jadi sikerajangenndu.

⁴Ola kam mbiar sabap lanai pagi mela iakapndu, lanai pagi megombang kalak man bandu. Lupa me kam pagi kerna kini-la-patuhenndu tupung ngudandu, bage pe kai si man kemelanken sanga kam mbalu.

⁵Si nepa kam e me perbulangenndu, gelarNa e me TUHAN si Mada Kuasa, Dibata si Badia nu Israel e me kap kekelengenndu, Ia me si merentah doni enda kerina.

⁶Kam desken sekalak ndehara si nguda denga si erceda ate erkiteken itadingken perbulangenna. Tapi ilebuh TUHAN kam mulihi nina,

⁷“Kentisik ngenca kam Kutadingken; Kulegi me kam mulihi alu kekelengen si mbelin.

⁸Erkiteken gara pernembeh ateKu, la Aku nggit encidahken ayongKu, tapi labo aku lalap nembeh man bandu. Jenari rasa lalap Kucidahken kekelengenKu.” Bage nina TUHAN, Penebusndu.

⁹“Tupung paksa Nuah, erpadan Aku nai, ndigan pe lanai Kubahan kelenglengen ndemi doni. Genduari erpadan Aku, ndigan pe lanai kam Kutembehi; lanai kam Kuukum, lanai Kurawai. [115†]

¹⁰Bicara deleng-deleng miser gia, uruk-uruk pe mundu-undu, tapi keleng ateKu tetap la miser i bas kam nari, janah padan dame si Kubahan lalap paguh la mundu-undu.” Bage nina TUHAN si ngkelengi kam tetap.

¹¹Nina TUHAN, “O Jerusalem, kuta si sangana mesera, kuta si medungu, si la lit ngapulisa. Kupanteki ka kam mulihi i babo batu sapir si meherga, janah kerina batu batandu kuleketken alu semin si mejilena. [116†]

¹²Menara-menarandu Kubahan batu delima tembok-tembokndu batu permata; pintu-pintu gerbangndu batu si erndilap-erndihawa rupana ernala-nala, bagi api si gara.

¹³Aku jine kap si ngajari pendudukndu, e maka senang dingen dame geluhna kerina. [117†]

¹⁴Kebujuren ras kebenaren mahanca kam megegeh, lanai lit si nindih kam, lanai lit si man kebiaren.

¹⁵Adi iperangi kalak kam, labo bekasKu nuruh; ise si ngelawan kam la banci lang ndabuh.

¹⁶Aku kap si njadiken tukang besi, si pegara api arang lako nepa senjata. Aku ka nge si njadiken tentera si make senjata e lako munuhi.

¹⁷Tapi la lit senjata si banci nakiti kam; janah kasa kai si ngaduken kam italukenndu i bas pengadilen. Kerina suruh-suruhenKu Kubela; Kubereken bana kemenangen.” Bage nina TUHAN.