Read Batak Karo IMAMAT 14 Bible Online

IMAMAT 14 - Batak Karo bible

IMAMAT 14

²peraturen-peraturen kerna lakon pembersihen man kalak si enggo malem penakit kulitna. I bas wari i ja ate ia ikataken enggo bersih, ibaba lah ia ku adep-adepen imam, [13†]

³janah ibaba imam lah kalak ndai ndarat i bas ingan erkemah nari, e maka ipepayo imam ia. Adi penakit ndai enggo malem,

⁴arus maka iperentahken imam kalak si enggo malem ndai maba dua perik si bersih rikutken aturen agama, radu ras sengkeret batang aras, benang megara, ras setangke batang hisop.

⁵Kenca bage iperentahken imam lah maka perik ndai igeleh sada i das kudin taneh si isin lau mbergeh si ibuat ibas ulu lau nari.

⁶E maka ibuatna lah perik si sada nari ndai, jenari icebukkenna ku dareh perik si enggo igeleh ndai, radu ras batang aras, benang megara ras hisop ndai.

⁷Ipirpirkenna lah dareh e pitu kali ku babo kalak si man bersihenken erkiteken penakit kulitna e, kenca bage ikatakenna lah maka ia enggo bersih. E maka ipekabangna lah perik si la igeleh ndai ku mbalmbal.

⁸Kalak si enggo ikataken malem ndai icucina lah pakenna, icukurna kerina bukna, kenca bage ridi; e maka ia enggo bersih rikutken aturen agama. E maka ia enggo banci bengket ku ingan erkemah, tapi arus ia tading i darat kemahna pitu wari dekahna.

⁹I bas wari si pepituken, arus maka icukurna ka takalna, janggutna, alis matana, ras kerina buk si lit i bas badanna; e maka icucina lah pakenna, kenca bage ridi, e maka ia enggo bersih rikutken aturen agama.

¹⁰Pewaluh wariken ibabana lah dua bajar biri-biri, sada biri-biri beruna umur sada tahun si la lit sitik pe man pandangen, telu kilo tepung campur minak saitun, sepertelu liter minak saitun.

¹¹Ibaba imam lah kalak enda ndai ras barang-barang persembahenna ku pintun Kemah Perjumpan.

¹²Kenca bage ibuat imam lah sada bajar biri-biri e janah radu ras minak saitun si sepertelu liter ndai ipersembahkenna lah jadi persembahen penebusen. Ipersembahkenna lah e jadi pemere khusus man TUHAN guna imam.

¹³Igelehna lah biri-biri ndai i bas ingan kalak nggeleh asuh-asuhen guna persembahen pengalemi dosa, ras persembahen tutungen. Arus maka ibahanna bage, erkiteken persembahen penebusen e bali ras persembahen kerna dosa, e me sikerajangen imam, janah seh kal badiana.

¹⁴Ibuat imam lah sitik dareh biri-biri ndai, itamakenna ku cuping si kemuhen, ku kambal-kambal tan si kemuhen, ku kambal-kambal nahe si kemuhen kalak si man pebetehenken enggo bersih e.

¹⁵Ibuat imam lah sitik minak saitun e, iilingkenna sitik ku tapak-tapak tanna si kawes,

¹⁶e maka icalehkenna sada jari-jari tanna si kemuhen ku minak ndai, jenari ipirpirkenna sitik minak e pitu kali i adep-adepen TUHAN.

¹⁷Ibuat imamlah sitik minak si i bas tapak-tapak tanna ndai, ras sitik ka dareh biri-biri ndai e maka itamakenna ku cuping si kemuhen, kambal-kambal tan si kemuhen, ku kambal-kambal nahe si kemuhen kalak si man pebetehenken maka ia enggo bersih e.

¹⁸Iba-iba minak si i bas tapak-tapak tan imam ndai isapukenna lah ku takal kalak ndai. Bagendalah ibahan imam ngelakoken lakon pembersihen e.

¹⁹Kenca bage ipersembahken imamlah persembahen pengalemi dosa jenari ilakokenna lah lakon pembersihen. Kenca bage igelehna lah asuh-asuhen guna persembahen tutungen e,

²⁰e maka ipersembahkennalah e radu ras persembahen pangan e i babo batar-batar. Bagenda lah ibahan imam ngelakoken lakon pembersihen e, e maka bersih me kalak ndai rikutken aturen agama.

²¹Adi kalak sakit e musil, dingen la ia ngasup nikapken lebih asa si e, ibabanalah sada bajar biri-biri si nguda denga jadi persembahen penebusen, e me pemere si khusus man TUHAN guna imam. Ibabana saja sada kilo tepung si icampur ras minak saitun, guna persembahen pangan ras sepertelu liter minak saitun.

²²Bage pe ibabanalah dua ndukur ntah nderapati, sada man persembahen penasap dosa, sada nari man persembahen tutungen.

²³Si enda kerina arus ibabana man imam i bas wari pewaluhken kenca lakon pembersihen e, i pintun Kemah.

²⁴Ibuat imamlah biri-biri ras minak saitun e jenari ipersembahkenna jadi pemere si khusus man TUHAN guna imam.

