Read Batak Karo IMAMAT 10 Bible Online

IMAMAT 10 - Batak Karo bible

IMAMAT 10

¹Anak Harun, Nadap ras Abihu muat dapur arangna tersada. Itamana arang si gara ku je, icircirna alu kumenen, e maka ipersembahkenna e man TUHAN. Tapi api e la badia erkiteken TUHAN la merentahken kalak enda mpersembahkenca.

²E maka rempet ipesusur TUHAN api, janah ipan api e kalak ndai duana seh mate i bas ingan e i adep-adepen TUHAN.

³E maka nina Musa man Harun, “Enda me kata TUHAN sanga nina, ‘Kasa kai kalak si erdahin guna Aku arus maka ipehagana kebadianKu; Kucidahken ateKu kemulianKu man bangsangKu.’ ” Tapi Harun sinik saja.

⁴Erkiteken si e idilo Musa si Misael ras Elsapan, e me anak-anak Usiel, bapa nguda Harun. Nina man kalak enda duana, “Mari, babalah mait senina-seninandu e ndarat i bas Kemah si Badia e nari, janah tamaken i darat ingan erkemah.”

⁵E maka reh kalak enda, janah alu njemak paken mait e, iangkatna duana ku darat ingan erkemah, sue ras si iperentahken Musa.

⁶Kenca bage nina Musa man Harun ras man anakna Eleasar ras Itamar, “Ola ipelepas bukndu la isuri, ola icaingken pe uisndu guna nuduhken erceda ate. Adi bage perbahanndu, kam pe mate, janah TUHAN nembeh man kerina perpulungen enda. Tapi kalak Israel temanndu sebangsa ipelepas erceda ate i bas kematen kalak enda duana si jadi erkiteken api si ipesusur TUHAN.

⁷Ola kam ndarat i bas pintun Kemah e nari. Adi ndarat kam, mate kam, sabap enggo kam itangkuhken alu minak penangkuhen e guna ndahiken dahin si khusus man TUHAN.” E maka iikutken kalak enda kata Musa.

⁸Nina TUHAN man Harun,

⁹“Kam ras anak-anakndu ola bengket ku bas Kemah Perjumpan kenca minem anggur ntah bier; adi ku bas kam mate kam. Enda me sada peraturen arus ipatuhi kerina kesusurenndu.

¹⁰Arus ilainkenndu apai sikerajangen Dibata ras apai si ipergunaken man kalak si nterem, bage pe apai si la pantangen ras apai si pantang.

¹¹Arus iajarkenndu man bangsa Israel kerina undang-undang si enggo Kubereken man bandu erkelang-kelangken Musa.”

¹²Nina Musa man Harun ras man duana anakna si tading e, Eleasar ras Itamar, “Buat iba-iba persembahen pangan e si ipersembahken man TUHAN e, bahan lah roti si la itama ragi i bas si e nari, jenari pan i duru batar-batar persembahen, erkiteken badia kal persembahen e. [7†]

¹³Panlah e i bas ingan si badia; bagin si e me sikerajangenndu ras anak-anakndu i bas pangan si enggo ipersembahken man TUHAN. E kap si iperentahken TUHAN man bangku.

¹⁴Tapi kam ras keluargandu banci ipanndu tenten ras bites asuh-asuhen si iendesken selaku pemere khusus ras sumbangen khusus man TUHAN guna imam-imam. Banci ipanndu e i bas kerina ingan si bersih rikutken peraturen agama. Persembahen bagin persembahen persadan bangsa Israel si enggo ibereken man bandu ras man anak-anakndu jadi sikerajangenndu. [8†]

¹⁵Bites ras tentenna arus ibaba kalak enda sanga iendeskenna tabeh-tabeh e jadi persembahen pangan man TUHAN. Bagin-bagin enda jadi sikerajangenndu ras anak-anakndu seh rasa lalap, sue ras perentah TUHAN.”

¹⁶Isungkun Musa kerna kambing guna persembahken dosa e; e maka ietehna maka kambing e enggo itutung. Erkiteken si e, merawa ate Musa man Eleasar ras man Itamar nina,

¹⁷“Engkai la ipanndu persembahen kerna dosa e i bas ingan si badia? Badia kal e, janah e enggo ibereken TUHAN man bandu gelah arah e teridah maka dosa bangsa Israel enggo isasapken. [9†]

¹⁸Erkiteken darehna la ibaba ku bas Kemah si Badia e, arusna enggo ipanndu persembahen e i je, bagi si kuperentahken.”

¹⁹Nina Harun ngaloi, “Uga adi i bas wari enda enggo ku pan persembahen kerna dosa e? Banci kin e erbahanca meriah ukur TUHAN? Tuhu kalak enda mpersembahken persembahen man TUHAN i bas wari enda; ibabana persembahen tutungen, tapi kejadin-kejadin enda jadi denga kang man bangku.”

²⁰Kenca ibegi Musa e, ia pe setuju.