Read Batak Karo JESAYA 63 Bible Online

JESAYA 63 - Batak Karo bible

JESAYA 63

¹“Ise kin kam, si reh i kuta Bosra, i negeri Edom nari? Ise kin kam si ruisken uis mejile, megara rupana, si erdalan alu kuasa ras gegeh?” Nina TUHAN, “Aku kap enda, TUHAN si erkuasa ngkelini; Aku reh meritaken kemenangenKu.” [137†]

²“Engkai maka bage kal garana rupa uisndu, bali ras rupa uis kalak si ngerik buah anggur?”

³Nina TUHAN ngaloi, “Sabap bangsa-bangsa enggo Kuerik bagi buah anggur, janah la lit ise pe si nampati Aku. Perban nembehna ateKu enggo Kuerik ia, janah darehna mbincar ku uisKu. [138†]

⁴Enggo Kutetapken maka paksana enggo seh lako ngkelini bangsangKu; enggo seh paksana ngukum musuh-musuhna.

⁵Jengang kal Aku, sabap tupung Kutatap ku sekelewetKu, la lit ise pe reh nampati Aku. Tapi perban rawana ateKu, megegeh Aku, janah menang Aku alu la ise pe nampatisa. [139†]

⁶Erkiteken rawangKu, Kuperjati kerina bangsa-bangsa janah Kuripukken, darehna Kuamburken ku taneh.”

⁷Ateku nuriken kerna kekelengen TUHAN si la lit sibarna, kupuji Ia, erkiteken kasa kai si enggo ibahanNa. Man bangsa Israel enggo mbue kal pasu-pasuNa, erkiteken kekelengenNa si tetap ras perkuah ateNa.

⁸Nina TUHAN, “BangsangKu kap ia, e maka labo banci Aku itipuna.” Erkiteken si e ikelinina bangsa e

⁹i bas kerina kiniseranna nari. Labo malekat, tapi TUHAN jine kap si ngkelinisa. Erkiteken kekelengenNa ras perkuah ateNa, ipulahiNa bangsa e. I bas paksa si enggo lepas lalap ipekena-kenaNa ia,

¹⁰tapi ilawanna TUHAN janah ceda kal ate TUHAN ibahanna. Erkiteken si e TUHAN erkusur jadi imbangna, janah iperangi TUHAN bangsa e.

¹¹I jem teringet bangsa e kempak paksa si enggo lepas, kempak Musa, suruh-suruhen TUHAN nai, janah nina, “I ja genduari TUHAN si ngkelini peminpin-peminpin bangsaNa i bas lau lawit nari? I ja kin TUHAN si mereken kesahNa si badia man Musa?

¹²[12-13] I ja kin TUHAN, si ngelakoken perbahanen si mbelin alu kuasaNa arah Musa? Erbelah ibahanNa lau lawit jenari itaruhkenNa bangsaNa arah lau si mbages e, gelah datca gelar si termur-mur seh rasa lalap.” Arah penegu-negu TUHAN, perdalanna paguh desken kuda i mbalmbal janah la pernah tertuktuk. [140†]

¹⁴Desken rarasen lembu si igera ku baluren si mehumur, bage me TUHAN mereken pengadi-ngadin man bangsaNa. Itegu-teguNa bangsaNa erkiteken si e ermulia gelarNa.

¹⁵O TUHAN, tatap min kami i Surga nari, inganNdu si badia dingen mulia. I ja kin kuasa ras kinimbisanNdu? I ja kin kekelengen ras perkuah ateNdu? I ja dage pusuhNdu si rusur ertedeh ate nandangi kami? Ola min Kam ndiri-ndiri ngenehen kami.

¹⁶Ma Kam kin Bapa kami? Abraham ras Jakup labo nandai kami. TUHAN, Kam nge si tuhuna Bapa kami, si ngkelini kami i bas paksa si nuria nari.

¹⁷Engkai maka ipediat kam kami papak? Engkai maka ibahan Kam ukur kami mersik, seh maka lanai kami mbiar nimbak? Mulihlah Kam TUHAN, erkiteken suruh-suruhenNdu, erkiteken nai nari bangsa e sikerajangenNdu.

¹⁸Engkai maka ipediatNdu musuh merjaki RumahNdu si Badia, ngkai maka ibereNdu kami sempat itabanna?

¹⁹Kami tempa-tempa la pernah irajaiNdu, tempa-tempa kami la bangsaNdu.