Read Batak Karo JESAYA 9 Bible Online

JESAYA 9 - Batak Karo bible

JESAYA 9

¹Tapi negeri e labo lalap i bas kepiceten. Daerah si iani suku Sebulon ras Naptali, nai igombang-gombangi; tapi denggo ipehaga, mulai i Lawit Tengah nari ku kenjulu, ku daerah si lit arah lepar Lau Jordan, ingan bangsa-bangsa si deban. [18†]

²Bangsa si nggeluh i bas kegelapen enggo ngidah sinalsal si erkinar. Kalak si ringan i bas awih-awih kematen enggo isalsali terang si harhar. [19†]

³Enggo iberekenNdu keriahen si mbelin, o TUHAN, malem atena ibahanNdu. Meriah ukurna ngidah perbahanenNdu, bali ras kalak si ermeriah ukur tupung paksa peranin, tah pe asum mbagi-mbagiken barang rampasen.

⁴Sabap enggo iambekkenNdu babanna si mberat, enggo ipenggelkenNdu lanja-lanja si erbanca mesui barana. Bangsa e enggo italukenNdu, bangsa si alu kejam nindas bangsaNdu, enggo italukenNdu ia bagi tentera Midian nai.

⁵Sepatu tentera si reh nerang bangsaNdu, bage pe uisna si megara erkiteken dareh, isuluh keri ipan api.

⁶Sekalak anak enggo tubuh man banta, anak dilaki ibereken banta. Ia me pagi jadi peminpinta. Ia igelari: “Penampat si meganjangna”. “Dibata si Mada Kuasa”. “Bapa si Rasa Lalap”. “Raja Dame”.

⁷Kuasana tetap reh belangna; janah kerajanna lalap lit i bas dame. Ia jadi gancih Raja Daud. Ia merentah erpalasken kebenaren ras kebujuren, genduari nari seh rasa lalap. Si enda kerina jadi sabap bage kap sura-sura TUHAN si Mada Kuasa. [20†]

⁸Ukumen enggo idabuhken Tuhan man kerajan Israel, man kerina kesusuren Jakup.

⁹Kerina kalak Israel, kerina kalak si ringan i kuta Samaria, metehsa maka Tuhan me si mereken ukumen e. Genduari alu megombang ras meganjang ukur nina,

¹⁰“Rumah gedung batu bata nai enggo runtuh tapi isambari kami pagi alu gedung batu. Balok-balok kayu meranti enggo itabah, tapi isambari kami alu kayu si deban si ndauh ulin asa si e.”

¹¹ TUHAN enggo nuruh musuh ngelawan bangsa Israel.

¹²Enggo nganga babah Siria arah Timur bage pe Pilisti arah Barat lako nelen Israel. Amin bage gia pernembeh ate TUHAN langa ngadi; iawatkenNa denga tanNa lako ngukum bangsa e.

¹³Bangsa Israel langa jera; aminna pe TUHAN si Mada Kuasa enggo ngukum ia, tapi lalap ia langa mulih kempak TUHAN.

¹⁴Erkiteken si e i bas sada wari saja iukum TUHAN kerina peminpin-peminpin Israel ras rayatna. Ikeret TUHAN takalna ras ikurna.

¹⁵Takalna e me kap tua-tua ras kalak si mehaga, janah ikurna e me kap nabi-nabi si mereken pengajaren si papak.

¹⁶Peminpin-peminpin bangsa enda ngguluti kap perasatna, ibabaina rayatna papak.

¹⁷Erkiteken si e la ibere Tuhan sada pe anak perana pulah, janah diberu balu-balu ras anak melumang la ateNa mekuah, perban kerina lanai mbiar man Dibata, lagu langkahna la mehuli, enggo jahat kerina si ibelaskenna. Tapi amin bage pe, pernembeh ate TUHAN langa ngadi, iawatkenNa denga tanNa lako ngukum bangsa e.

¹⁸Kejahaten bangsa e desken api gara si ngeradasken rambah ras peren erduri. Apina gurlah desken api kerangen meseng, janah cimberna erdipul ku das.

¹⁹Erkiteken bage nembehna ate TUHAN si Mada Kuasa, ukumen si ibahanNa gurlah desken api i belang-belang negeri e, janah si jadi rantingna e me bangsa e jine. La lit sada pe si erkuah ate man seninana.

²⁰I belang-belang negeri e, kasa kai jumpa barang-barang si terpan minter ijerngemna jenari ipanna; tapi bage gia lalap nge melihe akapna. Erkiteken si e anakna jine pe ipanna!

²¹Kalak Manase ras kalak Eperaim si perang-perangen sapih-sapih ia jenari ras-ras ia nerang Juda. Tapi amin bage pe pernembeh ate TUHAN langa ngadi; iawatkenNa denga tanNa lako ngukum bangsa e.