Read Batak Karo JESAYA 8 Bible Online

JESAYA 8 - Batak Karo bible

JESAYA 8

¹Ikataken TUHAN man bangku nina, “Buat sada batu tulis si mbelang jenari suratken i je tulisen si terang, ‘Pedas irampas, Rempet irampas.’

²Dilo dua kalak saksi si terteki e me Imam Uria ras Imam Sakaria anak Jeberekia.”

³La asa kai nari dekahna, mehuli me kula ndeharangku. Kenca tubuh sekalak anak kami dilaki nina TUHAN man bangku, “Bahan gelarna Pedas Irampuk -- Kotep Irampuk.

⁴Sabap ope denga anak e beluh ngataken ‘Bapa’ ras ‘Nande’, kerina kebayaken Damaskus ras kerina barang rampasen si lit i Samaria iangkut raja Assur pagi.”

⁵Ngerana ka TUHAN man bangku nina,

⁶“Erkiteken bangsa enda la nggit ngaloken Lau Siloa si manjar-anjar permalerna, janah nggirgir ia i lebe-lebe Raja Resin ras Raja Peka,

⁷e maka Aku, Tuhan, ateKu maba raja Assur ras kerina tenterana lako nerang Juda. Reh me ia desken Lau Eprat si banjir si enggo mulsak arah tebing-tebingna.

⁸Ergalun arah Juda desken banjir, launa nangkih seh kerahung.” Dibata kap ras kita! KabengNa ikirbangkenNa ngkawali negeri e.

⁹O bangsa-bangsa, pulunglah, tapi gentar nge kam. O negeri-negeri si ndauh begikenlah! Ersikaplah kam erperang, tapi birawan me. Tuhu, ersikaplah, tapi alu gentar!

¹⁰Bahanlah rencanandu, tapi ndigan pe labo tersehkenndu. Belasi sajalah uga atendu, tapi sia-sia nge kerina, sabap Dibata ras kami.

¹¹Alu kuasaNa si mbelin ipersingeti TUHAN aku gelah ola ngikutken lagu langkah jelma si nterem. IkatakenNa man bangku nina,

¹²“Ola kam nggit ikut i bas pertakin si ibahan bangsa enda, janah ola kam mbiar nandangi kai si ibiarina. [14†]

¹³Inget, maka Aku, TUHAN si Mada Kuasa, badia kap; man bangKu ngenca kam arus mbiar.

¹⁴Erkiteken kebadianKu, Aku desken batu si erbahanca kalak tertutuk. Aku desken siding si nidingi rayat kerajan Juda ras Israel bage pe penduduk Jerusalem. [15†]

¹⁵Nterem pagi kalak si tertutuk; jongkang ia janah mbelkam lukana. Kerina ia kena perangkap.”

¹⁶Kam ajar-ajarku arus njaga ras muniken kata si enggo ibereken Dibata man bangku.

¹⁷Ibuniken TUHAN diriNa i bas bangsaNa nari, tapi aku ernalem ras erpengarapen man baNa. [16†]

¹⁸Aku ras anak-anakku si ibereken TUHAN si Mada Kuasa, si ringan i Deleng Sion, enggo isuruhNa jadi berita si nggeluh man bangsa Israel. [17†]

¹⁹Tapi jelma si nterem ugapa pe nuruh kam gelah nungkun berita i bas guru perkatika ras guru si baso nari, si erkata kerahungna ras guru pertabas. Nina kalak si nterem e, “Ma arus kin kita nungkun keramat-keramat ras begu kalak mate guna kiniulin kalak si nggeluh.”

²⁰E maka arus i jabapndu ia, nindu, “Begikenlah kai si iajarken TUHAN man bandu. Ola begiken guru-guru si baso, sabap kai si ikatakenna labo lit gunana man bandu.”

²¹Isiar-siari bangsa e belang-belang negeri; kelihen dingen tumpat ukurna kerina. Erkiteken lihena janah perban nembehna atena isumpahina rajana ras Dibatana. Aminna itarena pe ku langit,

²²tah inehenna ku taneh, la lit kai pe iidahna seakatan kesusahen ras kegelapen. Ku bas kegelapen si mejin e me ia kerina igurba.