Read Batak Karo JESAYA 57 Bible Online

JESAYA 57 - Batak Karo bible

JESAYA 57

¹“Kalak bujur mate, janah la ise pe mperdiatekenca, la ise pe ngeranakenca. Tapi kenca ia mate lanai lit cilaka si banci engkenai ia.

²Kalak si nggeluh alu bujur ndatken kedamen ras pengadi-ngadin i bas kematen.

³Tapi kam, o perdosa, marilah maka kam iadili. Kam labo ulin asa guru perdewal-dewal, perlua-lua, tah diberu pencarinna erlua-lua.

⁴Ise kin si itawa-tawaindu e? Man ise kin ipererendu dilahndu? Man ise kin ipebelangndu babahndu o kam kalak perguak?

⁵Isembahndu dibata-dibatandu alu ngelakoken kerincuhen dagingndu iteruh batang kayu si iakapndu lit keramatna. Igelehndu anak-anakndu jadi persembahen i bas gua si erbatu-batu i tepi lau belin.

⁶Ibuatndu batu si melinang i jenari, kenca bage isembahndu batu e desken dibata. Iamburkenndu anggur jadi persembahen man bana janah icibalkenndu i je buah gandumndu. Akapndu kin ngena ateKu ngidah si enda kerina?

⁷Lawes kam ku das deleng mpersembahken persembahen, kenca bage ilakokenndu i je kerincuhen dagingndu.

⁸Deherken pintun i bas rumahndu ipajekkenndu gana-gana si mereha akap ngenenca. Itadingkenndu Aku. Itangtangindu uisndu, kenca bage nangkih kam ku ingan medemndu si galang, radu ras kalak singena atendu si iupahindu gelah ia medem ras kam. Janah i je ipuaskenndu me kerincuhen dagingndu.

⁹Erminak kam janah ipakendu minak wangi; kenca bage lawes kam ersembah man dibata-dibata Moloh. Isuruhndu persuruhen-persuruhenndu ku negeri-negeri si ndauh, janah seh ku doni kematen pe lako nungkuni kata i bas dibata-dibata si deban nari.

¹⁰Latih akapndu ndarami dibata-dibata si deban, tapi lalap kam la leja. Iakapndu si e kerina mereken gegeh man bandu, e maka lalap kam la ngelabuh.

¹¹Ise kin akapndu dibata-dibata si e ndai kerina maka mbiar kam ibahanna, seh maka nggit kam erguak ras ngelupaken Aku? Erkiteken enggo ndekah Aku sinik kin maka lanai ipehagandu Aku?

¹²Akapndu kin maka si ilakokenndu e payo? Tapi genduari Kubongkar ateKu kerina lagu langkahndu, janah gana-ganandu e labo ngasup nampati kam.

¹³Adi nderkuh kam mindo penampat, suruhlah gana-ganandu e nampatisa! Sekali sempul saja pe, minter ia kelayap kerina. Tapi kalak si ernalem i bas Aku ringan me i bas negeri e janah isembahna Aku i bas Rumah PertotonKu.”

¹⁴Nina TUHAN, “Pelepaslah bangsangKu mulih ku Aku. Agui kasa kai si ndongkeli i bas dalanna! Bahan janah sikapkenlah pasarna!

¹⁵Aku kap Dibata si Meganjang dingen Badia si erkuasa seh rasa lalap. Aku ringan i bas ingan si meganjang dingen badia, tapi pe Aku lit i tengah-tengah kalak meteruk rukur dingen erkadiola kerna dosa-dosana, gelah banci Kupekeke mulihi kiniteken ras pengarapenna.

¹⁶Kubereken geluh man bangsangKu, janah la lalap Kusalahken ia. Labo lalap Aku ernembeh ate man bana.

¹⁷Nembeh ateKu man bana erkiteken dosana ras rangapna. E maka Kuukum ras Kutadingken ia. Tapi lalap ia mekeng janah iteruskenna ndalani dalinna.

¹⁸Enggo Kuidah uga lagu langkahna; bage gia Kupepalem nge ia. Kutegu-tegu janah Kusampati ia, janah kalak si erceda ate Kuapuli.

¹⁹Kubereken dame man kerina kalak, subuk man si ndauh ras si ndeher. Kupepalem me bangsangKu. [122†]

²⁰Tapi kalak jahat bali ras lawit si la pernah teneng; galumbangna la pernah ngadi ergalun-galun maba kubang ras si melket-melket.

²¹La lit dame man kalak jahat,” nina TUHAN. [123†]