Read Batak Karo JESAYA 62 Bible Online

JESAYA 62 - Batak Karo bible

JESAYA 62

¹Guna Jerusalem, la terbahan aku la ngerana, erkiteken Sion, la ateku sinik saja. Seh maka keselamaten kuta e ersinalsal terang bagi matawari ras kemenangenna harhar bagi obor si gara sanga berngi.

²O Jerusalem, idah bangsa-bangsa me kemenangenndu, kerina raja-raja ngidah kemulianndu. Ibahan me gelarndu gelar si mbaru, janah TUHAN jine mereken gelar e man bandu.

³I bas tan TUHAN kam bali ras sada mahkota, mahkota si mejile sikerajangen Dibata.

⁴Kam lanai igelari ‘Si nitadingken’, negerindu lanai ikataken, ‘Ndehara si kelungunen’. Tapi kam igelari, ‘Si ngena ate Dibata’, janah negerindu ikataken, ‘Enggo tersereh ia’. Sabap ngena ate TUHAN man bandu, janah Ia desken perbulangen man tanehndu.

⁵Desken anak perana ngempoi singuda-nguda, bage me si nepa ngempoi kam. Desken penganten dilaki meriah ukurna erkiteken ndeharana, bage me Dibata meriah ukurNa erkiteken kam.

⁶I datas tembokndu o Jerusalem, enggo kutamaken si erjaga; suari ras berngi la banci sinik ia, ipersingetinalah kerna TUHAN ras padan-padanNa, janah asa ndigan pe ola bere ilupakenNa.

⁷La erngadi-ngadi arus ipindona, gelah Jerusalem ipajekken TUHAN ka, janah gelah kuta e pagi, jadi kuta si terpuji i belang-belang doni.

⁸Alu sumpah TUHAN enggo erpadan, maka arah kuasaNa la banci lang jadi, “Gandumndu lanai ipan musuhndu, janah bangsa si deban lanai nginemi anggurndu, si enggo ipepulungndu alu kelatihenndu.

⁹Tapi kam si nuanken janah si perani gandumndu, ipanndu me buahna, dingen ipujindu TUHAN. Kam si miara ras si perani buah anggur, inemndu me launa i kesain Rumah Pertoton.”

¹⁰O kalak Jerusalem, ndaratlah kam arah kerabangen; man bangsandu si mulih i negeri si ndauh nari, bahanlah dalan. Sikapkenlah pasar si mbelang, agui batu-batuna; pajekken bendera jadi tanda man bangsa-bangsa.

¹¹ TUHAN enggo erberita ku belang-belang doni nina, “Kataken man kalak Jerusalem kerina, ‘Enam reh TUHAN engkelini kam. Nehenlah, ras-ras kerehenNa, ibabaNa upah man bangsaNa.’ ” [136†]

¹²Kam, igelari me ‘Bangsa Dibata si Badia’; ‘Bangsa si enggo ikelini TUHAN’. Kuta Jerusalem igelari me ‘Kuta si idarami Dibata’, ‘Kuta si la itadingken TUHAN’.