Read Batak Karo JESAYA 7 Bible Online

JESAYA 7 - Batak Karo bible

JESAYA 7

¹Asum Raja Ahas, anak Jotam kempu Usia, jadi raja i Juda, pecah me perang. Resin raja Siria, ras Peka anak Remalia raja Israel reh nerang Jerusalem, tapi la tertalukenca. [12†]

²Kenca iberitaken man raja Juda maka tentera Siria enggo seh i Israel, mbiar kal raja Juda ras rayatna, nggirgir ia kerina desken batang kayu si mugur-ugur iembus angin.

³Jenari nina TUHAN man Jesaya, “To baba anakndu Sear Jasup njumpai Raja Ahas. Idapetindu ia kari i bas ujung parik dalan lau maler i bas kolam si arah gugung nari, e me ingan si biasa ipake kalak naptapi uis erdahin.

⁴Kataken man bana gelah ia erjaga-jaga tapi tetap teneng. La pada ia mbiar, la pada gulut ukurna. Amin uga rawana pe Raja Resin, ras tenterana kalak Siria e, bage pe Raja Peka, labo e man kebiaren, sabap labo lebih e asangken cimber dua ciken si sangana meseng.

⁵Siria ras Israel rikut ras rajana enggo erpekat.

⁶Iserangna atena Juda, janah ipebiar-biarna rayat Juda gelah ergabung ras ia, janah kenca bage iangkatna atena anak Tabeel jadi raja.

⁷Tapi Aku, TUHAN, ngatakenca maka si e la banci ndigan pe jadi.

⁸Engkai? Erkiteken Siria labo gegehen asangken ibukotana Damaskus, janah Damaskus labo gegehen asa Raja Resin. Adi kerna Israel, enem puluh lima tahun nari negeri e la banci lang enggo terpecah-pecah seh maka negeri e lanai sada bangsa.

⁹Israel labo gegehen asa ibukotana Samaria, janah Samaria labo gegehen asa Raja Peka. Adi kinitekenndu la nteguh, tentu kam ndabuh.”

¹⁰Itenahken TUHAN ka sada nari berita man Ahas nina,

¹¹“Pindolah tanda man TUHAN, Dibatandu, tanda e banci i bas ingan si mbages nari e me kematen, tah pe i bas ingan si meganjang i Surga nari.”

¹²Ngaloi Ahas nina, “La aku nggit mindo tanda. La ateku ncubai TUHAN.”

¹³Megi si e nina Jesaya njabapsa, “Genduari begikenlah o kesusuren Raja Daud. Kesabaren manusia enggo keri ibahanndu; la kin akapndu bias e, maka kesabaren Dibata pe ikerikenndu ka atendu?

¹⁴Dage TUHAN genduari mereken tanda man bandu e me: Mehuli me pagi kula sekalak singuda-nguda jenari ipupusna me sekalak anak dilaki janah ibahanna gelarna ‘Imanuel’. [13†]

¹⁵Kenca enggo pagi dem belinna, dingen ngasup ia erbahan keputusen jine, i je me pagi bangsa enda minem susu ras man tengguli.

¹⁶Tuhu, ope denga seh pe paksa si e, negeri raja si dua e si pebiar-biar kam genduari e, enggo pagi jadi ingan si melungen.

¹⁷Reh me man bandu, man rayatndu ras man kerina keluarga raja wari-wari kesusahen si mberat, beraten asa si pernah jadi kenca Israel erleka ras Juda, sabap ibaba TUHAN me ku jenda raja Assur.

¹⁸Adi enggo seh pagi paksa si e, idilo TUHAN me kalak Mesir ras kalak Assur gelah ia reh ku jenda. E maka reh me ia pagi desken laneng si nerang i Lau Nil nari, desken wani i negeri Assur nari.

¹⁹Icinepina me kerina baluren-baluren, liang-liang si lit i bas batu, janah idemina kerina rambah-rambah si erduri bage pe kerina mbalmbal.

²⁰Adi enggo seh pagi paksa si e, iupahi Tuhan me sekalak tukang pangkas, e me raja Assur i lepar Lau Eprat nari, janah labo buk takal saja ngenca icukurna, tapi terus ku mbulu paha pe mejelis ibahanna.

²¹Sanga si e pagi sada lembu ras dua kambing ngenca iasuhi kalak,

²²janah susu lembu ras susu kambing e nari ngenca man pangan kalak. Tuhu, kalak si lit denga tading i bas negeri e susu ras tengguli kerangen nari ngenca panganna.

²³I bas paksa si e pagi, peken anggur si mehuli si isin seribu batang anggur, janah ergana seribu duit pirak, jadi peren janah turah i je bungke rimbang ras rambah duri.

²⁴Ingan e enggo jadi ingan kalak erburu alu panah ras anak panah. Tuhu, kerina negeri e pagi dem alu bungke rimbang ras rambah duri.

²⁵Kerina uruk-uruk si gelgel nari iperjumai, enggo dem rambah si erduri seh maka lanai lit ise pe lawes ku je. Peken si mejile e enggo salih jadi ingan lembu ras biri-biri cigagat.”