Read Batak Karo JESAYA 61 Bible Online

JESAYA 61 - Batak Karo bible

JESAYA 61

¹Kesah TUHAN si Erdolat lit i babongku. Enggo ipilihNa aku, lako maba berita si mehuli man kalak musil. Isuruhna aku pepalem kalak si getem pusuhna, meritaken kebebasen man kalak si tertaban; janah kalak si i bas penjara enggo banci ndarat ia. [132†] [133†]

²IsuruhNa aku momokenca, maka enggo seh kepe paksana TUHAN ngkawali bangsaNa, janah erbalas Ia man musuh-musuhNa. Kerina kalak si rate ceda, isuruhNa aku ngapulisa. [134†]

³Man anak kuta Sion si erceda ate, mereken keriahen gancih ndele ate, ende-enden pujin gancih ukur si kote. Ia igelari Batang Kayu Kebenaren, si isuanken TUHAN tama kemulianNa.

⁴Kuta si runtuh, si enggo ndekah mesuni, ipajekkenna ka me pagi mulihi.

⁵O bangsangKu, erdahin pagi bangsa si deban man gunandu; ipermakanina asuh-asuhenndu, iperjumaina jumandu, janah iarak-arakna peken anggurndu.

⁶Kam igelari kap imam TUHANta, suruh-suruhen nu Dibatanta. Kebayaken bangsa-bangsa si deban kam ngenanamisa, janah megah akapndu perban kam empuna.

⁷Dage perban kam ipemela-mela dua kali lipat janah kam iciduri ras igombangi, e maka i bas negerindu jine kebayakenndu erlipat ganda janah keriahenndu lit asa si ndekah-ndekahna.

⁸Nina TUHAN, “Ngena ateKu kebujuren, tapi ciga ateKu penindasen ras kejahaten. Man bangsangKu la banci lang tetap Kubereken upahna, janah Kubahan perpadanen si nteguh rasa lalap ras ia.

⁹I belang-belang doni, itandai kalak kesusurenna, terberita i bas kerina bangsa-bangsa. E maka kasa kai kalak si ngidahsa ngaku, maka ia me bangsa si Kupasu-pasu.”

¹⁰Nina Jerusalem, “Meriah kal kuakap erkiteken TUHAN, tendingku ersurak erkiteken perbahanenNa. Desken penganten tupung kerja perjabunna, make paken si seh kal jilena, bage me TUHAN nguisi aku alu keselamaten ras kemenangen. [135†]

¹¹Bali ras benih si iamburken ku bas taneh la banci lang turah, bage me la banci lang ikeliniNa bangsaNa, janah ipeturahNa puji-pujin man baNa i bas kerina bangsa-bangsa.”