Read Batak Karo IMAMAT 1 Bible Online

IMAMAT 1 - Batak Karo bible

IMAMAT 1

¹Ilebuh TUHAN Musa i bas Kemah Perjumpan nari, jenari iberekenNa aturen-aturen si tersena enda,

²gelah ipatuhi kalak Israel sanga ia mpersembahken persembahenna. Ise atena mpersembahken asuh-asuhen, banci ipersembahkenna: lembu, biri-biri, tah pe kambingna.

³Adi atena lembu ipersembahkenna jadi sada persembahen tutungen, arus ipersembahkenna jenggi lembu si mejilena kal. Lembu e arus ipersembahkenna i bas dalan bengket ku bas Kemah Perjumpan, gelah ialoken TUHAN ia.

⁴Kalak si mpersembahkenca arus ngamparken tanna i babo takal asuh-asuhen e. Alu bage ialoken me persembahen e jadi sada persembahen pengalemi dosa-dosana.

⁵Lembu e arus igelehna i je, janah imam-imam kesusuren Harun mpersembahken dareh asuh-asuhen e man TUHAN, jenari ncurcurkenca ku empatna dingding batar-batar persembahen si lit i bas dalan bengket ku bas Kemah Perjumpan e.

⁶Jenari asuh-asuhen e ikuliti kenca bage ilapahi.

⁷Kenca enggo iatur imam-imam ranting i babo batar-batar ingan persembahen e, janah kenca enggo ipegarana api,

⁸itamaken lah ku babo api e rubia-rubia si enggo ilapahi ndai, ikut pe takalna, ras tabeh-tabehna.

⁹Tuka-tuka ras paha si arah pudi rubia-rubia e arus iburihi. Kenca bage maka imam si ngelakoken dahin e nutungi kerina persembahen e i babo batar-batar ndai. Bau persembahen tutungen enda merim iakap TUHAN.

¹⁰Adi ipersembahkenna biri-biri ntah kambingna, aruslah bajarna si la lit man pandangen.

¹¹Igelehna lah biri-biri tah kambing e arah Utara batar-batar, kenca bage maka imam-imam kesusuren Harun ncurcurken dareh asuh-asuhen ndai ku empatna dingding batar-batar ingan persembahen e.

¹²Kenca asuh-asuhen e ilapahi, imam si ngelakoken dahin e namakenca ku babo api, ikut pe takal ras tabeh-tabehna.

¹³Iburihina tukana ras bitesna e maka ipersembahken imam persembahen e man TUHAN, kerina itutung i babo batar-batar ingan persembahen. Bau persembahen tutungen e merim iakap TUHAN.

¹⁴Adi kalak mpersembahken sada perik jadi persembahen tutungen, ipersembahkenna lah ndukur ntah nderapati.

¹⁵Si mpersembahkenca i babo batar-batar e me imam. Lebe ipenggelkenna kerahungna, jenari itutungna takalna i babo batar-batar e, tapi darehna iamburkenna i tepi batar-batar e.

¹⁶Biruru ras tukana iambekkenna lah kempak matawari pultak batar-batar e, ku ingan abu.

¹⁷Kenca bage icaingkenna lah kabengna, tapi ola seh penggel, e maka kerina itutung i babo batar-batar. Bau persembahen tutungen e merim iakap TUHAN.