Read Batak Karo JESAYA 59 Bible Online

JESAYA 59 - Batak Karo bible

JESAYA 59

¹Ola akapndu maka kurangsa gegeh TUHAN lako ngkelengi kam tah pe paseksa akapndu Ia lako ndengkehken sorandu erlebuh.

²Erkiteken dosa-dosandu nge maka la idengkehkenNa kam. Dosa-dosandu nge si nirangken kam ras Dibata.

³Sabap tanndu ras jari-jarindu keliamen erkiteken dareh ras kejahaten. Babahndu ras dilahndu melasken guak ras tipu.

⁴Ngadu kam ku pengadilen, tapi labo bujur sikerajangenndu. Ipenalemndu kata guak maka banci menang i bas perkarandu. Isehkendu sura-surandu erbanca mesui ate kalak.

⁵[5-6] Pertakin si ibahandu bali ras naruh nipe si erbisa si erbahanca kalak mate. Adi itaperkenndu naruh e, luar nipe! Tapi pertakinndu e labo erguna, man bandu, sabap bali kap e ras uis si ibahan i bas banto lawah-lawah nari.

⁷Rusur irencanakenndu si jahat, janah kurang pedas akapndu ndalankenca. La kam alang-alangen munuh kalak si la ersalah. Kujapa pe kam lawes bekas radas ras kecedan ngenca itadingkenndu i bas dalanndu. [125†]

⁸La ietehndu dalan dame. Kasa kai si ilakokenndu pelin-pelin si la bujur. Erdalan kam arah dalan si la pinter, janah la lit ise pe si erdalan arah e banci dat dame.

⁹Nina bangsa e, “Genduari ieteh kami ngkai maka la ikelini Dibata kami i bas kalak si nindas kami nari. Itima-timai kami terang, tapi gelap ngenca lit.

¹⁰Bagi kalak pentang, terdadap-dadap kami ku jah ku je. Jurembat kami sanga siang wari, tempa-tempa sanga berngi; tempa-tempa kami ringan i bas doni kematen si gelap.

¹¹Ndehereng kami bagi mbaruang, sora kami enggo pero bagi sora ndrapati engkukui. Tertima-tima kami gelah ikelini Dibata i bas kalak si ndedeh kami nari, tapi sia-sia.”

¹²Jenari nina bangsa e man TUHAN, “O TUHAN, mbue kal kejahaten kami man bandu. Dosa-dosa kami nalahken kami. Igejap kami kal kerina si e.

¹³Ilawan ras itulak kami Kam, janah la kami nggit ngikutken Kam. Itindas kami kalak si deban, janah itadingken kami Kam. Pusuh kami dem alu taki; kata-kata kami guak kerina.

¹⁴Keadilen ipelawes, janah kebenaren ipedauh. Ketuhu-tuhun tertuktuk i tengah-tengah jelma si nterem, janah kebujuren la lit inganna.

¹⁵Lanai lit piga kalak si bujur, seh maka kasa kai kalak si menaken erbahan bujur, ia jine rate mesui erkiteken kejahaten kalak man bana.” TUHAN enggo ngidah si enda, janah nembeh ateNa perbahan lanai lit kebujuren.

¹⁶Sengget kal Ia ngidahsa sabap lanai lit ise pe nampati kalak si ikicatken. Erkiteken si e ipakeNa gegehNa jine lako mulahisa janah iberekenNa kemenangen man bana. [126†]

¹⁷IpakeNa me kebujuren desken baju besi dingen kemenangen desken topi waja. IuisiNa baNa alu kebulaten ukur lako majekken kebenaren janah ngukum ras erbalas nandangi kejahaten si mahan kalak mesera. [127†]

¹⁸IukumNa me imbang-imbangNa sue ras perbahanenna, subuk si ringan i bas ingan si ndauh.

¹⁹I kenjahe nari terus ku kenjulu, kerina pagi kalak mbiar man baNa ras man kuasaNa si mbelin. Ia reh desken lau belin si meter, desken angin si megegeh.

²⁰Nina TUHAN man bangsaNa, “Reh me Aku ku Jerusalem lako ngkawali ras engkelini kerina kam si nadingken dosa-dosandu. [128†]

²¹Janah Kubahan sada perpadanen ras kam, e me: enggo Kubereken gegehKu ras pengajarenKu jadi sikerajangenndu seh rasa lalap, janah mulai genduari nari arus ikutkenndu Aku. Anak-anakndu ras kesusurenndu pe arus iajarindu maka erkemalangen man bangKu genduari nari seh rasa lalap.”