Read Batak Karo IMAMAT 13 Bible Online

IMAMAT 13 - Batak Karo bible

IMAMAT 13

¹Ibereken TUHAN man Musa ras man Harun peraturen-peraturen enda.

²Adi i bas kulit daging kalak lit si besar, ntah bareh, ntah mbentar-mbentar, si banci salih jadi penakit kulit si banci langket, kalak si bage arus ibaba ku adep-adepen imam kesusuren Harun.

³Arus maka ipepayo imam penakit e, janah adi buk si i je salih jadi mbentar, dingen penakit e bagesen asang kulit sekelewetna, penakit e penakit kulit. E maka kalak si bage arus ikataken imam kalak si la bersih rikutken aturen agama.

⁴Tapi adi penakit e mbentar, tapi teridah la bagesen asang kulit sekelewetna, dingen bukna pe langa salih jadi mbentar, ipeserap imam lah kalak si bage pitu wari dekahna.

⁵I bas wari si pepituken arus maka ipepayo imam ka ia mulihken, janah adi rikutken pengakapna penakit e bali ka nge dingen labo reh tambahna, arus maka ipeserapna ka ia pitu wari nari.

⁶I bas wari si pepituken arus maka ipepayona ka kalak ndai, janah adi penakit e enggo masap, labo reh tambahna, arus ikataken imam ia bersih rikutken aturen agama. Penakit e penakit si biasa nge. Icuci kalak sakit e lah uisna, janah ia bersih rikutken aturen agama.

⁷Tapi adi penakit kulitna e reh tambahna kenca ia ipepayo imam i ja ikataken imam e ia bersih, arus maka ngadap ka ia mulihken man imam.

⁸Ipepayo imam e lah sekali nari, jenari adi payo maka erkelekna nge, ikatakenna lah maka kalak enda ndai la bersih; penakitna e penakit kulit si bahaya kap.

⁹Adi lit kalak si erpenakit kulit, ia arus ibaba ngadap imam.

¹⁰Kenca iperiksa imam ia, janah adi idahna maka penakit si lit i bas kulitna e mbentar rupana dingen buk si i je pe mbentar ibahanna janah enggo ndangiren,

¹¹maka penakitna e, e me penakit kulit si ertahun-tahun. Ikataken imam lah maka kalak si bage la bersih. Tapi la perlu ia ipeserap, sabap tangkas nge ia la bersih.

¹²Adi penakit kulit ndai reh belangna janah ikenaina i bas takalna nari terus ku nahe,

¹³arus maka ipepayo imam ka ia mulihken. Adi penakit e tuhu enggo ngkenai kerina badan kalak ndai, maka ikataken imam lah kalak si bage bersih rikutken aturen agama. Adi enggo jadi mbentar kerina badanna kalak si bage enggo bersih rikutken aturen agama.

¹⁴Tapi katawari turah ugahna, ia lanai bersih.

¹⁵Ia arus ipepayo imam ka mulihken, janah adi idahna ia ugahen, maka ia arus ikataken imam la bersih. Ugahna e gadam kap, e maka kalak si bage la bersih.

¹⁶Tapi adi ugahna ndai malem, janah mbentar ka mulihken laweslah ia ndahi imam,

¹⁷gelah ipepayona ka ia mulihken. Adi enggo mbentar ka ugahna ndai mulihken, ia bersih rikutken aturen agama, janah ikataken imam lah maka enggo bersih ia.

¹⁸Adi lit kalak si enggo malem barehna,

¹⁹tapi adi i bas bekas bareh e besar janah mbentar rupana, ntah mbentar megara-gara arus maka idahina imam.

²⁰Imam arus meriksa ia, janah adi teridah tempa bekas bareh e bagesen asa kulit sekelewetna, dingen mbulu si lit i je pe enggo mbentar, ikataken imam lah maka kalak si bage la bersih, erkiteken e penakit kulit si enggo mulai turah i bas bareh e.

²¹Tapi adi kenca iperiksa imam teridah maka buk si lit i je langa bo mbentar, janah ciningna e labo bagesen asang kulit sekelewetna, janah rupana pe magem-magem nge, ipeserap imam lah ia pitu wari dekahna.

²²Adi ciningna ndai erbelangna, arus maka ikataken imam ia la bersih; penakiten kap ia.

²³Tapi adi cining e biasa saja nge, la erbelangna, e bekas bareh e saja nge, janah ikataken imam lah maka kalak si bage bersih nge rikutken aturen agama.

²⁴Adi lit kalak meseng, jenari dagingna jadi mbentar, ntah mbentar megara-gara,

²⁵arus maka iperiksa imam kalak si meseng e. Adi buk i bas ingan meseng e enggo salih jadi mbentar, janah ugahna bagesen asang kulit sekelewetna, penakit e penakit kulit, si mulai turah i bas ingan si meseng e. Ikataken imam lah maka kalak si bage la bersih.

²⁶Tapi adi labo mbentar buk si lit i bas bekas meseng e, janah ugahna la bagesen asa kulit sekelewetna, tapi rupana magem-magem, ipeserap imam lah ia pitu wari.

