Read Batak Karo JESAYA 6 Bible Online

JESAYA 6 - Batak Karo bible

JESAYA 6

¹I bas tahun kematen Raja Usia, kuidah TUHAN. Ia sanga kundul i kursi kemulianNa si meganjang, janah jubahNa ndemi kerina Rumah Pertoton. [8†]

²I sekelewetNa tedis malekat serafim si ernala-nala bagi api. Teptep serafim lit enem kabengna. Dua kabengna nutupi ayona, dua nari nutupi nahena, janah alu kabengna si dua nari kabang ia.

³Silebuh-lebuhen ia nina, “Badia, badia, badia! TUHAN si Mada Kuasa badia kap! Doni enda dem alu kemulianNa.” [9†]

⁴Palas Rumah Pertoton e mugur-ugur ibahan sorana janah Rumah Pertoton e dem alu asap. [10†]

⁵Erkiteken si e ningku, “Cilaka aku, lanai lit arapen man bangku. Bene me aku sabap alu matangku enggo kuidah Raja, TUHAN si Mada Kuasa, adi tep-tep ranan si mentas arah biberku dosa kerina, janah aku pe ringan i tengah bangsa i ja tep-tep kata si ibelaskenna dem alu dosa.”

⁶Kenca bage sada i bas malekat srafim ndai nari kabang ndahi aku. Ibabana rara si ibuatna i bas batar-batar persembahen nari alu jepit-jepit.

⁷Ikuitna biberku alu rara ndai, jenari nina, “Rara enda enggo ngkenai biberndu, e maka genduari salahndu enggo masap janah dosandu enggo ialemi.”

⁸Kenca bage kubegi Tuhan ngerana nina, “Ise ndia Kusuruh? Ise ndia nggit maba berita i bas Aku nari?” E maka ningku ngaloi, “Aku, suruhlah aku!”

⁹E maka isuruhNa aku lawes nehken berita enda man bangsa e nina, “Rusur gia ibegindu, tapi labo ietehndu. Rusur gia idahndu, tapi labo ietehndu kai si jadi.” [11†]

¹⁰Jenari ikatakenNa man bangku nina, “Bahan maka batu-batun ukur kalak enda, pepasek pinggelna, pepentang matana, sabap adi erpengidah ia, tah erpemegi janah erpengangka, tentu reh ia ndahi Aku, jenari malem ia.”

¹¹E maka nungkun aku, “Seh ndigan bage TUHAN?” Jabap TUHAN, “Seh kerina kuta e runtuh janah lume, seh kerina rumahna lanai i iani, seh negeri e melungen dingen terulang.

¹²Kupelawes pagi bangsa e ku ingan si ndauh, seh kerina negeri e mesuni.

¹³Janah adi lit denga gia sepersepuluhna si tading i bas negeri e, e pe iradasken nge, bali ras tongkeh kayu galang si enggo itabah.” (Tongkeh kayu e banci iumpamaken ras pemenan si mbaru i bas bangsa Dibata.)