Read Batak Karo JESAYA 58 Bible Online

JESAYA 58 - Batak Karo bible

JESAYA 58

¹Nina TUHAN, “Ngeranalah asa gegehndu! Turiken man bangsangKu Israel kerna dosa-dosana.

²La erguna isembahna aku tep-tep wari, janah ngaku maka mesikel kal ia meteh dalanKu janah ngikutken undang-undangKu. Ikatakenna maka mesikel kal ia Kubereken undang-undang si bujur man bana, janah nina tole meriah kal iakapna rembak ras Aku.”

³Nungkun bangsa e nina, “Kai gunana kam erpuasa adi labo idah TUHAN? Kai gunana kita la man adi labo iperdiatekenNa?” Nina TUHAN man bangsa e, “Situhuna, tupung kam erpuasa keuntungenndu saja nge idaramindu janah si erdahinndu idedehindu.

⁴Puasandu e mahanca kam erjengil saja ngenca, rubat dingen ninjui kalak. Akapndu kin arah puasa si bage banci ipaksandu Aku megiken pertotonndu?

⁵Asum kam erpuasa isuhsahindu bandu; mungkuk bahanndu takalndu bali ras bulung bero, jenari ikimbangkenndu uis guni ras abu inganndu medem. E kin ikatakenndu puasa? Akapndu kin ngena ateKu perbahanen si bage?

⁶Enda kap puasa si ngena ateKu: Osarilah rante pengiket janah agui baban kinilabujuren, janah bebaskenlah kalak si idehkenndu.

⁷Raskenlah panganndu ras kalak si kelihen, janah berelah kalak musil si la lit rumahna kesilang i bas rumahndu. Berelah uis man kalak si la lit uisna, janah ola itulakndu kade-kadendu si mindo penampat. [124†]

⁸Adi bage perbahanenndu, ersinalsal me lias ateKu i babondu bali ras matawari erpagi-pagi, janah luka-lukandu lampas malem. Aku tetap rembak ras kam lako ngkelini kam, janah sinalsal kemulianKu tetap ngarak-ngarak kam.

⁹Adi ertoto kam, Kudengkehken pertotondu, janah adi erlebuh kam, minter Kualoi. Olanai idedehndu kalak, olanai kam megombang, janah olanai belaskenndu kata si la tahu kerna kalak;

¹⁰adi iberendu nakan man kalak si kelihen, janah isampatindu kalak si lit i bas kesusahen, adi bage kegelapen si lit sekelewetndu salih jadi terang seri ras ciger wari.

¹¹Aku tetap negu-negu kam dingen mesuri kam alu si mehuli. Kubahan kam tetap megegeh ras mejuah-juah. Kam desken peken si la kurang lau, desken sumbul lau si la pernah kerah.

¹²Kai si nai enggo runtuh, ipajekken bangsandu ka mulihi i babo palas si nuria. Terberita me kam pagi jadi si mpekena mulihi benteng-benteng e, dingen ngumban rumah si enggo runtuh.”

¹³Nina TUHAN, “Adi ipebadiakenndu wari Sabat janah adi i bas wari e la kam ndarami kepentingenndu jine; adi iergaindu waringKu si Badia e, janah ihamatindu alu la erdalan ndauh, la erdahin, tah pe ncakapken si sia-sia,

¹⁴adi bage idatndu me keriahen i bas kam ersembah man bangKu. Kubahan maka kam ihamati i belang-belang doni enda janah senang akapndu nggeluh i bas negeri si nai Kubereken man nini-ninindu, Jakup.” Bagenda me nina TUHAN.