Read Batak Karo IMAMAT 15 Bible Online

IMAMAT 15 - Batak Karo bible

IMAMAT 15

¹ TUHAN mereken peraturen-peraturen enda man Musa ras man Harun

²guna bangsa Israel. Adi sekalak dilaki lit ndaraten i bas kelaminna nari, si ndarat e la kap bersih.

³Subuk si ndarat e bage pe si langa ndarat la kap bersih.

⁴Kasa kai si ipedemi ntah ikunduli kalak si bage jadi la bersih rikutken aturen agama.

⁵Ise si ngkuit inganna medem,

⁶ntah engkunduli kai si enggo ikunduli kalak si bage arus maka icucina pakenna, jenari ridi ia, tapi ia tetap la bersih seh ben.

⁷Ise si ngkuit kalak si sangana lit ndaraten i bas kelaminna nari arus maka icucina pakenna dingen ridi, tapi ia tetap la bersih seh ben.

⁸Adi kalak si sangana bage icidurina kalak si bersih rikutken aturen agama, arus maka icuci kalak si bersih ndai pakenna jenari ridi ia, tapi ia tetap la bersih seh ben.

⁹Asa kai pelana ntah barang si ikunduli kalak si bage, e pe enggo la bersih.

¹⁰Ise si ngkuit kai saja si enggo ikunduli kalak si bage ia pe ikut la bersih ngayak ben. Ise si ngangkat ntah kai-kai gia si enggo ikunduli kalak si bage, arus maka icucina pakenna ras arus ia ridi, tapi ia tetap la bersih ngayak ben.

¹¹Adi kalak si bage, ngkuit kalak si deban alu la lebe murihi tanna, kalak si deban ndai arus nuci pakenna ras arus ia ridi tapi ia tetap la bersih ngayak ben.

¹²Kasa kai kudin taneh si ikuit kalak si bage arus ipecahken janah kasa kai mangkuk kayu si ikuitna arus iburihi.

¹³Kenca kalak si bage enggo malem, janah si ndaraten ndai enggo ngadi, itimaina lah pitu wari dekahna, e maka icucina pakenna jenari ridi ia i bas lau mbergeh si maler. E maka ia enggo bersih rikutken aturen agama.

¹⁴Pewaluh wariken, ibabana lah dua ndukur ntah nderapati man imam i pintun Kemah Perjumpan, e maka iberekenna man imam e.

¹⁵E maka ipersembahken imam sada jadi persembahen pengalemi dosa, janah sada nari jadi persembahen tutungen. Alu bage me imam ndahiken lakon pembersihen man kalak si bage.

¹⁶Adi sekalak dilaki ndarat air manina, iperidinalah kerina badanna, tapi ia tetap la bersih ngayak ben.

¹⁷Asa kai barang si ibahan i bas uis ntah kulit nari, e arus icuci, tapi si e kerina tetap la bersih ngayak ben.

¹⁸Kenca dilaki ras diberu ersada kula, arus maka duana ia ridi, tapi duana ia la bersih ngayak ben.

¹⁹Adi sekalak diberu sangana nguda bulanna, ia la bersih pitu wari dekahna. Si ndeges ia, ia pe la bersih ngayak ben.

²⁰Kai pe si ikunduli ntah ipedemi diberu si sangana nguda bulanna, e pe jadi la bersih.

²¹[21-23] Ise si ngkuit ingan medem diberu e, ntah ngkuit kai saja si enggo ikundulina, arus nuci pakenna dingen arus ia ridi tapi ia tetap la bersih ngayak ben.

²⁴Adi sekalak dilaki ersada kula ras sekalak diberu si sangana nguda bulanna, si dilaki e pe lanai bersih erkiteken ilangketi si diberu e. Erkiteken si e ia pe la bersih pitu wari dekahna, janah kasa kai ingan medem si ipedemi e pe jadi la bersih.

²⁵Adi sekalak diberu ndarat darehna la sanga nguda bulanna, ntah pe adi darehna terus ndarat enggo pe lewat masa bulanna, ia la bersih kidekah dareh e ndarat denga, bali ras sanga nguda bulanna.

²⁶Asa kai ingan medem si ipedemina, bage pe asa kai si ikundulina kerina e jadi la bersih.

²⁷Ise si ngkuit barang-barang e ia jadi la bersih, e maka arus icucina uisna, janah arus ia ridi. Tapi ia tetap la bersih ngayak ben.

²⁸Kenca enggo ngadi dareh e ndarat itimaina lah pitu wari, e maka ia enggo bersih rikutken aturen agama.

²⁹Pewaluh wariken, ibabana lah ndukur, ntah dua nderapati man imam ku pintun Kemah Perjumpan.

³⁰Ipersembahken imam lah e sada jadi persembahen penasap dosa, janah sada nari man persembahen tutungen. Alu bage me ilakoken imam lakon pembersihen man diberu e.

³¹Isuruh TUHAN si Musa guna mpersingeti bangsa Israel kerna kinimelketenna, gelah ola imelketina Kemah Perjumpan si lit i tengah ingan erkemah e. Adi imelketina, la banci lang mate ia.

³²Enda me peraturen-peraturenna kerna dilaki si lit ndaraten bagi lau i bas kelaminna nari, ntah dilaki si ndarat air manina,

³³bage pe kerna diberu si sangana nguda bulanna, ntah pe kerna dilaki si ersada kula ras diberu si la bersih rikutken aturen agama.