²⁵Igelehnalah biri-biri ndai, ibuatna sitik darehna, e maka itamaken ku cuping si kemuhen, ku kambal-kambal tan si kemuhen, ras ku kambal-kambal nahe si kemuhen kalak ndai.

²⁶Iilingken imam lah sitik minak ku tapak-tapak tanna si kawes,

²⁷e maka alu sada jari-jari tanna sikemuhen ipirpirkenna sitik pitu kali i adep-adepen TUHAN.

²⁸Itamakenna lah sitik minak ndai ku inganna namaken dareh ndai, e me: cuping kalak ndai si kemuhen, kambal-kambal tanna si kemuhen, ras kambal-kambal nahe si kemuhen.

²⁹Iba-iba minak si lit i bas tapak-tapak tan imam ndai isapuken imam lah ku takal kalak enda ndai: Alu bage enggo idalankenna lakon pembersihen.

³⁰Kenca bage maka ipersembahkennalah sada ndukur ntah nderapati ndai

³¹jadi persembahen nasapken dosa, janah sada nari jadi persembahen tutungen radu ras persembahen pangan e. Bagenda lah ibahan imam ndahiken lakon pembersihen e.

³²Enda me peraturen-peraturen man kalak si kena penakit kulit, tapi la ngasup ngelitken persembahen bagi semalna guna lakon pembersihen.

³³Ibereken TUHAN man Musa ras man Harun

³⁴peraturen-peraturen kerna rumah si dawanen. (Peraturen-peraturen enda gunana man bangsa Israel kenca ia bengket ku negeri Kanaan, si nandangi ibereken TUHAN jadi sikerajangen bangsa Israel.)

³⁵Ise si ngidah dawan i bas rumahna, ikatakenna lah e man imam.

³⁶Arus maka iperentahken imam gelah kerina isi rumah e ipedarat ope denga ipepayona dawan e; adi la bage ibahan, maka sinasa lit i bas rumah e ikataken la bersih. Kenca bage maka imam berkat ku rumah e,

³⁷jenari ipepayonalah dawan e. Adi lit turah meratah-ratah ntah pe megara-gara si tempa-tempa enggo ipanna dingding e,

³⁸itadingkenna ras ikuncina lah rumah e pitu wari dekahna.

³⁹Pepitu wariken, arus maka mulihken ia ku je e maka ipepayona ka rumah e. Adi dawan e enggo erbelangna,

⁴⁰iperentahkennalah maka batu dingding ingan dawan e turah iagui janah iambekken ku bas ingan si la bersih i darat kuta.

⁴¹Kenca bage, arus ikis-kis kerina dingding rumah e si arah bas, e maka kerina plester si enggo ikis-kis ndai arus itanemken ku ingan si la bersih i darat kuta.

⁴²Kenca bage buat lah batu si mbaru nggantiken batu dingding si enggo iambengken ndai, jenari pergunaken lah plester si mbaru ngelapisi dingding ndai.

⁴³Adi dawan ndai turah denga ka i bas rumah e kenca batu e iambekken, janah dingdingna pe enggo ikis-kis, ras enggo ka pe iplester mulihken,

⁴⁴ipepayo imam lah mulihken. Adi dawan e enggo erbelangna, rumah e lanai bersih.

⁴⁵Arus maka rumah e iruntuhken, janah kerina batuna, perkayunna, plesterna arus iangkut ndarat i bas kuta e nari janah itamaken ku bas ingan sampah si tertentu.

⁴⁶Ise bengket ku bas rumah e tupung rumah e sangana ikunci denga, ia enggo la bersih seh ben wari.

⁴⁷Ise si medem ntah man i bas rumah e, arus maka icucina pakenna.

⁴⁸Adi rumah e ipepayo imam ka mulihken, jenari dawan ndai lanai lit turah kenca enggo iplester, arus maka ikatakenna rumah e enggo bersih rikutken aturen agama, erkiteken dawan e lanai lit sitik pe i bas rumah e.

⁴⁹Guna mbersihken rumah e rikutken aturen agama arus maka ibabana dua perik, sengkeret kayu aras, selambar benang gara, sentangke batang hisop.

⁵⁰Igelehna lah perik e sada i babo sada kudin taneh si isin lau mbergeh i bas sumbul nari.

⁵¹Ibuatnalah batang aras, hisop, benang gara, ras perik si langa igeleh e, e maka icebukkenna kerina ku dareh perik si enggo igeleh ndai ras ku bas lau mbergeh e. E maka ipirpirina lah rumah e pitu kali.

⁵²Alu bage ibersihkenna me rumah e alu dareh perik, lau mbergeh, perik si nggeluh denga, batang aras, hisop ras benang megara e.

⁵³Kenca bage maka ipekabangnalah perik si nggeluh denga ndai ku mbalmbal. Bagenda lah perbahan imam ngelakoken lakon pembersihen guna rumah e, gelah rumah e bersih rikutken aturen agama.

⁵⁴Enda me peraturen kerna penakit kulit;

⁵⁵[55-56] e me ugah, bareh, ras dawan i bas paken ntah rumah.

⁵⁶

⁵⁷Peraturen enda nentukenca sada-sada barang la bersih dingen katawari ka enggo bersih rikutken aturen agama.