Read Batak Karo JESAYA 55 Bible Online

JESAYA 55 - Batak Karo bible

JESAYA 55

¹Nina TUHAN, “Marilah kam si muas kerina, lau inemen enggo sikap i jenda. Marilah kam si la erduit kerina, enda nakan, panlah asa puasna. Marilah, anggur ras susu lit i jenda, buatlah, la pada nukur gia. [118†]

²Kai gunana nukurken duit kempak barang si la mahan besur? Kai gunana ngkeriken gajindu tapi tetap denga kam melihe rusur? Begiken, kai si Kukataken, janah lakokenlah maka besur kam man pangan si entabeh.

³Genduari, marilah dengkehken Aku, o bangsangKu; marilah, maka idatndu kegeluhen, dahi Aku. Kubahan sada perpadanen si la ermasap-masap ras kam. KekelengenKu si nteguh man Daud, Kusehken ku kam. [119†]

⁴Kubahan nai ia jadi peminpin ras puanglima, janah arah ia Kucidahken kuasangKu man bangsa-bangsa.

⁵Genduari idilondu me bangsa-bangsa si deban; aminna la gia kam sitandan. Tapi kiam ia lako njumpai kam. Si enda kerina banci jadi, erkiteken Aku, TUHAN Dibatandu, Dibata si Badia nu Israel, mereken kehamaten ras kemulian man bandu.”

⁶Daramilah TUHAN tupung banci denga jumpa ras Ia, ertotolah man baNa, tupung Ia ndeher denga.

⁷Itadingken kalak jahatlah dalinna, isambarinalah perukurenna. Mulihlah kalak jahat kempak TUHAN, Dibatanta, sabap Ia perkuah, janah simpar pengalemi dosa i bas Ia.

⁸Nina TUHAN, “PerukurenKu la bali ras perukurenndu, dalanKu labo seri ras dalanndu.

⁹Bagi langit ndauh ganjangen asa doni, bage me pe ndauh kal ganjangen dalinKu asangken dalinndu, perukurenKu asangken perukurenndu.

¹⁰Bali ras udan sinusur i langit nari, lanai mulih ku datas tapi litap ibanna doni, si mahanca turah sinuan-sinuan, si ngelitken benih ras nakan man pangan, [120†]

¹¹bage me pe kata si Kubelasken, la mulihken man bangKu alu sia-sia, tapi isehkenna kai si Kurencanaken, dingen ilakokenna kai Kusuraken.

¹²Itadingkenndu Babil alu dem keriahen, alu dame kam kerina itaruhken. I lebe-lebendu rende meriah deleng-deleng ras uruk-uruk, batang-batang kayu ersurak ras ertepuk-tepuk.

¹³Gancih duri turah kayu eru, gancih rambah duri turah kayu murbai. Enda me jadi tanda seh rasa lalap kerna Aku sada peringet-ingeten kerna kai si enggo Kulakoken.”