Read Batak Karo IMAMAT 11 Bible Online

IMAMAT 11 - Batak Karo bible

IMAMAT 11

¹Ibereken TUHAN man Musa ras man Harun peraturen-peraturen si tersurat i teruh enda

²guna bangsa Israel. Banci ipanndu rubia-rubia daraten,

³si erbelah silu-silu tapak-tapakna tapi petegeti.

⁴[4-6] Tapi unta, landak, kelinci la banci ipanndu. Rubia-rubia enda pantangen, amin gia ia petegeti tapi la erbelah silu-silu tapak-tapakna.

⁷Babi ola pan; e pantangen, amin pe erbelah silu-siluna tapi la petegeti.

⁸Ola pan rubia-rubia enda ndai, ola kuit pe bangkena, sabap pantangen.

⁹Kerina jenis nurung si ersirip ras ersisik banci ipanndu,

¹⁰tapi si nggeluh i bas lau, si la ersirip ras la ersisik, la banci ipan.

¹¹Rubia-rubia e pantangen. La banci ipan ras ikuitndu pe bangkena.

¹²La banci ipanndu si nggeluh i bas lau si la ersirip ras ersisik.

¹³ [13-19] Perik-perik si tersena arah teruh enda la banci ipanndu e me: kuliki, buk, rajawali, liat-liat; kuliki gara, kuliki mbiring, kak; perik unta; perik lawit, ondan, enggang, mbelibes, mburman, bengkik.

²⁰Kerina serangga si erkabeng pantangen,

²¹seakatan si banci lompat.

²²Jenis labang ras kurung banci ipanndu.

²³Tapi kerina jenis serangga si deban si kitik, si erkabeng dingen nggarang, pantangen.

²⁴ [24-28] Ise ngkuit bangke rubia-rubia si la erbelah silu-siluna si la petegeti, dingen si ngkuit rubia-rubia si empat nahena, si erdalan alu tapak-tapak nahena, ia lanai bersih seh karaben. Kalak si maba bangke enda ndai arus icucina pakenna, tapi ia la bersih seh karaben.

²⁹[29-30] Kasa kai si sebangsa ras menci bage pe lobar arus ipantangken.

³¹Ise si ngkuitca ntah ngkuit bangkena, ia lanai bersih seh karaben.

³²Adi bangkena ndabuh ntah ku kai-kai saja, si idabuhina ndai pe enggo kena pantang, subuk si idabuhina e kayu, uis, kulit, guni, ntah kai gia kegunanna. Barang si bage arus icebukken ku bas lau tapi tetap denga la bersih seh karaben.

³³Adi ndabuh ia ku bas kudin taneh, kai isi kudin taneh e enggo pantang kerina, janah kudin taneh e pe arus ipecahken.

³⁴Kerina pangan, adi enggo kena lau si ituangken i bas kudin ndai nari e pe enggo pantang. Bage pe kai gia inemen si lit i bas kudin ndai, e pe enggo pantang.

³⁵Kerina si idabuhi bangke ndai enggo jadi pantangen; adi barang e daliken ntah anglo si ibahan i bas taneh nari, la banci lang ipecahken.

³⁶Tapi adi sumur ntah ulu lau ia tetap la pantang amin gia kena bangke-bangke pantangen e.

³⁷Ntah bangke kai gia si pantangen ndabuh ku benih si nandangi ierdangken, benih e labo pantang.

³⁸Tapi adi benih ndai sangana ireme i bas lau, kenca bage idabuhi bangke si pantang ndai, benih ndai enggo pantang.

³⁹Adi mate rubia-rubia si banci ipan, ise si ngkuit bangkena ia enggo lanai bersih ngayak ben.

⁴⁰Janah ise si man bangke ndai, arus icucina pakenna, tapi tetap denga ia la bersih seh ben. Kalak si maba bangke ndai, arus nuci pakenna, tapi tetap nge ia la bersih ngayak ben.

⁴¹La banci ipanndu rubia-rubia si kitik-kitik si erdalan i babo taneh,

⁴²subuk si nggarang si dagingna kena taneh ntah lang, ntah si melala nahena.

⁴³Ola pemelket bandu alu man rubia-rubia enda ndai.

⁴⁴Aku kap TUHAN, Dibatandu. Arus ijagandu kebadianndu, erkiteken Aku badia. [10†]

⁴⁵Aku kap TUHAN si naruhken kam ndarat i taneh Mesir nari, gelah Aku banci jadi Dibatandu. Arus maka kam badia, erkiteken Aku badia.

⁴⁶Enda me peraturen kerna rubia-rubia ras perik-perik, kerna asa kai si nggeluh i bas lau, ras kerina si muit i taneh.

⁴⁷Arus maka metenget kam mbedaken rubia-rubia si la pantang rikutken aturen agama, apai si pantang; apai si banci ipan janah apai si la banci ipan.