Read Batak Karo JESAYA 65 Bible Online

JESAYA 65 - Batak Karo bible

JESAYA 65

¹Nina TUHAN, “Si tuhuna enggo me ersikap Aku ndengkehken pertoton bangsangKu, tapi la ia ertoto. Enggo ersikap Aku maka banci ijumpaina, tapi la icubakenna pe ndarami Aku. Bangsa e la ertoto man bangKu, aminna pe Aku tetap ersikap ngaloisa, ‘Enda Aku, banci kam Kusampati.’ [142†]

²La erngadi-ngadi Kududurken tanKu ngalo-ngalo bangsangKu si pemberontak, aminna pe lepak rusur perbahanenna, janah idalanina nge dalinna jine. [143†]

³Rusur ibahanna ateKu nembeh. Ipersembahkenna persembahen man dibata-dibata si deban i bas peken-peken ras itutungna kumenen i babo batar-batar.

⁴Sanga berngi lawes ia ku guha kuburen-kuburen, nungkuni begu kalak si enggo mate. Ipanna daging babi dingen inemna kuah daging si ipersembahkenna man dibata-dibata si deban.

⁵Jenari ikatakenna man kalak si deban, ‘Ola deheri kami, kami enggo badia kal, e maka pantang idadapndu!’ Ciga ateKu ngenehen kalak si bage; pernembeh ateKu man bana gara desken api si la ernimpet-nimpet.

⁶Enggo Kuputusken erbahan pembalasen nandangi kejahatenna. La Aku nggit ngelupaken perbahanenna, janah la banci lang Kuukum ia,

⁷erkiteken dosa-dosana ras dosa nini-ninina. Itutungna kumenen man dibata-dibata si deban i das uruk-uruk janah ibelaskenna si jahat kerna Aku. Erkiteken si e Kuukum me ia sue ras perbahanenna si enggo lepas.”

⁸Nina ka TUHAN tole, “Labo lit kalak si encedaken buah anggur si mehuli tapi ibahanna nge anggur i bas buah si mehuli e nari. Bage me pe, labo ateKu engkernepken bangsangKu kerina, tapi Kukelini kerina kalak si ngelakoken sura-surangKu.

⁹Kupasu-pasu kalak Israel kesusuren suku Juda, janah taneh deleng-delengKu Kubereken jadi sikerajangen kesusurenna. Bangsa pilihenKu si ngelakoken sura-surangKu, ringan me i je.

¹⁰Isembahna Aku janah ipermakanina biri-biri ras lembuna ku mbalmbal i bas Kendit Saron i kenjahe, janah i bas Baluren Kesusahen i kenjulu. [144†]

¹¹Tapi nasipndu labo bage, o kam si nadingken Aku, si la mperdiateken Sion, delengKu si Badia, bage pe kalak si nembah Gat ras Meni, si igelari dibata-dibata kesangapen ras nasip.

¹²Kam enggo itentuken maka mate ibunuh kalak, erkiteken la ialoindu tupung kam Kulebuh, janah la ibegikenndu tupung Aku ngerana. Ulin akapndu erbahan si la ngena ateKu janah ngelakoken si jahat.

¹³E maka Kukataken man bandu maka kalak si nembah ras si erkemalangen ngikutken Aku, cukup pangan ras inemenna, tapi kam muas dingen melihe akapndu. Ia malem atena, tapi kam mela akapndu.

¹⁴Ia rende alu meriah, tapi kam tangis erkiteken getem pusuhndu.

¹⁵Bangsa pilihenKu make gelarndu pagi i bas numpahi kalak. Aku, TUHAN si Erdolat, la banci lang munuh kam. Tapi man kalak si ngikutken Aku, Kubereken gelar si mbaru.

¹⁶Kasa kai kalak si lit i bas negeri e si atena mindo pasu-pasu, ipindona pagi gelah Dibata si tuhu-tuhu masu-masu ia. Ise ngangkat sumpah, i bas gelar Dibata si tuhu-tuhu e pagi ia ersumpah. Kesusahen i bas paksa si enggo lepas, masap me janah ilupaken.”

¹⁷Nina TUHAN, “Kutepa doni si mbaru ras langit si mbaru. Kejadin-kejadin si enggo lepas ilupaken kerina. [145†]

¹⁸Ersurak ras ermeriahlah seh rasa lalap erkiteken kai si Kutepa. Jerusalem si mbaru si Kutepa e, dem pagi alu keriahen janah kalak si ringan i je malem atena nggeluh.

¹⁹Aku jine pe dem alu keriahen erkiteken Jerusalem ras bangsangKu si ngianisa. Lanai lit kalak tangis i je, lanai lit kalak erlebuh mindo penampat. [146†]

²⁰Anak-anak lanai mate tupung ia gara-gara denga, janah umurna gedang pagi kerina. Kalak si umurna seratus tahun ikataken ia nguda denga. Kalak si mate ope denga umur si bage, e tandana maka Kuukum ia.

²¹[21-22] Ipajekken bangsangKu pagi rumah janah ia nge ngiani rumah e, labo kalak si deban. Isuanna batang anggur janah ia nge si ngenanami ulihna, nggedang pagi umur bangsangKu, bali ras batang kayu i kerangen. Kasa kai ulihna latih, tuhu-tuhu kal inanamina.

²³Kelatihenna la sia-sia, janah anak-anakna pe la jumpa cilaka. Kupasu-pasu ia ras kerina kesusurenna terus ku bas paksa-paksa si reh.

²⁴Ope denga ia erlebuh enggo Kualoi, sanga ia ngerana denga enggo Kubegiken.

²⁵Anak biri-biri radu nggagat ras serigala; singa pe man dukut bali ras lembu, janah nipe lanai man kebiaren. I Sion, delengKu si badia, lanai lit si ncedai tah pe si jahat.” [147†]