²⁷I bas wari si pepituken iperiksa imam ka ia mulihken. Adi erbelangna, penakit kulit si bahaya kap e, janah arus maka ikataken imam ia la bersih.

²⁸Tapi adi bagin simeseng e biasa saja nge, la erbelangna, janah rupana pe magem-magem, penakit e labo penakit kulit. Imam arus ngataken maka kalak si bage bersih nge rikutken aturen agama, sabap e cining meseng e saja nge.

²⁹Adi lit dilaki ntah diberu ugahen perdempaken ntah isangna,

³⁰iperiksa imam lah e. Adi ugah ndai bagesen asang kulit sekelewetna, dingen buk si lit i je megersing dingen melumat, penakit e penakit kulit. Ipebetehken imam lah maka kalak si bage la bersih.

³¹Adi sanga ia ipepayo imam, ugah e la bagesen asang kulit sekelewetna, tapi la lit i je buk si mehuli, ipeserap imam lah ia pitu wari dekahna.

³²I bas wari si pepituken ipepayo imam e ka ia mulihken, janah adi labo erbelangna ugahna e dingen labo lit i je buk megersing, janah ugah e pe labo bagesen asang kulit sekelewetna,

³³icukur kalak ndai lah buk si lit i sekelewet ugah e. Kenca bage ipeserap imam lah ia pitu wari nari dekahna.

³⁴I bas wari si pepituken arus maka ipepayo imam ka ugah e mulihken. Adi labo erbelangna, janah teridah maka ugah e labo bagesen asangken kulit sekelewetna, ipebetehken imam lah maka ia bersih rikutken aturen agama. Icuci kalak si bage lah pakenna, e maka bersih me ia.

³⁵Tapi adi ugah ndai erbelangna kenca ia ikataken bersih,

³⁶arus maka ipepayo imam ka ia mulihken. Adi ugah e enggo erbelangna, lanai perlu idarami buk megersing i je, sabap kalak e enggo terang la bersih.

³⁷Tapi adi menurut penggejapen imam ugah e labo erbelangna, janah buk si lit i je pe mehuli, ugah e enggo malem. E maka ikataken imam lah kalak si bage enggo bersih rikutken aturen agama.

³⁸Adi lit bagin si mbentar-mbentar i bas kulit sekalak dilaki tah diberu

³⁹arus maka ipepayo imam kalak ndai. Adi bagin si mbentar-mbentar e labo mesangat perbentarna, kurap nge e; kalak e bersih rikutken aturen agama.

⁴⁰ [40-41] Adi naktaken buk sekalak jelma seh maka ia sulah, subuk arah lebe ntah arah pudi, e labo erbanca kalak e la bersih.

⁴¹

⁴²Tapi i bas sulahna e lit turah mbentar megara-gara, penakit kulit si bahaya kap e.

⁴³Iperiksa imam lah kalak sibage, janah adi lit i je turah si mbentar megara-gara,

⁴⁴ikataken imam lah maka kalak si bage la bersih, erkiteken penakit kulit lit i bas takalna.

⁴⁵Kalak si kena penakit kulit arus make uis merigat-rigat, ola surina bukna, itutupi ayona arah teruh, janah serko-serko ia nina, “Meluat! Meluat!”

⁴⁶Kidekah ia penakiten denga, ia tetap la bersih, janah ia arus tading i darat ingan erkemah, serap i bas jelma si deban nari.

⁴⁷Adi paken wool, lenen

⁴⁸uis wool, lenen, kulit, ntah barang-barang kai pe si ibahan i bas kulit nari enggo dawanen

⁴⁹adi rupa dawan e lit permeratah-ratahna ntah pe lit pergara-garana, e dawan si banci langket kap. Barang-barang e arus maka icidahken man imam.

⁵⁰Ipepayo imam lah barang-barang e, janah ipeserapna lah barang-barang e pitu wari dekahna.

⁵¹I bas wari si pepituken ipepayona ka lah barang ndai mulihken, janah adi dawan ndai reh belangna, barang e la bersih.

⁵²Arus maka itutung imam barang e, erkiteken e dawan si banci langket si arus ikernepken alu api.

⁵³Tapi adi sanga ipepayo imam idahna maka labo erbelangna dawanna e i bas barang ndai,

⁵⁴iperentahken imam lah maka barang e icuci jenari ipeserap pitu wari nari.

⁵⁵Kenca bage ipepayona ka; adi dawan e labo sambar rupana, amin la gia erbelangna, barang e meluat denga. E maka arus itutungndu barang e, aminna gia bagin si ceda e arah lebe ntah arah pudi saja.

⁵⁶Tapi adi sanga ipepayo imam barang e mulihken dawan e enggo mulai masap arus maka bagin e irigatken i bas paken ntah kulit nari.

⁵⁷Jenari adi dawan ndai turah denga, dawan e langket ka mulihken. E maka itutung empuna lah barang e.

⁵⁸Tapi adi kenca icuci bene simeruntik e, icucina lah mulihken, e maka barang e enggo bersih rikutken aturen agama.

⁵⁹Enda me peraturen kerna dawan si lit i bas paken wool ntah lenen, ntah uis wool ntah lenen, ntah pe i bas asa kai barang-barang si ibahan i bas kulit nari.